ރައީސް މައުމޫނުގެ ތަހްގީގު ހިންގަނީ ގާނޫނީ ވަކީލުންނަށްވެސް ދޭން ޖެހޭ ފުރުސަތު ނުދީ: ދިފާއީ ވަކީލުން
12 މާރިޗު 2018 | ހޯމަ 03:56ރައީސް މައުމޫނާއި ހޯމަ ދުވަހު ވަނީ ސުވާލުކޮށްފައި
ކުރީގެ ރައީސް މައުމޫނު އަބްދުލް ގައްޔޫމް - އެމަނިކުފާނު ހުންނެވީ ދޫނިދޫގައި ބަންދުގައި
ކުރީގެ ރައީސް މައުމޫނު އަބްދުލް ގައްޔޫމާމެދު ކުރެވޭ ތުހްމަތުތަކުގެ ތަހްގީގު ހިންގަމުންދަނީ ކަނޑައަޅާފައިވާ ގަވައިދާ އެއްގޮތައް ގާނޫނީ ވަކީލެއްގެ ފުރުސަތު ނުދީ ކަމަށް އެމަނިކުފާނުގެ ގާނޫނީ ވަކީލު މުހައްމަދު ފައިސަލް ވިދާޅުވެއްޖެ އެވެ.
ކުރީގެ ރައީސް މައުމޫނާއި އެމަނިކުފާނުގެ ދަރިކަލުން އަހްމަދު ފާރިސް މައުމޫނާއި އަދި ދަނބިދަރިކަލުން އަހްމަދު ނަދީމްގެ ގާނޫނީ ވަކީލުން އާދިއްތަ ދުވަހުގެ ރޭ އެންދެރިމާގޭގައި ބޭއްވި ނޫސްވެރިންގެ ބައްދަލުވުމެއްގައި ފައިސަލް ވަނީ ރައީސް މައުމޫނާ ފުރަތަމަވެސް ސުވާލެއް ކޮށްފައިވަނީ ހައްޔަރުކޮށްފައި ހުންނަވާތާ 33 ދުވަސްފަހުންކަން ފާހަގަކުރައްވާފަ އެވެ. އަދި ވިދާޅުވީ ފުލުހުންގެ އާންމު ގަވައިދުގައި ބުނެފައިވާ ގޮތުން ބަންދުގައި ހުންނަ މީހާއަށް ތަހްގީގުގައި ސުވާލު ކުރުމުގެ 18 ގަޑިއިރު ކުރިން ފުރުސަތު ދޭން ޖެހޭނެ ކަމަށެވެ. އެހެން ނަމަވެސް ރައީސް މައުމޫނާ ސުވާލު ކުރުމުގެ ކުރިން ވަކީލުނަށް އެ ފުރުސަތު ނުދޭއިރު ކުއްލި ނުރައްކަލުގެ ހާލަތުގައިވެސް ފުލުހުންގެ އާންމު ގަވައިދު ސަސްޕެންޑްކޮށްފައިނުވާކަމަށް ފައިސަލް ވިދާޅުވި އެވެ.
"ހާއްސަ ހާލަތުގައި އަމަލުކުރަންވީ ގޮތްވެސް އެއާ ވިދިގެން އެބަ އާދޭ. ހާއްސަ ހާލަތުގައިވެސް މި އޮންނަނީ 10 ގަޑިއިރުކުރިން އެމީހެއްގެ ވަކީލަށް ތަހްގީގު އޮންނާނެތަނާއި ވަގުތާ މި ހުރިހާ ކަމެއް އަންގަން. މިއީ ފުލުހުން މިހާރުވެސް އަމަލު ކުރަން ޖެހޭނެ ގަވައިދެއް، އަމަލު ކުރަން ޖެހޭނެ އުސޫލެއް. އެހެން ނަމަވެސް އަޅުގަނޑުމެން ހިތާމައާއެކު ފާހަގަ ކުރަނޫ އަލްއުސްތާޛު މައުމޫނު އަބްދުލް ގައްޔޫމްގެ ތަހްގީގު އިއްޔެ ފެއްޓެވިއިރުގައި އެ ތަހްގީގު އޮންނާނެކަން ހަވީރު 4.00 ގައި އޮންނާނެކަން އަޅުގަނޑުމެނަށް އަންގާފައިވަނީ މެންދުރުފަހު އެކެއްވެސް ޖެހިފަހުން. އެހެންވީމަ ތިން ގަޑިއިރުވެސް ނުލިބޭ އަޅުނގަނޑުމެނަށް ތައްޔާރުވުމަށް،" ފައިސަލް ވިދާޅުވި އެވެ.
އޭނާ ވިދާޅުވީ އެތައް ބައިވަރު ތުހްމަތުތަކެއް ރައީސް މައުމޫނުގެ އިސްތަށިފުޅުގައި އަޅުއްވާފައިވާއިރު އެ ތަހްގީގަށް ތައްޔާރުވުމަށް ވަކީލުނަށް އެކަށީގެންވާ ވަގުތު ދޭން ޖެހޭނެ ކަމަށެވެ. 15 މިނެޓަށް ދެމިގެންދިޔަ ރައީސް މައުމޫނުގެ ތަހްގީގުގައި އެމަނިކުފާނު ވަނީ ޖިނާއީ އެއްވެސް ކުށެއް ކުރައްވާފައިނުވާނެ ކަމަށާއި ރަހީނުކުރައްވައިގެން ގައިރު ގާނޫނީ ބަންދެއްގައި ބަހައްޓައިގެން ކުރައްވާ ތަހްގީގަކަށް އެއްބާރުލުން ނުދެއްވާނެ ކަމަށް ވިދާޅުވެފައި ކަމަށް ވެސް ފައިސަލް ވިދާޅުވި އެވެ.
މީގެ އިތުރުން ރައީސް މައުމޫނު ދެކިވަޑައިގެންނެވީ އެމަނިކުފާނާ ސުވާލެއް ނުކޮށް އެހާ ދުވަހު ބެހެއްޓެވީ ސިކުނޑިއަށް އަނިޔާއެއް ދިނުމުގެ ބޭނުމުގައި ކަމަށް ވެސް ފައިސަލް ވިދާޅުވި އެވެ.
"އެމަނިކުފާނުގެ ހިތްވަރާއަޒުމަށް އޭގެ ސަބަބުން އަސަރުކުރުވާނެ ކަމަށް ފުލުހުންނަށް ފުލުހުނަށް ފާހަގަ ކުރެވޭތީ ނުވަތަ ކުރެއްވި ކަމެއްގެ ގޮތުގައި އެމަނިކުފާނު ގަބޫލު ކުރައްވަނީ،" ފައިސަލް ވިދާޅުވި އެވެ.
ރައީސް މައުމޫނުގެ މައްޗަށް ދައުވާ ކުރަން ފޮނުވިކަމަށް މީޑިޔާތަކުގައި ފުލުހުން ވިދާޅުވާއިރު ދެން ކުރަނީ ކޮން ތަހްގީގެއްތޯވެސް ރައީސް މައުމޫނު ސުވާލު އުފެއްދެވި ކަމަށް ވެސް ފައިސަލް ވިދާޅުވި އެވެ. ބަންދުގައި ތިބޭ މީހުންނާ ބައްދަލުކުރުމަށް ވަކީލުނަށް 30 މިނެޓްގެ ފުރުސަތެއް މިހާރު ދެމުންދާއިރު އެއީ ގިނަ ތުހްމަތުތަކެއް ކުރެވޭ މީހަކަށް އެކަށީގެންވާ ވަގުތެއް ނޫން ކަމަށް ފައިސަލްވެސް ވަނީ ފާހަގަ ކުރައްވާފަ އެވެ.
