ކޮންމެ ރައްޔިތެއްގެ ވާޖިބަކަށް ވެފައިވަނީ މުސްލިމް ދައުލަތެއްގެ ސިފަ ގެނައުން: އަހުމަދު ޢަބްދުﷲ

ދިވެހި ކޮންމެ ރައްޔިތެއްގެ މިއަދުގެ އެންމެ އިސް ވާޖިބަކަށް ވެފައިވަނީ މުސްލިމް ދައުލަތެއްގެ ސިފަ ޤައުމަށް ގެނައުން ކަމަށް އެމްޑީޕީގެ ޗެއަރޕާސަންގެ ނައިބު މާލީ އަހުމަދު ޢަބްދުﷲ ވިދާޅު ވެއްޖެއެވެ. އަހުމަދު ޢަބްދުﷲ މިހެން ވިދާޅުވީ ރާއްޖެ ޓީވީން ހޮނިހިރު ދުވަހުގެ ރޭ ގެނެސްދިން ފަލަ ސުރުޚީ ޕްރޮގްރާމްގައި ވާހަކަ ދައްކަވަމުންނެވެ.

މިދިޔަ ހުކުރު ދުވަހުގެ ރޭ ވަރަށް ގިނަ އަދަދެއްގެ ބަޔަކު މުޒާހަރާގައި ބައިވެރިވިކަން ފާހަގަކުރައްވަމުން އަހުމަދު ވިދާޅުވީ އެހާ ގިނަ މީހުން މަގުތަކަށް ނުކުމެފައި ވަނީ ސަރުކާރާމެދު ރައްޔިތުން ނުރުހޭކަން ދެއްކުމަށް ކަމަށާއި އެކަމުގެ އަޑު ސަރުކާރަށް އިއްވުމަށް ކަމަށެވެ.

މުޒާހަރާއަށް ދިޔައީ އެންމެ 40 ހަކަށް މީހުން ކަމަށް ފޮނަދޫ ދާއިރާގެ މެންބަރ ޢަބްދުއްރަހީމް ވިދާޅުވި ވިދާޅުވުމަށް އިޝާރާތް ކުރައްވާ އަހުމަދު ވިދާޅުވީ ޕީޕީއެމްގެ ބޭފުޅުންނަށް އަދަދު ކިޔަން ނޭނގުމާއި ގުނަން ނޭނގުން އެއީ އިދިކޮޅު ފަރާތްތަކުން ކުރާނެ ކަމެއް ނޫން ކަމަށާއި އެއަށް ވުރެ ބޮޑަށް ކަންބޮޑުވަނީ ޤައުމުގެ މިހާލަތާމެދު އަދި ޤައުމަށް މިވަމުންދާ ގޮތާމެދު އެއްވެސް ވަރަކަށް ސަރުކާރުން ނުވިސްނާތީ ކަމަށެވެ.

އަހުމަދު ވިދާޅުވީ ފެނިގެން މިދަނީ މިސަރުކާރު ކުޑަކަކޫ މައްޗަށް ތިރިވެފައިވާ ތަން ކަމަށާއި ނަމަވެސް ފެނިގެންދަނީ ގޮތްދޫ ނުކުރާ ވިޔާނުދާ ޢަމަލްތަކެއްގެ ތެރޭގައި ޝިކާރަވެރިވެފައިވާ ބަޔަކަށް ވީތީ ގޮތް ދޫނުކޮށް ތިބެނީ ކަމަށެވެ.

އަހުމަދު ވިދާޅުވީ މިއަދު މިހިނގާ ކަންތައްތަކަކީ ޚުދު އެބޭފުޅުންވެސް އަދި އެބޭފުޅުންނާ އެންމެ ގާތް ބޭފުޅުންވެސް އެކަމަށް ތާއީދު ކުރާ ކަންތައްތަކެއްކަން ނުވަތަ އެކަމާ ރުހިގެންތިބި ކަންތައްތަކެއް ނޫންކަން އެނގޭ ކަމަށެވެ.

"ރޭވެސް (ހުކުރު ދުވަހުގެރޭ) މިސަރުކާރު ވަނީ ކުޑަކަކޫ މައްޗަށް ތިރިވެފައި. ހަމަ ގޮތްދޫ ނުކުރާން ތިބެނީ،" އަހުމަދު ވިދާޅުވިއެވެ.

އަހުމަދު ވިދާޅުވީ ގުޅިފައިވާ ޕާޓީތަކުން ހުއްޓުވަން އުޅެނީ އެ ނާތަހުޒީބީ ސިފަތައް ކަމަށާއި ހުއްޓުވަން އުޅެނީ ދައުލަތް ޚަރާބު ކުރުން ކަމަށެވެ.

"ދިވެހި ކޮންމެ ރައްޔިތެއްގެ މިއަދުގެ އެންމެ މުހިއްމު ޤައުމީ ވާޖިބަކަށް ވެފައިވަނީ މުސްލިމް ދައުލަތެއްގެ ސިފަ ގެނައުމާއި މިދައުލަތުން ކުރަމުން ގެންދާ ނާތަހުޒީބް ހަޑިމުޑުދާރު ޢަމަލްތައް ހުއްޓުވުން. ޖުމްލަ ގޮތެއްގައި ދަންނަވަންޏާ މުޅި ދައުލަތް ޚަރާބުކުރުން ހުއްޓުވުން. ވެރިކަމުގެ ތެރޭގައި ހިންގަވާ ނާޖާއިޒް ކަންތައްތައް ހުއްޓުވުން. ނުހައްގުން މީހުންނަށް ކުރަމުންގެންދާ ގޯނާ ތަކާއި އަނިޔާތައް ހުއްޓުވުން. ދައުލަތުގެ ޚަޒާނާއިން އެކިގޮތްގޮތުން ގެއްލެމުންދާ ފައިސާތައް ގެއްލުން ހުއްޓުވުން. ބޭއިންސާފް ގޮތްގޮތައް މީހުން ގޮޅިތަކަށް ލައިގެން ރަހީނުކޮށްގެން ގެންގުޅުން ހުއްޓުވުމަށް" އަހުމަދު ޢަބްދުﷲ ވިދާޅުވިއެވެ.