އުތުރު ކޮރެއާއާ އެކު މުއާމަލާތްތަކެއް ހިންގަމުންދަނިކޮށް ފެނުނީ ކާނަލް ޒިޔާދުގެ ކުންފުނީގެ ބޯޓެއް ކަމަށް ދެކެވޭ ވާހަކަތައް ދޮގުކޮށްފި
އދ. އިން އަޅާފައިވާ ފިޔަވަޅުތަކުގެ ދަށުން މިފަދަ މުއާމަލާތް ކުރުން ވަނީ މަނާކުރެވިފައި
އުތުރު ކޮރެއާގެ ބޯޓާއެކު ދިވެހި ދިދަ ނަގާފައިވާ ކަމަށް ބުނާ ބޯޓު ކަނޑުމަތީގައި
އުތުރު ކޮރެއާގެ ތެޔޮ ޓޭންކަރަކާ އެކު ކަނޑުމަތީގައި މަނާކުރެވިފައިވާ މުއާމަލާތްތަކެއް ހިންގަމުންދަނިކޮށް ފެނުނު ދިވެހި ތެޔޮ ޓޭންކަރަކީ، ރިޓަޔާޑް ކާނަލް މުހައްމަދު ޒިޔާދުގެ ކުންފުންޏަށް ނިސްބަތްވާ ތެޔޮ ޓޭންކަރެއް ކަމަށް ދެކެވޭ ވާހަކަތައް އޭނާ ދޮގު ކުރައްވައިފިއެވެ.
ދިވެހި ދިދަ ނަގާފައިވާ ތެޔޮ ޓޭންކަރަކުން، އުތުރު ކޮރެއާގެ ތެޔޮ ޓޭންކަރަކާ އެކު މުއަމަލާތްތަކެއް ހިންގިކަން ފަޅާއަރުވާލީ ޖަޕާނުގެ ފޮރިން މިނިސްޓްރީ އިންނެވެ. ޖަޕާނުގެ ފޮރިން މިނިސްޓްރީގެ ވެބްސައިޓުގައިވާ ގޮތުގައި، ރާއްޖޭގައި ރަޖިސްޓްރީކޮށްފައިވާ ތެޔޮ ޓޭންކަރެއް ކަމަށްވާ 'ޝިން ޔުއާން 18' އާއި އުތުރު ކޮރެއާގެ ތެޔޮ ޓޭންކަރެއް ކަމަށްވާ 'ޗޮން މާން ސަން' ފެނުނީ ފެބްރުއަރީ މަހުގެ 24 ވަނަ ދުވަހުގެ ރޭ ދަންވަރު، ޝަންހާއީގެ އިރުން 250 ކިލޯމީޓަރު ބޭރުން އުތުރު ޗައިނާ ކަނޑުގެ ސަރަހައްދުންނެވެ.
ޖަޕާނުގެ ފޮރިން މިނިސްޓްރީ އިން ބުނާ ގޮތުގައި، އެގައުމުގެ މެރިޓައިމް ސެލްފް ޑިފެންސް ފޯސްގެ ވައިގެ ސިފައިންނަށް ދެ އުޅަނދު ފެނުނީ އެކަތި އަނެކަތީގައި ބަނދެލަައިގެން އޮވެ، ބޮކިތައް ދިއްލައިގެން، ޝައްކުކުރެވޭ ފަދަ މުއާމަލާތްތަކެއް ހިންގާ ފަދަ ގޮތަކަށެވެ.
ދިވެހި ދިދަ ނަގާފައިވާ ޓޭންކަރަކީ ކާނަލް ޒިޔާދުގެ ގްރީން ބޮކްސް ކުންފުންޏަށް ނިސްބަތްވާ ޓޭންކަރެއް ކަމަށާއި، އެ ޓޭންކަރާއި މާލޭގެ ގޯއްޗެއް މޯގޭޖް ކުުރުމަށް ފަހު 4.5 މިލިއަން ޑޮލަރުގެ ލޯނެއް ނަގާފައިވާ ކަމަށް ބުނާ ވާހަކަތަކެއް ސޯޝަލް މީޑިއާގައި ދަނީ ދައުރުވަމުންނެވެ.
އެ ވާހަކަތަކާ ގުޅިގެން، ރާއްޖެއެމްވީ އިން ކުރި ސުވާލަކަށް ޖަވާބު ދެއްވަމުން ޒިޔާދު ވިދާޅުވީ އެ ޓޭންކަރަކީ އޭނާގެ ކުންފުންޏާ އެއްވެސް ގުޅުމެއް އޮންނަ ޓޭންކަރެއް ނޫން ކަމަށެވެ. އަދި އެއްވެސް ލޯނެއް ވެސް އެފަދަ އިން ނަގާފައި ނުވާނެ ކަމަށް ޒިޔާދު ވިދާޅުވިއެވެ.
'ޝިން ޔުއާން 18' ނަމަކަށް ކިޔާ، ރާއްޖޭގެ ދިދަ ނަގާފައިވާ ކަމަށް ބުނާ އުޅަނދަކާއި، އުތުރު ކޮރެއާގެ އުޅަނދަކާ ދެމެދު ކަނޑުމަތީގައި މަނާކުރެވިފައިވާ މުއާމަލާތްތަކެއް ހިންގި ކަމަށް ބުނެ ފަތުރަނީ ހަގީގަތާ ހިލާފު ވާހަކަތަކެއް ކަމަށާއި، ދިވެހިންގެ އިއްޒަތް ނަގާލުމަށް މަސައްކަތްކުރާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމަށް ރައީސް އޮފީހުން ވަނީ ބުނެފައެވެ.
ރައީސް އޮފީހުން ބުދަ ދުވަހުގެ ރޭ ނެރުނު ބަޔާނެއްގައިވާ ގޮތުގައި، ދިވެހި ރާއްޖޭގެ ދިދަ ނަގާފައިވާ ކަމަށް ބުނާ 'ޝިން ޔުއާން 18' ނަމަކަށް ކިޔާ އުޅަނދަކީ އެއްވެސް ޒަމާނެއްގައި ދިވެހި ރާއްޖޭގައި ރަޖިސްޓްރީކޮށްފައިވާ އުޅަނދެއް ނޫނެވެ.
އުތުރުކޮރެއާއާ ދެކޮޅަށް އދ. އިން އަޅާފައިވާ ދަތިކުރުމުގެ ފިޔަވަޅުތަކުގެ ދަށުން، އެގައުމުގެ އުޅަނދުތަކާ އެކު މިގޮތަށް ކަނޑުމަތީގައި މުއާމަލާތް ކުރުމަކީ މަނާ ކަމެކެވެ.
ޖަޕާންގެ އޮންލައިން ނޫހެއް ކަމުގައިވާ ނިކޭއީ އޭޝިއަން ރިވިއު ގައި ބުނެފައިވަނީ މިދެ އުޅަނދުން ބަދަލުކޮށްފައިވަނީ ކްރޫޑް އޮއިލް، އެހެން ނޫނީ ސާފު ކުރި ތެޔޮ ކަމަށް ބެލޭ ކަމަށާއި މި އަމަލު ހިންގާފައިވަނީ ސެކިއުރިޓީ ކައުންސިލުން ކަނޑައަޅާފައިވާ ރިޒެލިއުޝަންސްތަކުގެ މިންގަނޑުތަކާ ހިލާފަށް ކަމަށް ބެލޭ ކަމަށެވެ. އެއީ ރާއްޖޭގެ އުޅަނދެއް ނޫން ކަމަށް ރާއްޖެއިން ބުނާ އިރު އުޅަނދުފަހަރު މޮނީޓާކުރާ ބައިނަލްއަގުވާމީ ވެބްސައިޓްތަކުން ދައްކަނީ އެއީ ރާއްޖޭގެ ދިދައިގެ ދަށުން ރަޖިސްޓްރީކޮށްގެން ދުއްވާ އުޅަނދެއްގެ ގޮތުގައެވެ.
