ރޮނާލްޑޯގެ 300 ވަނަ ލަނޑާއެކު ރެއާލް އިން ގެޓާފޭ ބަލިކޮށްފި
ގެޓާފޭގެ މައްޗަށް ރެެއާލް ކުރިހޯދީ 3-1 ން
ގެޓާފޭ އާ ދެކޮޅަށް ކުޅުނު މެޗުގައި ރެއާލްގެ ތިންވަނަ ލަނޑު ރޮނާލްޑޯ ޖަހަނީ
ސްޕެނިޝް ލީގުގައި ކްރިސްޓިއާނޯ ރޮނާލްޑޯ ޖެހި 300 ވަނަ ލަނޑާއެކު ރެއާލް މެޑްރިޑުން ގެޓާފޭ ބަލިކޮށްފި އެވެ.
ސްޕެނިޝް ލީގުގައި ހޮނިހިރު ދުވަހުގެރޭ އަމިއްލަ ދަނޑުގައި ގެޓާފޭގެ މައްޗަށް ރެއާލް ކުރިހޯދީ 3-1 ންނެވެ.
މިމެޗުގެ 24 ވަނަ މިނިޓުގައި ރެއާލް މެޑްރިޑްގެ ފުރަތަމަ ލަނޑު ޖަހާ، އެޓީމަށް ކުރި ހޯދައިދިނީ ވޭލްސްގެ ވިންގަރ ގެރެތު ބޭލް އެވެ.
ފުރަތަމަ ހާފްގެ އިތުރު ވަގުތުގެ ތެރޭގައި ރެއާލް އަށް ލީޑު ފުޅާ ކޮށްދިނީ ރޮނާލްޑޯ އެވެ. މިއީ ސްޕެނިޝް ލީގުގައި ރޮނާލްޑޯ ޖެހި 300 ވަނަ ލަނޑެވެ.
މިނަތީޖާގައި އޮވެގެން މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފްގެ ދެވަނަ މިނިޓުގައި ގެޓާފޭގެ ލޮއިކް ރެމީ އަށް ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލުމުން މެޗުގެ ބާކީ ބައި ގެޓާފޭ ފުރިހަމަ ކުރީ 10 ކުޅުންތެރިންނާއެކުގައެވެ.
މެޗުގެ 65 ވަނަ މިނިޓުގައި ރެއާލްގެ ޕެނަލްޓީ އޭރިއާ ތެރެއިން ގެޓާފޭގެ ޖޯޖް މޮލީނާ އަށް ރެއާލްގެ ޑިފެންޑަރު ނާޗޯ ކުރި ފައުލަކާއި ގުޅިގެން ގެޓާފޭ އަށް ލިބުނު ޕެނަލްޓީ އަކުން އެޓީމަށް ސުން ކަނޑުވާލައިދިނީ ފްރެންސިސްކޯ ޕޯޓިލޯ އެވެ.
ރެއާލްގެ ފަހު ލަނޑު 78 ވަނަ މިނިޓުގައި ޖަހައިދިނީ ރޮނާލްޑޯ އެވެ.
މިމޮޅާއެކު ސްޕެނިޝް ލީގުގެ ތިންވަނާގައިވާ ރެއާލް މެޑްރިޑުން ވަނީ، ތާވަލްގެ ކުރީގައިވާ ބާސެލޯނާ އާ ދެމެދުގައިވާ ފަރަގު 12 ޕޮއިންޓަށް ހަނިކޮށްފައެވެ.
ލީގުގައި 27 މެޗު ކުޅެފައިވާ ރެއާލް މެޑްރިޑަށް 54 ޕޮއިންޓް ލިބިފައިވާއިރު، ރެއާލް އަށްވުރެ އެއް މެޗު މަދުން ކުޅެފައިވާ ބާސެލޯނާ އަށް ލިބިފައިވަނީ 66 ޕޮއިންޓެވެ. ތާވަލްގެ ދެވަނާގައިވާ އެތުލެޓިކޯ މެޑްރިޑަށް ލިބިފައިވަނީ 61 ޕޮއިންޓެވެ.
ތާވަލްގެ ކުރީގައިވާ ބާސެލޯނާ އާ ދެވަނާގައިވާ އެތުލެޓިކޯ މެޑްރިޑްގެ ކުރިމަތިލުމެއް އާދީއްތަ ދުވަހު އޮންނާނެ އެވެ.
