މަހުލޫފް ވަނީ ހަނުހުރުމުގެ ހައްގުގެ ބޭނުންކޮށްފަ
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފް
ރައްޔިތުންގެ މަޖިލީހުގެ ސެކިއުރިޓީ ބަލަހައްޓާ ސިފައިންނާ މާރާމާރީ ހިންގި ކަމުގެ ތުހުމަތު ގަލޮޅު ދެކުނު ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު މަހުލޫފްގެ މައްޗަށް ފުލުހުން ކޮށްފިއެވެ.
ކުއްލި ނުރައްކަލުގެ ހާލަތުގެ ގަރާރުގެ ދަށުން ފެބްރުއަރީ މަހުގެ 24 ވަނަ ދުވަހުގެރޭ ގުޅިފައިވާ ސިޔާސީ ޕާޓީތަކުން ބޭއްވި އެއްވުމުގެ ތެރެއިން ހައްޔަރު ކޮށްފައިވާ މަހުލޫފްގެ މައްޗަށް ސިފައިންނާ މާރާމާރީ ހިންގި ކަމުގެ ތުހުމަތުގައި ވަނީ ސުވާލު ކޮށްފައެވެ.
މަހުލޫފްގެ ގާނޫނީ ވަކީލް ނާޒިމް ސައްތާރު އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ ފުލުހުން އެކަމާއި ގުޅިގެން މަހުލޫފާއި ސުވާލު ކުރުން އޭނާ ހަނުހުރުމުގެ ޙައްގު ބޭނުން ކޮށްފައިވާ ކަމަށެވެ.
ފުލުހުން ކުރި ތުހުމަތުގައި ބުނެފައި ވަނީ 2017 ވަނަ އަހަރުގެ ޖުލައި މަހުގެ 31 ވަނަ ދުވަހު ރައްޔިތުންގެ މަޖިލީހުގެ މެމްބަރުންތަކެއް އެ މަޖިލީހުގެ ސެކިއުރިޓީ ބަލަހައްޓަން ތިބި ސިފައިންގެ ގާނޫނީ ވާޖިބަށް ހުރަސް އަޅައި ސިފައިންނާ މާރާމާރީ ހިންގާފައިވާ ކަމަށް ތުހުމަތުކުރެވޭ މައްސަލައެއް ބަލަމުންދާ ކަމަށެވެ. މެމްބަރުންތަކެއްގެ މައްޗަށް ފުލުހުން އެފަދަ ތުހުމަތެއް ކޮށްފައިވީ ނަމަވެސް މި މައްސަލައާއި ގުޅިގެން އެހެން މެމްބަރަކާއި ސުވާލުކޮށް ތަހްގީގު ހިންގާކަމެއް އެނގިފައެއް ނުވެއެވެ.
ފެބްރުއަރީ މަހުގެ 24 ވަނަ ދުވަހުގެ ރޭ ބޭއްވި މުޒާހަރާގެ ތެރެއިން
ތުހުމަތު ކުރާ ގާނޫނު ނަމްބަރު
ގިނަ ދުވަސްތަކެއް ވަންދެން ރާއްޖޭން ބޭރުގައި އުޅުއްވުމަށް ފަހު މަހުލޫފް ރާއްޖެވަޑައިގަތް ފަހުން އޭނާ ވަނީ ފަސް ފަހަރެއްގެ މަތިން ފުލުހަށް ހާޒިރުކޮށްފައެވެ. މާފުށީ ޖަލުކުރިމަތީ މުޒާހަރާ ކުރި މައްސަލާގައި މަހުލޫފް ފުލުހަށް ހާޒިރުކޮށްފައިވާއިރު އިރު، ފުލުހުން ދަނީ މަހުލޫފުގެ ތިން މައްސަލައެއް ތަހްގީގް ކުރަމުނެވެ. އެއީ މަހުލޫފް ކުރެއްވި ދެ ޓްވީޓަކާއި ގުޅިގެން ތަހްގީގް ކުރާ ދެ މައްސަލައާއި، ފުލުހުންގެ ވާޖިބަށް ހުރަސް އެޅިކަމުގެ ތުހުމަތުގައި ތަހްގީގް ކުރާ މައްސަލައެކެވެ.
