ނޭޝަނަލް އިންޓެގްރިޓީ ކޮމިޝަން (އެންއައިސީ) ގެ ރައީސްގެ މަގާމަށް، އިލެކްޝަންސް ކޮމިޝަނުގެ ކުރީގެ ރައީސް އަހުމަދު ސުލައިމާނު އައްޔަން ކުރައްވައިފިއެވެ.
ނޭޝަނަލް އިންޓެގްރިޓީ ކޮމިޝަނުގެ މެންބަރު ކަމަށާއި އެ ކޮމިޝަނުގެ ރައީސް ކަމުގެ މަގާމަށް ސުލައިމާނު އައްޔަން ކުރެއްވީ ބުރާސްފަތި ދުވަހުއެވެ.
އިލެކްޝަންސް ކޮމިޝަނުގެ ރައީސް ކަމުގެ މަގާމުން ސުލައިމާނު އިސްތިއުފާ ދެއްވީ ޖެނުއަރީ މަހުގެ 31 ވަނަ ދުވަހުއެވެ. އެއާ އެކު އިންޓެގްރިޓީ ކޮމިޝަނުގެ ރައީސް ކަމުގެ މަގާމަށް އޭނާ އައްޔަންކުރަން އުޅޭ ކަމަށް ބުނެ އަޑުތައް ފެތުރުނެވެ.
އެ ވާހަކަތައް ދެކެވެމުންދަނިކޮށް، އިންޓެގްރިޓީ ކޮމިޝަނުގެ ހުސްވެފައިވާ މެންބަރުކަމުގެ މަގާމަށް ސުލައިމާނު އައްޔަންކުރުމަށް ރައްޔިތުންގެ މަޖިލީހުގެ ރުހުން ހޯދުމަށް ރައީސް އޮފީހުން ހުށަހެޅިއެވެ. ސުލައިމާނުއަށް އެ މަގާމަށް އައްޔަންކުރަން ރައްޔިތުންގެ މަޖިލީހުން ރުހުން ދިނީ ބުދަ ދުވަހު ބޭއްވި ޖަލްސާގައެވެ.
ރައީސް އަބްދުﷲ ޔާމީންގެ ކުރީގެ ޕާޓީ، ޕީޕަލްސް އެލަޔަންސް(ޕީއޭ) ގެ ކައުންސިލް މެންބަރެއްގެ ގޮތުގައި މަސައްކަތް ކުރެއްވި ސުލައިމާނަކީ ރައީސް ޔާމީނުގެ އަރިސް ބޭފުޅެކެވެ.
ނޭޝަނަލް އިންޓެގްރިޓީ ކޮމިޝަނުގެ މެންބަރުކަމުގެ މަގާމެއް ހުސްވީ، އެ ކޮމިޝަނުގެ ރައީސްގެ މަގާމުގައި ހުންނެވި ޔޫސުފް މާނިއު، ރައީސް ކަމުގެ މަގާމުންނާއި މެންބަރުކަމުގެ މަގާމުން ވަކިކުރެއްވުމުންނެވެ. މާނިއު މަގާމުން ވަކިކުރެއްވީ ކޮމިޝަނުން ބަލަމުންދާ ފުލުހުންގެ މައްސަލަތައް ބެލުމަށް ފުލުހުން އެއްބާރުލުން ނުދޭތީ ފުލުހުންނަށް ގާނޫނީ ފިޔަވަޅު އަޅާނެ ކަމުގެ އިންޒާރު އޭނާ ދެއްވާފައިވަނިކޮށެވެ.
