ޝަރީފްގެ ނަން ދިރާސާކުރަން ކޮމިޓީއަށް ފޮނުވައިފި

އިލެކްޝަންސް ކޮމިޝަންގެ މެމްބަރުކަމަށް އައްޔަން ކުރެއްވުމަށްޓަކައި، ރައީސް އަބްދުﷲ ޔާމީން ރައްޔިތުންގެ މަޖިލީހަށް ފޮނުއްވި، ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހްމަދު ޝަރީފްގެ ނަން ދިރާސާ ކުރުމަށް މިނިވަން މުއައްސަސާތަކާބެހޭ ކޮމިޓިއަށް ފޮނުވައިފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާގައި އޮތީ، ޝަރީފްގެ ނަން މަޖިލީހަށް ހުށަހަޅުއްވައި، ކަމާ ގުޅޭ ކޮމިޓީއަށް ފޮނުވުމެވެ.

ފަސް މެމްބަރުން ތިއްބަވާ އިލެކްޝަންސް ކޮމިޝަންގެ އެއް ގޮނޑި ހުސްވީ އެ ކޮމިޝަންގެ ރައީސް އަހްމަދު ސުލައިމާން އިސްތިއުފާ ދެއްވުމުންނެވެ. ސުލައިމާން މިހާރު ހައްޔަން ކުރައްވާފައި ވަނީ ނެޝަނަލް އިންޓެގްރިޓީ ކޮމިޝަންގެ ރައީސް ކަމަށެވެ.

އުވިގެން ދިޔަ ރައްޔިތުންގެ މަޖިލީހުގެ ތިމަރަފުށީ ދާއިރާގެ ބައިލެކްޝަންގައި ޕީޕީއެމްގެ ޓިކެޓްގައި ވާދަކުރައްވައި އެ ގޮނޑި ކާމިޔާބު ކުރެއްވުމުގެ ކުރިން، އިލެކްޝަންސް ކޮމިޝަންގެ ސެކްރެޓަރީ ޖެނެރަލްގެ މަގާމު އޭނާ އަދާކުރެއްވެވި އެވެ.

ރައީސް ޔާމީން އުފެއްދެވި ޕީޕަލްސް އެލަޔަންސް (ޕީއޭ) ގައި ވެސް އުޅުއްވި އެވެ.

ޝަރީފް އިލެކްޝަންސް ކޮމިޝަނަށް ބަދަލުކޮށް، ސްލައިމާން އެންއައިސީ އަށް ބަދަލުކުރުމަށް ރާވާފައިވާ ކަމުގެ އަޑުތައް ވަރަށް ކުރިން ފެށިގެން ފެތުރިފައިވެ އެވެ.