ހުކުރު އެއްވުން: އަމާޒަކީ މަޖީދީމަގުގެ އެކި ސަރަހައްދުތަކަށް އެއްވުން!
2 މާރިޗު 2018 | ހުކުރު 00:09"މަޖީދީމަހުގެ ކޮންމެ ހިސާބަކަށް ނުކުތަސް ބައިވެރިވެވުނީ"
ފެބްރުއަރީ 16 ވަނަ ދުވަހުގެ އެއްވުމުގެ ތެރެއިން---
ގުޅިފައިވާ ޕާޓީތަކުން ބާއްވާ ސިލްސިލާ މުޒާހަރާތަކުގައި ވަކި ސަރަހައްދަކަށް އެއްވުމުގެ ބަދަލުގައި ހުކުރު ދުވަހުގެ އެއްވުމުގައި މަޖީދީމަގުގެ އެކި ސަރަހައްދުތަކަށް އެއްވުމަށް ގޮވާލައިފި އެވެ.
ސުޕްރީމް ކޯޓުން ފެބްރުއަރީ އެކެއްގައި ނެރުނު އަމުރާއެކު، ރާއްޖޭގައި އެކި ރަށްތަކުގައި ސިލްސިލާ މުޒާހަރާތައް ފަށާފައިވާއިރު، ހުކުރު ދުވަހުގެ އެއްވުމަކީ ހާއްސަ އެއްވުމެއް ކަމަށް ގުޅިފައިވާ ޕާޓީތަކުން ބުނެއެވެ. ހުކުރު ދުވަހުގެ ހަވީރު 4:15ގައި ފެށުމަށް ނިންމާފައިވާ އެ މުޒާހަރާ ހާއްސަ ވެގެންދަނީ މަޖީދީމަގުގެ އެކި ސަރަހައްދުތަކުގައި އެއްވުންތައް ކުރިއަށްދާނެތީ ކަމަށް ޕާޓީތަކުން ބުންޏެވެ.
އެ އެއްވުމާ ގުޅޭ ގޮތުން ވާހަކަފުޅު ދައްކަވަމުން ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވީ މަޖީދީމަގަށް އެއްވުމަކީ އުނދަގޫ ކަމަކަށް ނުވާނެ ކަމަށާއި އިމާރާތްތަކުން ނުކުމެ، މަޖީދީމަގުގެ ކޮންމެ ސަރަހައްދަކަށް އެއްވިޔަސް، މުޒާހަރާގައި ބައިވެރިވެވުނީ ކަމަށެވެ.
"މާލޭގެ އެހެން ހިސާބުތަކުގައި އުޅުއްވާ ބޭފުޅުން ވެސް މާދަމާ (ހުކުރު ދުވަހު) މަޖީދީމަގަށް ވަޑައިގަންނަވާ. ހަރަކާތް ކުރިއަށްދާނީ މަޖީދީމަގުގައި. ބޮޑެތި މަގުތަކާއި ކަންކަންމަތީގައި މަޖީދީމަގަށްވާ ގޮތަށް އަޅުގަނޑުމެންގެ ހަރަކާތް ކުރިއަށްދާނެ،" ބުރާސްފަތި ދުވަހުގެ ރޭ އެމްޑީޕީ ހަރުގެ ކުރިމަތީގައި ބޭއްވި އެއްވުމުގައި ރާއްޖެޓީވީއަށް ދެއްވި އިންޓަވިއުއެއްގައި އަލީ ހުސައިން ވިދާޅުވިއެވެ.
ފުލުހުންނަށް އިލްތިމާސް ކުރައްވާ އަލީ ހުސައިން ވިދާޅުވީ ފުލުހުން މަސައްކަތް ކުރަން ވާނީ ރައްޔިތުންގެ ދިފާއުގައި ކަމަށާއި ރައީސް ޔާމީންގެ ދިފާއުގައި ފުލުހުން މަސައްކަތް ކުރުމުގެ ބޭނުމެއް ނެތް ކަމަށެވެ. ފުލުހުންގެ އެންމެ މަތިވެރި ވާޖިބަކީ ރައްޔިތުން ހިމާޔަތް ކުރުން ކަމަށާއި ގައުމުގެ ހައްގުގައި މަސައްކަތް ކުރުމަކީ ރައްޔިތުންގެ ހައްގުގައި މަސައްކަތް ކުރުން ކަމަށް ވެސް އަލީ ހުސައިން ވިދާޅުވިއެވެ.
"...އެއްވެސް ގޮތަކަށް ރައީސް ޔާމީނުގެ ދިފާއުގައި ތިބުމުގެ ބޭނުމެއް ނެތް. ރައްޔިތުންގެ ދިފާއުގައި ނުކުންނަވާށޭ. ރައްޔިތުންނާއެކުގައި ތިއްބަވާށޭ. ރައްޔިތުންނޭ ތިބޭފުޅުންނަށް މުސާރަދޭ ބަޔަކީ. ރައްޔިތުންގެ މުސާރަ ނަންގަވައިގެން ތިބޭއިރުގައި ރައްޔިތުން ހިމާޔަތް ކުރުމަށް ވުރެ މަތިވެރި ކަމެއް ނޯންނާނެ، މަތިވެރި ވާޖިބެއް ނޯންނާނެ،" ގާނޫނީ ވަކީލުކަން ވެެސް ކުރައްވާ އަލީ ހުސައިން ވިދާޅުވިއެވެ.
ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން، ސިޔާސީ ލީޑަރުން މިނިވަން ކުރުމަށް ނެރުނު އަމުރު ތަންފީޒު ކުރުމަށް ގޮވާލައި މާލޭގައި ސިލްސިލާ މުޒާހަރާތައް ކުރިއަށް ގެންދާތާ 29 ދުވަސް ވަނީ ވެފައެވެ. ކުއްލި ނުރައްކަލުގެ ހާލަތު އިއުލާންކުރުމަށްފަހު، ކުރީގެ ރައީސް މައުމޫން އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރުކޮށްފައި ހުންނަތާ 25 ދުވަސް ވަނީ ވެފައެވެ.
ކުއްލި ނުރައްކަލުގެ ހާލަތު އިއުލާން ކުރުމަށްފަހު މަޖިލީހުގެ ހަތަރު މެމްބަރަކު ވަނީ ހައްޔަރުކޮށްފައެވެ. ފުލުހުންނާއި ސިފައިންގެ ތެރެއިން ބަޔަކު ހައްޔަރުކޮށްފައިވާއިރު، މުޒާހަރާތައް އިންތިޒާމު ކުރުމުގައި އިސްކޮށް އުޅުނު ފަރާތްތައް ވެސް ވަނީ ބަންދުކޮށްފައެވެ. އެ ފަރާތްތައް ބަންދުކޮށްފައި ވަނީ ފަނޑިޔާރެއްގެ ކުރިމައްޗަށް ހާޒިރުކޮށް، ކޯޓު މެދުވެރިކޮށް ބަންދުގެ މުއްދަތު ޖެހުމެއް ނެތިއެވެ.
