ފެބްރުއަރީ 16 ވަނަ ދުވަހު އިސްލާމިކް މިނިސްޓްރީން މިސްކިތްތަކަށް ފޮނުވި ޚުތުބާ ކިޔަން ދެކޮޅު ހެދީ ދީން ސިޔާސީ ހަތިޔާރަކަށް ހަދަން މާތްﷲ އަށް ބިރުވެތިވާތީ ކަމަށް ލ. މާމެންދޫ މުދިމް އުޘްމާން އަބްދުއް ސަމަދު ބުނެފިއެވެ.
ޚުތުބާ ކިޔުމަށް ދެކޮޅު ހެދުމުން ސަރުކާރުން އެ ރަށު ކައުންސިލް މެދުވެރިކޮށް ނެގި ބަޔާނުގައި މުދިމް ބުނީ އޭނާއާ ހަވާލުކުރީ އިސްލާމިކް މިނިސްޓްރީން އިސްލާހުކޮށްފައިވާ ޚުތުބާ ނޫން ކަމަށާއި މި ދަނޑިވަޅުގައި އިސްލާމްދީން ސިޔާސީ ހަތިޔާރެއްގެ ގޮތުގައި ބޭނުން ކޮށްފައިވާކަން ޚުތުބާ އިން ސާފުވާ ކަމަށެވެ. އަދި ދީނީ ނަސޭހަތްތަކާއި ހުކުރު ޚުތުބާ ސިޔާސީކޮށް ވެރިންނާ މެދު އިސްލާމްދީނުގައި އަންގާފައިވާ ގޮތާ ހިލާފަށް ވާހަކަތައް ފަތުރަމުންދާތީ ކަންބޮޑުވާ ކަމަށެވެ.
"އިމާމްވެ ހުކުރު ކުރާތާ 10 ވަރަކަށް އަހަރުވެފައިވާއިރު އާންމު އުސޫލަކީ ޚުތުބާ ބިނާވެފައި އޮންނަނީ އެވަގުތެއްގައި ޤައުމަށް ނުވަތަ އިސްލާމީ އުއްމަތަށް ދިމާވެފައިވާ ބޮޑެތި ކަންކަން ސާފުކޮށްދީ އެ މައްޗަށް ނަސޭހަތް ދިނުމަށް. އެހެންކަމުން އަޅުގަނޑު ދެކެނީ މިއަދު މިއުޅެނީ ރައްޔިތުން ވެރިމީހާ އަށް ކިޔަމަން ނުވެގެނެއް ނޫން. މިއުޅެނީ ވެރިމީހާ އިންތަކާ މިންތަކުން ބޭރުވެގެން" އުޘްމާން ބުންޏެވެ.
ރާއްޖޭގައި އަދުލުވެރިޔަކު ހުރި ކަމަށް ޤަބޫލެއް ނުކުރެވޭ ކަމަށް އުޘްމާން ބުންޏެވެ. ސަބަބަކީ ރައްޔިތުންގެ ގައިގައި ތަޅައި އަނިޔާ ކުރަމުންދާއިރު ވެސް އެކަން ވެރިން ހުއްޓުވަމުންދާތަން ނުފެންނަތީ ކަމަށް އޭނާ ބުނެފައި ވެއެވެ.
މިސްކިތްތަކަކީ ސިޔާސީ ޖަގަހަތަކަށް ނުހެދުމަށް އިސްލާމިކް މިނިސްޓްރީއަށާއި ސަރުކާރަށް މުދިމް ވަނީ އިލްތިމާސްކޮށްފައެވެ. އަދި މީގެ ކުރިން ވެސް އެކި ސަބަބުތަކާ ހެދި ޚުތުބާ ނުކިޔައި ދޫކޮށްލާފައިވާނެކަން ފާހަގަކޮށް އުޘްމާން ވަނީ ފެބްރުއަރީ 16 ވަނަ ދުވަހުގެ ޚުތުބާ ނުކިޔައި ދޫކޮށްލުމުން ބަޔާން ނަގަން ޖެހުނު ސަބަބާ މެދު ސުވާލު އުފައްދާފައެވެ.
މިކަހަލަ ޚުތުބާތަކުގެ ސަބަބުން މުޖުތަމައުގައި ފިތުނަ ފަސާދަ އުފެދެން މެދުވެރިވާނެ ކަމަށް ވެސް މުދިމްގެ ބަޔާނުގައިވެއެވެ. އިސްލާމިކް މިނިސްޓްރީން މިސްކިތްތަކަށް ފޮނުވާފައިވާ ޚުތުބާގެ މައުޟޫއަކީ "ހާކިމާއަކީ ނިއުމަތެއް" އެވެ. އެ ޚުތުބާއާ ގުޅިގެން ދީނީ އިލްމުވެރިންގެ ފާޑުކިޔުންތައް އަމާޒުވެފައިވާއިރު އެއީ ވަރަށް ބޮޑަށް ސިޔާސީ ކޮށްފައިވާ ޚުތުބާއެއް ކަމަށް އިލްމުވެރިން ވިދާޅުވެފައި ވެއެވެ. އަދި އެ ޚުތުބާގައި ދޮގު ހަދީސްތަކެއް ހިމެނޭކަން އިސްލާމިކް މިނިސްޓްރީގެ ސަމާލުކަމަށް ގެނައުމުން އެބައި އުނިކޮށްގެން ޚުތުބާ ކިޔުމަށް އެންގިއެވެ.
