އޭޕްރީލް މަހު ރާއްޖެ އަށް ޝެޑިއުލްކޮށްފައިވާ ހޮންގ ކޮންގ އެއާލައިންސްގެ ގިނަ ފްލައިޓްތަކެއް ކެންސަލްކޮށްފި އެވެ.

ރާއްޖެ އެމްވީއަށް އެނގިފައިވާ ގޮތުގައި ފްލައިޓްތައް ކެންސަލްކުރީ ކުއްލި ނުރައްކަލުގެ ހާލަތު އިއުލާނުކޮށްފައި އޮތުމާއެކު، ޓޫރިސްޓުން ލިބުން ދަތިވެގެންނެވެ.  

ހޮންގ ކޮންގ އެއާލައިންސްގެ ރާއްޖޭގެ އެޖެންޓް، ވޮޔޭޖަސް މޯލްޑިވްސްގެ އޮފިޝަލަކު ވިދާޅުވި ގޮތުގައި އޭޕްރީލް މަހަށް ތާވަލްކޮށްފައިވާ ފްލައިޓްތަކެއް ކެންސަލްކުރީ ރާއްޖޭގެ ސިޔާސީ ހާލަތު ހުރި ގޮތުންނާއި ވިޔަފާރީގެ ގޮތުން އެ އެއާލައިނަށް ގެއްލުންތައް ލިބެމުންދާތީ އެވެ.

ޗައިނާއިން ރާއްޖެ އަންނަ އެހެން ބައެއް އެއާލައިންތަކުގެ ގިނަ ފްލައިޓްތަކެއް ކެންސަލްކޮށްފައިވެ އެވެ.

ކުއްލި ނުރައްކަލުގެ ހާލަތުގެ ސަބަބުން ރާއްޖެ އަންނަ ޓޫރިސްޓުންގެ އަދަދު ދަށްވެ، އިގްތިސޯދަށް ވަރަށް ބޮޑު ގެއްލުމެއް ލިބެމުންދާ ކަމަށް ވިޔަފާރިވެރިން ބުނެ އެވެ.

ކުރީގެ ރައީސް މުހައްމަދު ނަޝީދާއެކު، ސިޔާސީ މަގުސަދުގައި ހައްޔަރުކޮށް ހުކުމްކޮށްފައިވާ ނުވަ ބޭފުޅަކު މިނިވަންކުރުމަށާއި ރައްޔިތުންގެ މަޖިލީހުގެ 12 މެމްބަރުންގެ ގޮނޑި ނުގެއްލޭ ކަމަށް ކަނޑައެޅި ސުޕްރީމް ކޯޓުގެ ހުކުމް ތަންފީޒުނުކޮށް، ކުއްލި ނުރައްކަލުގެ ހާލަތު އިއުލާނުކުރީ ފެބްރުއަރީ 5 ވަނަ ދުވަހުގެ ރޭގަ އެވެ.

ކުއްލި ހާލަތު އިއުލާނުކޮށް ކުރީގެ ރައީސް މައުމޫނު އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދުގެ އިތުރުން ރައްޔިތުންގެ މަޖިލީހުގެ މެމްބަރުންނާއި ސިޔާސީ ޕާޓީތަކުގެ ލީޑަރުންނާއި ގިނަ އަދަދެއްގެ އެކްޓިވިސްޓުން ވަނީ ހައްޔަރުކޮށްފަ އެވެ.

ކުއްލި ހާލަތު އިއުލާނު ކުރީ ވެސް، މުއްދަތު ދިގު ދެންމީ ވެސް ގާނޫނާ ހިލާފަށް ކަމަށް ގުޅިފައިވާ ސިޔާސީ ޕާޓީތަކުން ބުނެ އެވެ. އަދި ދުނިޔޭގެ ގިނަ ގައުމުތަކުން ގޮވާލަމުން ދަނީ ކުއްލި ނުރައްކަލުގެ ހާލަތު އުވާލައި، ސުޕްރީމް ކޯޓްގެ ފެބްރުއަރީ 1 ގެ އަމުރު ތަންފީޒުކުރުމަށެވެ.