ރައީސް ޔާމީން އަނިޔާވެރިކަމަށް ބުނާއިރު އެކަން އެގޮތަށް ވަނީ ހިތްވަރުދޭން ބަޔަކު ތިބޭތީ: ނިޔާޒް
19 މާރިޗު 2018 | ހޯމަ 19:32ދިވެހި ފުލުހުންނާއި ސިފައިން ޤާނޫނާއި ޤަވާއިދުތައް ކިޔުމަށް އިލްތިމާސް ކުރަން
ފަލަސުރުހީ ޕްރޮގްރާމްގައި ނިޔާޒް ބައިވެރިވެވަޑައިގަންނަވަނީ
ރައީސުލް ޖުމްހޫރީއްޔާ އަބްދުﷲ ޔާމީން އަބްދުލް ޤައްޔޫމް އަނިޔާވެރިކަމަށް ގިނަ މީހުން ބުނާއިރު އެކަން އެގޮތަށް ހިނގަން މެދެވެރިވަނީ އެކަމަށްވެސް ހިތްވަރުދޭން ބަޔަކު ތިބޭތީ ކަމަށް އެމްޑީޕީގެ ޗެއަރޕާސަން ނައިބު އިދާރީ އަލީ ނިޔާޒް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ނިޔާޒް ވިދާޅުވީ އެތައް ބަޔަކު ރައީސް ޔާމީންގެ ހިދުމަތުގައި މި އަނިޔާވެރިކަން ދެމެހެއްޓުމަށްޓަކައި ތިބޭ ކަމަށާއި ރައްޔިތުން އެދޭ ގޮތަށް މަސައްކަތް ކޮށްދިނުމަކީ އެގޮތަށް ތިބޭ މީހުންގެ މަސްއޫލިޔަތެއް ކަމަށެވެ.
"ވަރަށް ގިނަ ފަހަރަށް އެބަ ބުނެވޭ ރައީސް ޔާމީން އަނިޔާވެރިވާ ވާހަކަ. ރައީސް ޔާމީން އަނިޔާވެރި އެކަމަކު އަނިޔާވެރި އެވެވެނީކީ އެތައް ބަޔަކު އެކަން ކޮށްދޭން ތިބޭތީ. އެތައް ބަޔަކު ރައީސް ޔާމީންގެ ޙިދުމަތުގައި މި އަނިޔާވެރިކަން ދެމެހެއްޓުމަށް ތިބޭތީ. ފުލުހުންވެސް އެގޮތަށް ތިބޭތީ އަދި ޖަލުތަކުގައި ޙިދުމަތް ކުރަން ތިބޭ މީހުންނަށްވެސް އެކަން އެގޮތަށް ކުރެވޭތީ. ހަމައެކަނި ރައީސް ޔާމީންގެ މައްސަލައެއް ނޫން މިއީކީ. މި އަނިޔާވެރިކަން ދެމެހެއްޓުމަށްޓަކައި މަސައްކަތްކުރާ އެންމެންގެވެސް މިކަމުން އަރައިގަތުމަށް ރައްޔިތުން މި ބޭނުންވާ ގޮތަށް މަސައްކަތް ކޮށްދިނުމަކީ" ނިޔާޒް ވިދާޅުވިއެވެ.
ދިވެހި ފުލުހުންނާއި ސިފައިން ޤާނޫނާއި ޤަވާއިދުތައް ކިޔުމަށް އިލްތިމާސް ކުރައްވާ ނިޔާޒް ވިދާޅުވީ އެ ޤަވާއިދުތައް އެނގިފައި އޮތުމުން މަތިން އަންނަ ގޯސް އޯޑަރުތަކަށް ނޫނެކޭ ބުނެވޭނެ ކަމަށެވެ.
ނިޔާޒް ވަނީ މިހާރު ހައްޔަރު ކުރެވިފައިވާ މީހުންނާއި ދެތޭރޭ ޖަލުން އަމަލުކުރަމުންދާ ގޮތާއި މެދު ކަންބޮޑުވުން ފާޅުކުރައްވާ ހިއުމަން ރައިޓްސް ކޮމިޝަނުން އެ ކޮމިޝަންގެ މައްސޫލިއްޔަތު ފުރިހަމައަށް އަދާނުކުރާތީ ފާޑު ވިދާޅުވެފައެވެ.
"ކުށެއްގެ ތުހުމަތުގައި ހުންނަ މީހަކަށް ބޭސްފަރުވާ ނުދިނުމާއި އަވީލާފައި ތިބުމާއި މިކަންކަން ކުރެވޭ ކަމަށްވާނަމަ އެކަންކަން ރަނގަޅު ނުވެއްޖެއްޔާ އެކަންކަން ކުރި މީހުންނާއި ދޭތެރޭ ފިޔަވަޅު އަޅަން އެ ބޭފުޅުން (ހިއުމަން ރައިޓްސް ކޮމިޝަން) އިން ވަޑައިގަންނަވަން ޖެހޭނެ. އަޅުގަނޑުމެން ޤަބޫލުކުރަން އެބޭފުޅުން އެކަން ކުރައްވަން ޖެހިލުން ވެވަޑައިގަންނަވާނެކަން. އެކަމަކު ޖެހިލުން ވެވަޑައިގަންނަވާކަށް ނުޖެހޭނެ. އެބޭފުޅުންނަކީ ދިވެހި ރައްޔިތުންގެ ފައިސާ އިން ބޮޑު މުސާރާ ދީގެން ތިބޭ ބަޔެއް" ނިޔާޒް ވިދާލުވިއެވެ.
ނިޔާޒް އިތުރަށް ވިދާޅުވީ އެ ކޮމިޝަންގެ މެމްބަރުންނަށް މަސްއޫލިއްޔަތުތައް އަދާ ނުކުރެވޭ ކަމުގައިވާނަމަ މަގާމުން އިސްތިއުފާ ދެއްވުމަށް އިލްތިމާސް ކުރައްވާ ކަމަށާއި އެކަން ކުރެވޭނެ ޤާބިލް މީހުން އެބަ ތިއްބެވި ކަމަށެވެ.
މި ސަރުކާރުން ހިންގަމުންދާ ގާނޫނާ ހިލާފު ކަންތައް ހުއްޓުވޭނެ ދުވަހެއް ވަރަށް އަވަހަށް އަންނާނެ ކަމަށް ނިޔާޒް ވިދާޅުވިއެވެ.
