ރަސްފަންނު ކައިރީގައި އަޅާ ޓަވަރުތަކުގެ ބުކިންގް ހެދުމުގެ ފުރުސަތު ހުޅުވާލައިފި
ބުކިންގް ފުރިހަމަ ކުރުމަށްފަހު ސޭލްސް އެންޑް ޕާޗޭސް އެގްރީމަންޓް ހަދާ 20 ފަރާތަކަށް ވަރަށް ހާއްސަ އިނާމްތަކެއް އެކުލެވިގެންވޭ
ނޫސްވެރިންގެ ބައްދަލުވުމުގެ ތެރެއިން
ރަސްފަންނު ކައިރީގައި އަޅާ 28 ބުރީގެ ދެވަނަ ޓަވަރާއި ތިންވަނަ ޓަވަރުގެ ބުކިންގް ހެދުމުގެ ފުރުސަތު ކޮރަލް ބޮލިވާޑް ކުންފުނީގެ ފަރާތުން ހުޅުވާލައިފިއެވެ.
އެ ކުންފުނިން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ އެސިސްޓަންޓް ސޭލްސް އެންޑް މާކެޓިންގް މެނޭޖަރު އައިޝަތު ޝިމާދާ ވިދާޅުވީ އެޅުމަށް ހަމަޖެހިފައިވަނީ ހަތަރު ޓަވަރު ކަމަށާއި އޭގެ ތެރެއިން ތިން ޓަވަރުގައި ހައުސިންގް ޔުނިޓްތައް އެޅުމަށް ހަމަޖެހިފައިވާއިރު އަނެއް ޓަވަރަކީ ކޮމާޝަލް ބޭނުމަށް ދޫކުރާ ޓަވަރެއް ކަމަށެވެ.
މިވަގުތަށް ބުކިންގް ހެދުމުގެ ފުރުސަތު ހުޅުވާލާފައިވަނީ ތިން ބެޑްރޫމް އެޕާޓްމަންޓްގެ 80 ހައުސިންގް ޔުނިޓަށެވެ. އަދި ބުކިންގް ފީ އަކީ 150،000 ރުފިޔާއެވެ.
ބުކިންގް ފުރިހަމަ ކުރުމަށްފަހު ސޭލްސް އެންޑް ޕާޗޭސް އެގްރީމަންޓް ހަދާ 20 ފަރާތަކަށް ވަރަށް ހާއްސަ އިނާމްތަކެއް ލިބިގެންދާނެ ކަމަށް އެ ކުންފުނިން ބުންޏެވެ.
މި މަޝްރޫއުގެ އަމަލީ މަސައްކަތް ޓާރމް ޗުއްޓީގައި ފެށޭނެ ކަމަށާއި ލަފާކުރެވޭ ގޮތުން ހަތަރު ޓަވަރުގެ މަސައްކަތް ކުރިއަށް އޮތް ހަތަރު އަހަރު ދުވަސް ތެރޭގައި ނިމޭނެ ކަމަށްވެސް އެކުންފުނިން ވަނީ މައުލޫމާތުދީފައެވެ.
