އަޅުގަނޑު މިހުރީ ބައްޕަޔާ އެކު ސާބިތުކަމާ އެކު: ދުންޔާ
27 ފެބުރުއަރީ 2018 | އަންގާރަ 15:39ހުންނެވީ އެކަމަނާ ޤަބޫލް ކުރައްވާ ޤަބޫލް ކުރުންމަތީ ސާބިތުކަމާ އެކުގައި ކަމަށާއި މިނިވަންކޮށް ކަމަށް ވިދާޅުވި
ދުންޔާ މައުމޫން
ހެލްތު މިނިސްޓްރީގެ ސްޓޭޓް މިނިސްޓަރ ކަމުން އިސްތިއުފާދެއްވި ކުރީގެ ރައީސް މައުމޫންގެ ދަރިކަންބަލުން ދުންޔާ މައުމޫން ހުންނެވީ އެކަމަނާގެ ބައްޕާފުޅާއެކު ސާބިތު ކަމާއެކުގައި ކަމަށް އެކަމަނާ ވިދާޅުވެއެވެ.
އިސްތިއުފާ ދެއްވުމަށް ފަހު ދުންޔާ މިއަދު ނެރުއްވި ބަޔާނެއްގައި ވިދާޅުވީ އެކަމަނާގެ އާއިލާއަށާއި މުޅި ދިވެހި ޤައުމަށް މިވަގުތު ކުރިމަތިވެފައިވާ ދަތި އަދި ހިތާމަވެރި ވަގުތުގައި ހުންނެވީ ބައްޕައާ އެކުގައި، ވަރަށް ސާބިތުކަމާއެކުގައި ކަމަށެވެ. ޣައިރު ގާނޫނީ ގޮތުން ސަރުކާރު ބަދަލުކުރުމަށް އުޅުމުގެ ތުހުމަތުގައި ހައްޔަރުކޮށް ޖަލަށްލާފައިވާ ބައްޕާފުޅަކީ ހަމައެކަނި އެކަމަނާގެ ބައްޕާފުޅު ނޫން ކަމަށާއި ޤައުމު މިއަދު ދެކެމުން މިދާ ތަރައްޤީގެ ބާނީ ކަމަށެވެ. ރާއްޖޭގެ ހުރިހާ ރައްޔިތުންގެ ލޯތްބާއި އިހްތިރާމް ލިބިވަޑައިގެން ހުންނެވި ބޭފުޅެއް ކަމަށެވެ.
ދުންޔާ ވިދާޅުވީ ރާއްޖޭގެ ޑިމޮކްރަސީ އާއި ޝަރުޢީ ދާއިރާ އާއި މިނިވަން މުއައްސަސާތައް ހަރުދަނާކުރުމަށް ގިނަ މަސައްކަތްތަކެއް ކުރަން ޖެހިފައި ކަމަށާއި މިނިވަން މުއައްސަސާތަކުން އެންމެ ބޮޑަށް އިސްކަންދޭން ޖެހޭ ކަމަކީ ރައްޔިތުންގެ އިތުބާރު ހޯދުން ކަމަށެވެ. މިއަދު އަޅުގަނޑުމެންނަސް މިފެންނަނީ، ބޭރާއި އެތެރޭގެ ޕްރެޝަރ އިން ރާއްޖެއަށް ކުއްލިއަކަށް ގެނައި ޑިމޮކްރަސީ ފެއިލް ވަމުންދާތަން ކަމަށެވެ.
ދުންޔާގެ ބަޔާނުގައި ވިދާޅުވެފައި ވަނީ ސުލްހައަށް ލޯބިކޮށް އަދި މަޝްވަރާގެ މަތިވެރި އުސޫލަށް އަނބުރާ ރުޖޫއަވާން އެބަޖެހޭ ކަމަށާއި މިޤައުމުގައި ހަރުދަނާ ޑިމޮކްރަސީއެއް އާލާކޮށް ދައުލަތުގެ ނިޒާމްތައް ވަރުގަދަ ކުރުމަށާއި ރާއްޖެއަށް މިހާރު ކުރިމަތިވެފައިވާ ދަތިތަކުން އަރައިގަތުމަށް ބައިނަލްއަޤްވާމީ މުޖުތަމައުން އެހީތެރިވެދިނުމަށް ގޮވާލައްވާ ކަމަށެވެ.
"ތަކުރާރުކޮށް ބުނަމުން މިދަނީ ރުޅިވެރިކަމާއި ހަސަދަޔާ އެކު އެއްވެސް ކަމެއް ހައްލެއް ނުކުރެވޭނެއެވެ. މަޝްވަރާކޮށްގެން މެނުވީ އަޅުގަނޑުމެންނަށް މިވަގުތު ދިމާވެފައިމިވާ ހަލަބޮލިކަމެއް ހައްލެއް ނުކުރެވޭނެއެވެ. މިހާލަތުން އަރައިގަތުމަކީ ހުރިހާ ދިވެހިންނާއި ކުރިއަށް އޮތް ޖީލުތަކާއި ދިވެހި ޤައުމުގެ ޙައްޤުގައި އަޅުގަނޑުމެން ކުރަންޖެހޭ ކަމެކެވެ" ދުންޔާ ވިދާޅުވެފައެވެއެވެ.
ދުންޔާ ވިދާޅުވީ އެކިފަރާތްތަކުގެ ފިއްތުންތަކާއި އެކުގައި ވެސް ދުންޔާ ހުންނެވީ އެކަމަނާ ޤަބޫލް ކުރައްވާ ޤަބޫލް ކުރެއްވުންމަތީ ސާބިތުކަމާ އެކުގައި ކަމަށާއި މިނިވަންކޮށް ކަމަށެވެ. އަދި އިދިކޮޅު ފަރާތްތަކަކާ ނުގުޅޭނެ ކަމަށާއި ދެމިހުންނަވާނީ ފަޚުރުވެރި ދިވެއްސެއްގެ ގޮތުގައި ކަމަށެވެ.
ރައީސުލް ޖުމްހޫރިއްޔާއަކީ އެކަމަނާގެ ބޮޑުބޭބޭ ފުޅު ކަމަށާއި އެކަމަނާގެ ލޭ ކަމަށް ވެސް ބަޔާނުގައި ވިދާޅުވެފައި ވެއެވެ. އަދި ހުންނެވީ ރައީސް އަރިހުގައި އަދި އެހެން ސިޔާސީ ލީޑަރުންނާ އެކު މަޝްވަރާގެ ޕްރޮސެސް ކުރިއަށް ގެންދިއުމަށްޓަކައި ވެވެން އޮތް އެހީތެރިކަމެއް ދިނުމަށް ތައްޔާރަށް ކަމަށް ދުންޔާ ވަނީ ވިދާޅުވެފައެވެ.
ދުންޔާ ވިދާޅުވީ އިސްތިއުފާ ދިނުމަކީ ފަސޭހަކަމެއް ނޫން ކަމަށާއި އަދި އިސްތިއުފާ ދިނުމަކީ ޤައުމުގެ މައްސަލައަށް އޮތް ހައްލެއް ނޫން ކަމަށް ދެކޭ ކަމަށެވެ. މިސަރުކާރު ވެރިކަމަށް ގެނައީ ވަރަށް ފޮނި އުންމީދުތަކާއެކުގައި ކަމަށެވެ. އަދި އެންމެ ބޮޑަށް ހިތާމަކުރައްވަނީ ބައިބައިވެފައިވާ އާއިލާއަކާއި، ޤައުމަކާއި މުޖުތަމައުއަކާ މެދު ކަމަށް ވިދާޅުވިއެވެ. ޤައުމު ހަމަމަގަށް އެޅުވުމަށް ގިނަ މަސައްކަތްތަކެއް ވަނީ ކުރަން ޖެހިފައި ކަމަށް ދުންޔާ ވިދާޅުވިއެވެ.
މީގެ ކުރިން ދުންޔާ ވަނީ މި ސަރުކާރުގެ ފޮރިން މިނިސްޓަރުކަން ވެސް ކުރައްވާފައެވެ. އެ މަގާމުން އިސްތިއުފާ ދެއްވީ ބައްޕާފުޅު މައުމޫނާއި ރައީސް ޔާމީނާ ދެމެދު މައްސަލަ ޖެހުނު ހިސާބުންނެވެ. އޭގެ ފަހުން ސަރުކާރުގެ ޚާރިޖީ ސިޔާތަށް ފާޑުވިދާޅުވި ނަމަވެސް ފަހުން ވަނީ ހެލްތު މިނިސްޓްރީގެ ސްޓޭޓް މިނިސްޓަރުކަމަށް ވަޑައިގެންފައެވެ.
