މިހާރު ހިންގާ ޝަރީއަތްތައް ސައްހަވާނެ އެއްވެސް ގޮތެއް ނެތް: މަހުފޫޒް
އެގޮތަށް ޝަރީއަތްތައް ކުރިއަށްގެންދިއުމަކީ ޤާނޫނު އަސާސީވެސް އަދި ޤާނޫނުތައްވެސް ހުއްދަކުރާކަމެއް ނޫން
ޤާނޫނީ ވަކީލް މަހުފޫޒް ސައީދު -- ޝަރީއަތްތައް ކުރިއަށްގެންދާ ގުޅޭގޮތުން ވަނީ ކަންބޮޑުވުން ފާޅުކޮށްފަ
ޖިނާއީ އިޖުރާތުގެ ޤާނޫނު ސަސްޕެންޑް ކޮށްފައިވަނިކޮށް ޝަރީއަތްތައް ކުރިއަށް ނުގެންދެވޭނެ ކަމަށާއި، އަދި ހިންގާ އެއްވެސް ޝަރީއަތެއް ސައްހަ ނުވާނެ ކަމަށް ޤާނޫނީ ވަކީލް މަހުފޫޒް ސައީދު ވިދާޅުވެއްޖެ އެވެ.
ރައީސް އަބްދުﷲ ޔާމީންގެ ޤަރާރަކުން ފެބުރުއަރީ މަހުގެ ފަސް ވަނަ ދުވަހު އިއުލާން ކުރެއްވި ކުއްލި ނުރައްކަލުގެ ހާލަތުގެ ދަށުން ޖިނާއީ އިޖުރާތުގެ ޤާނޫނު ވަނީ ސަސްޕެންޑް ކޮށްފަ އެވެ. ޖިނާއީ އިޖުރާތުގެ ޤާނޫނު ސަސްޕެންޑް ކޮށްފައިވަނިކޮށް، ކުއްލި ގޮތަކަށް އުއްތަމަ ފަނޑިޔާރު ހިމެނިވަޑައިގަންނަވާގޮތަށް ބައެއް ބޭފުޅުންގެ ޝަރީއަތްތައް ކްރިމިނަލް ކޯޓުގައި ފަށާފައިވާއިރު، އެ ޝަރީއަތްތައް ކުރިއަށް ގެންދަވަނީ ލިޔެވިފައިވާ އިޖުރާތެއްގެ ދަށުން ނޫން ކަމަށާއި، އެ ޝަރީއަތްތައް ކުރިއަށްގެންދަވަނީ ގާޒީއަށް ފެނިވަޑައިގަންނަވާގޮތެއްގެ މަތިންކަމަށް ކްރިމިނަލް ކޯޓުގެ ގާޒީ ވަނީ ވިދާޅުވެފައެވެ.
ލިޔެވިފައިވާ އިޖުރާތެއް ނެތި، ގާޒީއަށް ފެނިވަޑައިގަންނަވާގޮތަކަށް ޝަރީއަތްތައް ކުރިއަށް ނުގެންދެވޭނެކަން ފާހަގަކޮށް ގުޅިފައިވާ ސިޔާސީ ޕާޓީތަކުން ބޭއްވި ނޫސްވެރިންގެ ބައްދަލުވުމުގަައި ޤާނޫނީ ވަކީލް މަހުފޫޒް ސައީދު ވިދާޅުވީ އެގޮތަށް ޝަރީއަތްތައް ކުރިއަށް ގެންދިއުމަކީ ޤާނޫނު އަސާސީ ވެސް އަދި ޤާނޫނުތައް ވެސް ހުއްދަކުރާކަމެއް ނޫން ކަމަށެވެ. އެހެންކަމުން ޝަރީއަތްތައް ކުރިއަށް ނުގެންގޮސް މިހާރުން މިހާރަށް ހުއްޓާލަންޖެހޭ ކަމަށާއި، އިޖުރާތުގެ ޤާނޫނު ނެތި ސަރީއަތްތައް ކުރިއަށް ނުގެންދެވޭނެ ކަމަށް ގާޒީ ވިދާޅުވާންޖެހޭނެ ކަމަށް މަހުފޫޒް ވިދާޅުވި އެވެ. އޭނާ ވިދާޅުވި ގޮތުގައި މިހާރު ކުރިއަށްގެންދާ ޝަރީއަތްތަކަކީ އެއްވެސް ގޮތަކަށް ސައްހަވާނެ ޝަރީއަތްތަކެއް ނޫނެވެ.
"ޤާނޫނެއްގައި ޝަރީއަތްކުރެވޭނެ ވަކިގޮތެއް ބަޔާންކޮށްފައިނެތީމައި އޭގެ މާނައަކީ އެ ފަނޑިޔާރަކަށް އެ ޝަރީއަތް ހިންގޭނެ ހަމަ އެއްވެސް ގޮތެއް ނެތޭ. ދެންޖެހޭނީ އެ އުސޫލުތައް އަބުރާ ރުޖޫއަވަންދެން އެ ޝަރީއަތްތައް މަޑުޖައްސާލަން." ޤާނޫނީ ވަކީލް މަހުފޫޒް ސައީދު ވިދާޅުވި އެވެ.
އޭގެއިތުރުން އެ ނޫސްވެރިންގެ ބައްދަލުވުމުގައި މަހުފޫޒް ވަނީ ހައްޔަރުގައި ތިބި ބޭފުޅުންނާއިމެދު ކަންތައްތައް ކުރެވޭގޮތާއި ގުޅޭގޮތުން ކަންބޮޑުވުން ފާޅުކުރައްވާފަ އެވެ. އެގޮތުން ހީލަތްތެރިގޮތެއްގައި ކްރިމިނަލް ކޯޓަށް ވައްދައި، ޖުމްހޫރީ ޕާޓީގެ ނައިބް ލީޑަރު އަބްދުﷲ ރިޔާޒް ޝަރީއަތް ނިމެންދެން ބަންދުގައި ބެހެއްޓުމަށް އެ ކޯޓުން ނިންމާފައިވާ ކަމަށް މަހުފޫޒް ވިދާޅުވި އެވެ. އަދި އަބްދުﷲ ރިޔާޒް މިހާރު މާފުށީ ޖަލަށް ބަދަލުކޮށްފައިވާއިރު އެކަން އެގޮތަށް ނުކުރެވޭނެކަމަށް ވެސް މަހުފޫޒް ވިދާޅުވި އެވެ.
ފާރިސް މައުމޫންގެ ބަންދާއި ގުޅޭގޮތުން ވާހަކަ ދައްކަވަމުން މަހުފޫޒް ވިދާޅުވީ މިދިޔަ އަހަރުގެ ޖުލައި މަހުން ފެށިގެން ފާރިސް މައުމޫން ބަންދުގައި ގެންގުޅެނީ އެއްވެސް އުސޫލެއް ނެތި ކަމަށެވެ. އެގޮތުން ފާރިސް މައުމޫނާއި ދެކޮޅަށް އެއްވެސް ހެއްކެއް ވެސް ނެތް ކަމަށާއި، ފާރިސް މައުމޫން ބަންދުގައި ގެންގުޅެނީ ޤާނޫނުތަކާއި ކަނޑައެޅިގެން ހިލާފަށް ކަމަށް މަހުފޫޒް ވިދާޅުވި އެވެ.
"މީހަކު ބަންދުކުރެވޭނެ ގޮތް ޤާނޫނު އަސާސީގައި ވަނީ ބަޔާންކޮށްފައި. އެއީ އެ މީހެއްގެ މައްޗަށް ތުހުމަތުކުރެވޭ މައްސަލައިގައި ކާފީ ހެކިތަކެއް ހުރެފައި، އަދި އެ މީހެއްގެ ސަބަބުން މުޖުތަމައުއަށް ނުރައްކާވެދާނެތީ ވެސް އަދި އެ މީހަކު ދޫކޮށްލައިފިކަމުގައިވާނަމަ ތުހުމަތުކުރެވޭ މައްސަލައިގެ ހެކި ނައްތާލާފާނެތީވެ" މަހުފޫޒް ސައީދު ވިދާޅުވި އެވެ.
