ސަރުކާރަށް ކޮޅު ބެދުމުގެ ފެހި ސިގްނަލް

ރައީސް ޔާމީންގެ ސަރުކާރަކީ އާރާއި ބާރުގައި ވެރިކަން ކުރަމުން އައި ސަރުކާރެކެވެ. ބޮޑު ސިންގާ ކޯލިޝަނަކުން ގެނައި އެސަރުކާރަށް ލިބުނު މަޖިލީހުގެ މެޖޯރިޓީއާއެކު މުޅި ޤައުމު އޮތީ ރައީސް ޔާމީނަކަށް ހިތަކަށް ލިބިދީފައެވެ. ޤާނޫނު އަސާސީގައި ތިންބާރު ވަކިން އޮތްކަމަށް ލިޔެފައި އޮތަސް ހިންގަމުން އައީ އެ ބީދައަކުން ނޫނެވެ. މަޖިލީހުގައި އޮތް މެޖޯރިޓީގެ ސަބަބުން މިނިވަން މުއައްސަސާތަކާއި ޖުޑިޝަރީގެ ފައްސިޔައިގާ ރައީސް ޔާމީން ގެންދެވީ ހިތުހުރިކަމެއް ހިތުހުރި ގޮތަކަށް ކުރައްވަމުންނެވެ. ޤާނޫނީ ކުލަޖައްސަން ކޮންމެ ކަމެއް ވެސް ކުރެއްވީ މަޖިލީހުން ޤާނޫނަށް ގެނައި ބަދަލާއެކުގައެވެ. ޤާނޫން އަސާސީއަށް ގެނައި އިސްލާހުގެ ތެރެއިންނެވެ. އޭގައި ދެކޮޅު ނުޖެހުނަސް ކޯޓުތަކުން ނެރުނީ މުޅިން ސަރުކާރު ބޭނުންވާހާ އަމުރުތަކެކެވެ. ފަހަރުގައި އެއީ ބޮޑު އިއްތިފާގަކަށް ވެސް ވެދާނެއެވެ.

އެގޮތުން ކުރަމުން އައި ބާރުގަދަ ވެރިކަމާމެދު މީހުން ހިތްހަމަ ނުޖެހުނީ ވައްކަމާއި ކޮރަޕްޝަން ހައްދުފަހަނައަޅާގޮސް މުޅި ޤައުމު ދަރަނިވެރިވާން ފެށީމައެވެ. އެކަމާ ދެކޮޅަށް ޚިޔާލުފާޅުކުރާ ހުރިހާ ލީޑަރުން ހައްޔަރުކޮށް ސަރުކާރާ ދެކޮޅަށް ބަހެއް ވެސް ބުނެލާ ކޮންމެ މީހަކު ޖަލުގެ ތޭރިތަކުގެ ފަހަތަށް ކޮއްޕާލާތީއެވެ.

އެކަމާ ދެކޮޅަށް ރައްޔިތުން ނުކުމެއްޖެކަން ހާމަކޮށްދިނީ އެކަންކަން ކުރަމުން އައި ސަރުކާރަށް ވާގިވެރިވި މަޖިލީސް މެންބަރުންނަށް ހަމަވިސްނި އިސްލާހީ މަސައްކަތާ ގުޅިވަޑައިގެންނެވި ހިސާބުންނެވެ. މަޖިލިސް އެފުށް މިފުށަށް ޖަހާލި ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމަށް ވެއްދި 45 މެންބަރުންގެ ސޮޔާއެކުގައެވެ.

އެހާހިސާބުން ސަރުކާރު ޤާނޫނީ ޗާޓުން ބޭރަށް ނުކުމެއްޖެ ކަމަށް ޤާނޫނީ ވަކީލުން ބުނަން ފެށިއެވެ. މަޖިލީހުގެ ޤަވާއިދަށް ގެނައި ކުއްލި ބަދަލުތަކުންނެވެ. މަޖިލިސް ހުއްޓުވާލުމުންނެވެ. މެންބަރުންގެ ގޮނޑިތައް ގެއްލުވާލައިގެންނެވެ.

އެރާޅުން ސަލާމަތް ނުވެވި އުޅެނިކޮށް ދެން އެނެގީއެއަށް ވުރެ ބޮޑު ރާޅެކެވެ. ސަރުކާރުން ހީނުކުރާ ވަރުގެ އަމުރެއް ރާއްޖޭގެ އެންމެމަތީ ކޯޓުން ނެރެފިއެވެ. ސަރުކާރު އެއްކޮށް ކުޑަކަކޫ ޖައްސާލިއެވެ. އިސާހިތަކު ޤާނޫނަކާ ޤާނޫން އަސާސީއެއް ދޫކޮށް ސަރުކާރު ހިތުހުރި ގޮތަކަށް ކަންކަން ކުރަން ފެށިއެވެ. ކޯޓު އަމުރު ތަންފީޒް ނުކޮށް ފުލުހުންނާ ސިފައިން ލައްވާ ސަރުކާރު ނޫން ބަޔަކު ނެތްކަމަށް އިއްުލާން ކޮށްފިއެވެ. ޤާނޫން ދަންނަ ކޮންމެ މީހަކުވެސް ބުނާ ފަދައިން ޤާނޫން އަސާސީއާ ޚިލާފް ކުއްލި ނުރައްކަލުގެ ޙާލަތެއް އިއުލާން ކުރިއެވެ. ރައްޔިތުން ހައްމަތަ ކުރުމަށް ޖަހާލި ވަރުގަދަ ދަލެއްގެ ގޮތުގައެވެ.

ރައްޔިތުން އެކަމަކަށް ބޮލެއް ނުލެނބިއެވެ. ސިލްސިލާކޮށް ކޮންމެ ރެއަކުވެސް މަގުމެދަށް އެއްވާން ފެށިއެވެ. ސަރުކާރާމެދު ނުރުހޭކަން ހާމަކުރިވަރަކަށް ސަރުކާރުގެ ބޮޑުން އަރާ ދެއިރު ދެދަޅައަށް ކޮސްގޮވަން ފެށިއެވެ. ދީނާ ޤައުމޭ، ދިވެހިންގެ ވަހުދަތޭ ކިޔައިގެން ވާހަކަ ދެއްކިވަރަކަށް އިތުރަށް ފަޟީހަތްވެ ލޭކެކޭ ރައްޔިތުން އިތުރުވާން ފެށިއެވެ. ސަލާމަތީ ޚިދުމަތަތްކަށް ވާނުވާ އެނގި ޤާނޫނާ ޚިލާފަށް ނުނުކުންނާން ކުސަކިޔަން ފެށިއެވެ. އެޔެއް މިޔެއް ނޭނގި ފުލުހުންނާ ސިފައިންގެ ތެރެއިން އެތޯ ހެވީ މިތޯ ހެވީ ނޭނގި އޭގެ ތެރެއިންވެސް އެތައް ބަޔަކު ހައްޔަރު ކޮށްލިއެވެ. ނުވިތާކަށް އެއްބަޔަކު ވަޒީފާއިން ކަނޑާ އެއްލާލިއެވެ. ހައްޔަރުވާންފެށި ގިނަ މީހުންގެ އާއިލާތަކުގެ ބަދު ދުއާއާއި ގޭގައި ނުތިބެ ނުކުންނާންފެށުމާ ބޭރުދުނިޔޭގެ ފިއްތުންތަކާ ސަރުކާރު ދުވަހެއް ދުވަހަކަށް ހިމަވާން ފެށިއެވެ. ސަރުކާރު ދިފާއުގައި މަޖިލިސް މެންބަރުންނާއި ވަޒީރުން ނިދި ނަގާލާފައި ދަންވަރު މީހުން ނިދާ ފައިހިލަވަޅު އޮބޭއިރުވެސް ޓީވީތަކަށް އަރާ ރައްޔިތުން ހައްލަން އުޅެން ޖެހުނެވެ.

ކޮންމެއަކަސް ރައްޔިތުންގެ ދޫދިނުމެއްނެތި ކުރިން ނުދެވޭ ހިސާބަށް މިހާރު އެވަނީ ރައްޔިތުން ނިކުމެފައެވެ. ދެންވާ ހިލިދާނެއޭ ހީވެ އެވަނީ ޖުމްހޫރީ މައިދާނަށް ނުކުމެފައެވެ. ގްރީން ޒޯނަށް ވައިވެސް ނޭޅެވޭވަރުގެ ބަޔަކަށް އެތާއެތެރޭގައި ފައިއަޅާލެވުމަކީ ލައްކަ ވާހަކައެވެ. 40 ހަކަށް މީހުންނައިގެން މަގުތަކުގައި ލައިހޫރެނިއްޔޭ އަދުރޭ ބުންޏަސް 140 މީހުންގެ ރެކޯޑް އަދަދަކަށް މީހުން ހައްޔަރުކުރީމާ އެދައްކާލަނީ ލައްކަ ކުޅިސަމައެވެ. އެސްއޯއީ އެދަނީ ނިމެމުންނެވެ. ވިލާތުގެ އިއްތިހާދުން އަޅާ ފިޔަވަޅު އެވަނީ އަތްދަމާލީމާ އަތްޖެހޭހިސާބުގައެވެ. ޚަރަދުކުރާ ވިޔަފާރިވެރިންގެ ވަރަ ބިނދިދާނޭކަމުގެ ކޮޅުމަތި އެވަނީ ފެންނާން ފަށާފައެވެ. ކިތައްމެ ނުބެހެން ހުއްޓަސް އަމިއްލަ ވަތްގަނޑަށް އެނގުން ނުވާން ފެށީމާ އެވެރިންނަކަށްވެސް ހަމަހިމޭނުންނެއް ނުތިބެވޭނެއެވެ. ރައްޔިތުން އެދަނީ ގަދަވަމުންނެވެ. ކަށިން ހިތްވަރު ނެރެގެން އެކުރާ މަސައްކަތާއެކު ސަރުކާރަށް އޮތް މަގު ހަނިވެ އެދަނީ ހަމަ ރަނގަޅަށް ވެސް ކޮޅުބެދެމުންނެވެ.