ނިކަމެތި ދިރިއުޅުމެއްގައި އުޅުމަށްފަހު މުއްސަނދި ކަމަކަށް އެދިގެން އަންނަ ދާއިރާއަކަށް ސިޔާސީ ދާއިރާ ނުހެދުމަށް ސްރީ ލަންކާގެ ބޮޑުވަޒީރު ރަނިލްވިކްރަމަ ސިންހަ އެ ގައުމުގެ މުނިސިޕަލް ކައުންސިލަށް އިންތިޚާބުވެ ވަޑައިގެންނެވި މެމްބަރުންނަށް ގޮވާލައްވައިފިއެވެ.

ބޮޑުވަޒީރު ރަނިލް މިގޮތަށް ގޮވާލެއްވީ ކޮލަމްބޯ މުނިސިޕަލް ކައުންސިލަށް އަލަށް އިންތިޚާބުވެ ވަޑައިގެންނެވި މެމްބަރުން ހުވާކުރެއްވުމަށް ހޯމަ ދުވަހު ޓެމްޕްލް ޓްރީގައި ބޭއްވި ރަސްމިއްޔާތުގައެވެ.

މި ރަސްމިއްޔާތުގައި ކޮލަމްބޯގެ ފުރަތަމަ އަންހެން މޭޔަރު ރޯޒީ ސެނަނައިކަވެސް ވަނީ ހުވާ ކުރައްވާފައެވެ.

 ސްރީލަންކާގައި މިމަހުގެ 10 ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިޚާބުގައި ވެރިކަން ކުރާ ކޯލިޝަނަށްވަނީ ބޮޑު ނާކާމިޔާބަކާ ކުރިމަތިލާން ޖެހިފައެވެ.

ސިރިސޭނާގެ ފްރީޑަމް ޕާޓީއާއި ރަނިލް ވިކްރަމަސިންހަގެ ޔުނައިޓެޑް ނޭޝަނަލް ޕާޓީއިން ކޯލިޝަން ހަދައިގެން ވެރިކަމަށް އައި ނަމަވެސް، ކައުންސިލް އިންތިޚާބުގައި ދެޕާޓީއިން ވާދަކުރީ ވަކިންނެވެ. ލޯކަލް ކައުންސިލް އިންތިޚާބުގައި އާދަޔާ ޚިލާފު ބޮޑު ކާމިޔާބީއެއް ހޯދައި ސަރުކާރު ބަލިކުރީ ކުރީގެ ރައީސް މަހިންދަ ރާޖަޕަކްސަގެ ޕާޓީއިންނެވެ.

ކައުންސިލް އިންތިޚާބުގައި  ކާމިޔާބު ހޯދީ ރާޖަޕަކްސަގެ ޕާޓީއިން