ސިމްބާއިން ފެނިގެންދާނީ ސާރާއާއި ރަންވީރު ސިންގް
މި ފިލްމު ރިލީޒް ކުރާނީ މިއަހަރުގެ ޑިސެމްބަރު މަހުގެ 28 ގައި
ކަރަން، ސާރާ އަދި ރޯހިތު
ސިންބާއިން ފެނިގެންދާނީ ސައިފް އަލީ ޚާންގެ ދަރިފުޅު ސާރާ އަލީ ޚާންއާއި ބޮލީވުޑްގެ ތަރި ރަންވީރު ސިންގްކަން ކަށަވަރުވެއްޖެއެވެ.
ކަރަންޖޯހަރު އަންގާރަ ދުވަހު ކޮށްފައިވާ ޓްވީޓެއްގައި ބުނެފައިވަނީ ސިންބާއިން ފެނިގެންދާނީ ސާރާ އަލީ ޚާންއާއި ރަންވީރު ސިންގްއެވެ. މި ފިލްމު ޑައިރެކްޓް ކުރާނީ ރޯހިތު ޝެޓީކަމަށް ކަރަންގެ ޓްވީޓުގައި ވަނީ ބުނެފައެވެ. ކަރަންގެ ޓްވީޓުގައިވަނީ ސާރާ އާއި ރޯހިތު އަދި އޭނާއާއި އެކީގައި ހުރި ފޮޓޯވެސް އެޓޭޗް ކޮށްފައެވެ.
ކަރަން ބުނެފައިވަނީ މި ފިލްމު ރިލީޒް ކުރާނީ މިއަހަރުގެ ޑިސެމްބަރު މަހުގެ 28 ގައި ކަމަށެވެ. މި ފިލްމުގައި ރަންވީރު ފެނިގެންދާނީ އިންސްޕެކްޓަރެއްގެ ގޮތުގައެވެ.
ރަންވީރު ބުނެފައިވަނީ ރޯހިތު ޝެޓީއާއިއެކު މަސައްކަތް ކުރަން ލިބުމަކީ އޭނާ ވަރަށް ހިތްހަމަ ޖެހުނު ކަމެއްކަމަށެވެ. ރޯހިތު އާއި އެއްކޮށް މަސައްކަތް ކުރަން ލިބުން އެއީ ކޮންމެ މީހަކުވެސް ދެކޭ ހުވަފެނެއްކަމަށާއި މަސާލާ ފިލްމުތަކަށް ރޯހިތަކީ އެއްވަނަ ކަމަށް ރަންވީރު ބުންޏެވެ.
ސިންބާއިން ފެނިގެންދާނީ ސާރާކަމަށް މިއަދު ޔަގީންވެފައިވާއިރު މީގެ ކުރިން ވަނީ ރަންވީރާއި އެކު ފެންނާނެ ކަމަށް ލަފާކުރެވޭ ގިނަ އަންހެން ތަރިންތަކެއްގަ ނަން ވަނީ އާންމުވެފައެވެ. އޭގެ ތެރޭގައި ދީޕިކާ ޕަދުކޯން އާއި ޖާންވީ ކަޕޫރު އަދި ސޯޝަލް މީޑިއާ ބޭނުންކުރާ ގިނަ ބައެއްގެ ސަމާލުކަން ހޯދި ޕްރިޔާ ޕްރަކާޝް ވާރިޔާ ނަންވެސް ހިމެނެއެވެ.
