އެމްޑީޕީގެ އޮފީހަށް ސްޕެޝަން އޮޕަރޭޝަން (އެސްއޯ) ފުލުހުން ވަދެ، އެ ޕާޓީގެ ގައުމީ މަޖިލީހުގެ ބަޔަކު ހައްޔަރު ކޮށްފި އެވެ.
އެމްޑީޕީގެ އިސްވެރިންތަކެއް ހައްޔަރު ކުރަން އުޅޭކަމުގެ އަޑުތަކެއް ފެތުރިފައިވަނިކޮށް ބުރާސްފަތި ދުވަހުގެ މެންދުރު މިވަނީ އެސްއޯ ފުލުހުންތަކެއް އެމްޑީޕީގެ އޮފީހަށް ވަދެފައެވެ. އަދި އެވަގުތު އެ އޮފީހުގައި ތިއްބެވީ ބައެއް ފަރާތްތަކުގެ ތެރޭގައި ހިމެނޭ ރައްޔިތުންގެ މަޖިލީހުގެ މެމްބަރުކަން ކުރިން ކުރެއްވި އިލްޔާސް ލަބީބުއާއި ރައްޔިތުންގެ މަޖިލީހުގެ މެމްބަރު އީވާ އަބްދުﷲގެ ފިރިކަލުން އަހުމަދު ޝާހިދު (ސާބެ) އާ އެމްޑީޕީގެ ގައުމީ މަޖިލީހުގެ ހަސަން މުހައްމަދު ވަނީ ހައްޔަރު ކޮށްފައެވެ.
ސޯސަން މަގުގައި ހުންނަ އެމްޑީޕީގެ އޮފީހަށް ވަދެ މިހާތަނަށް ތިން މީހަކު ހައްޔަރުކޮށްފައިވާއިރު، މީގެކުރިން ވަނީ އެޕާޓީގެ ނައިބު ރައީސް މުހައްމަދު ޝިފާޒުއާއި ގައުމީ މަޖިލީހުގެ މެމްބަރުންތަކެއް ހައްޔަރު ކޮށްފަ އެވެ.
އެނގިފައިވާ ގޮތުގައި އެސްއޯ ފުލުހުން އެމްޑީޕީގެ އޮފީހަށް ވަދެ އެ މީހުން ހައްޔަރު ކުރީ ސްޓޭޓް އޮފް އެމަޖެންސީގެ ދަށުން ނެވެ.