ވެރިކަމުގެ ފުރަތަމަ އަހަރު މުއްސަނދިންގެ ލިސްޓުގައި ރައީސް ޓްރަމްޕް 92 ދަރަޖަ ފަހަތަށް

އެމެރިކާގެ ރައީސް ޑޮނާލްޑް ޓްރަމްޕްގެ ނެޓް ވަރތު، ނުވަތަ އޭނާގެ މުއްސަނދިކަމުން، ފާއިތުވި 12 މަސްދުވަހުގެ ތެރޭގައި 600 މިލިއަން އެމެރިކާ ޑޮލަރު މަދުވެފައިވާ ކަމަށް ފޯބްސް މެގަޒިނުން ބުނެފިއެވެ.

ވެރިކަމަށް ވަޑައިގަތްތާ އަހަރެއް ވާން ގާތްވެފައިޥާއިރު، ޓްރަމްޕް ވަނީ ފޯބްސް އިން ނެރޭ އެމެރިކާގެ މުއްސަނދިންގެ ލިސްޓުގެ 248 ވަނައަށް ވެއްޓިފައެވެ. މިއީ 92 ދަރަޖައިގެ ވެއްޓުމެކެވެ.

ފޯބްސްއިން އެންމެ ފަހުން ނެރުނު މުއްސަނދިންގެ ލިސްޓުގައި ވާގޮތުން އެމަނިކުފާނުގެ ނެޓް ވަރތަކީ މިހާރު 3.1 ބިލިއަން އެމެރިކާ ޑޮލަރެވެ.

ފޯބްސް މެގަޒިނުން ބުނެފައިވާ ގޮތުގައި ޓްރަމްޕަށް މިވަރުގެ ގެއްލުމެއް ވާން ދިމާވީ، ނިއުޔޯކުގެ ރިއަލް އެސްޓޭޓް މާކެޓް ދައްވުމާއި، ޤާނޫނީ ބޮޑެތި މައްސަލަތަކެއް ކުރިމަތިވުމުގެ އިތުރުން، ޚަރަދުބޮޑު ރިޔާސީ ކެމްޕެއިނެއް ހިންގުމުގެ ސަބަބުންނެވެ. މީގެ ތެރެއިންވެސް އެންމެ ބޮޑު ގެއްލުމެއް ވެފައިވަނީ ރިއަލް އެސްޓޭޓް ދާއިރާއިން ލިބުނު ގެއްލުންތަކުން ކަމަށާ، އެ ދާއިރާއިން ޓްރަމްޕަށް 400 މިލިއަން ޑޮލަރުގެ ގެއްލުން ވެފައިވާ ކަމަށް އެ މެގަޒިނުން ބުނެފައިވެއެވެ.

މީގެ އިތުރުން ޓްރަމްޕްގެ ރިޔާސީ ކެމްޕޭނަށް، އެމަނިކުފާނުގެ އަމިއްލަ މާލިއްޔަތުން 66 މިލިއަން ޑޮލަރު ޚަރަދު ކޮށްފައިވާއިރު، ރިއަލް އެސްޓޭޓާއި އެސެޓް މެނޭޖްމަންޓާއި، އެފަދަ އެހެން ދާއިރާތަކުން މީހުން ތަމްރީނުކުރުމަށް ޓްރަމްޕް ހިންގަވާ ޓްރަމްޕް ޔުނިވަރސިޓީ އާއި ދެކޮޅަށް ކޮށްފައިވާ ފްރޯޑްގެ ދައުވާއަކާއި ގުޅިގެން އެމަނިކުފާނަށް 25 މިލިއަން ޑޮލަރުގެ ގެއްލުން ވެފައިވެއެވެ.

މި އަހަރުވެސް އެމެރިކާގެ އެންމެ މުއްސަނދި މީހެއްގެ ގޮތުގައި މައިކްރޯސޮފްޓްގެ އެއް ބާނީ، ބިލް ގޭޓްސް ރޭންކު ކުރެވުނުއިރު، އޭނާގެ މާލިއްޔަތުގައި މި އަހަރު 89 ބިލިއަން ޑޮލަރު ހުރިކަމަށް ފޯބްސް އިން ވަނީ ބުނެފައެވެ. މިއީ 2016 ވަނަ އަހަރު ބިލް ގޭޓްސްގެ މާލިއްޔަތުގައި ހުރި ފައިސާއަށްވުރެ 8 ބިލިއަން ޑޮލަރު އިތުރު އަދަދެކެވެ.

މި އަހަރު ލިސްޓުގައި ހިމެނިފައިވާ އެމެރިކާގެ ހުރިހާ މުއްސަނދިންގެ ޖުމްލަ މާލިއްޔަތުގެ އަދަދު 2.7 ޓްރިލިއަނަށް އަރައެވެ.