ސުލްހަވެރި ސިޔާސީ ހަރަކާތްތަކަށް ހުރަސް ނޭޅުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
ރައީސް ނަޝީދު ކުރެއްވި ޓްވީޓެއްގައި ވަނީ ރައްޔިތުންގެ ސަޕޯޓަކީ އެމްޑީޕީއަށް ވަރަށް މުހިންމު އެއްޗެއް ކަމަށާއި ސިޔާސީ ހަރަކާތް ކުރިޔަށް ގެންދިޔުމުގައި އެންމެ އިސްރޯލެއް އަދާކުރަމުން އަންނަނީ ރައްޔިތުން ކަމަށެވެ. ހަމައެހެންމެ ގާނޫނުގެ ދަށުން ރައްޔިތުންނަށް ލިބިފައިވާ ސުލްހަވެރި ސިޔާސީ ހަރަކާތް ހިންގުމުގެ ހައްގަށް އަރައި ނުގަތުމަށާއި މިފަދަ ހަރަކާތްތަކުގައި ހައްޔަރުކުރެވިފައިވާ އެ ޕާޓީގެ މެމްބަރުން ވަގުތުން ދޫކޮށްލުމަށް ރައީސް ނަޝީދު ވަނީ ގޮވާލައްވާފައެވެ.
Grassroots support is critical to MDP and gives us strength to keep going against all odds. Strongly condemn authorities’ suppression of people’s right to peaceful political activity and call on @PoliceMv to free our members arrested in the recent protests.
— Mohamed Nasheed (@MohamedNasheed) February 25, 2018
ރައީސް ނަޝީދު މިފަދައިން ގޮވާލައްވާފައިވާއިރު ފުލުހުން ވަނީ ދާހިލީ އަމަން ބެލެހެއްޓުމަށް ދަތިވާ ކަމަށް ބުނެ ރޭގަނޑު 10:30 ގެ ފަހުން އެއްވެސް އެއްވުމެއް ބޭވުމަށް ފުރުސަތު ނުދޭނެ ކަމަށް ބުނެފައެވެ. ފުލުހުން މިގޮތަށް ބުނެފައިވާއިރު ސަރުކާރު ހިންގާ ޕާޓީ، ޕީޕީއެމްގެ ތަރުޖަމާނެއްގެ ގޮތުގައި މިހާރު ފެންނަމުންދާ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވަނީ އާދިއްތަ ދުވަހު މެންދުރު ބޭއްވި ޕްރެސް ކޮންފަރެންސެއްގައި 10:30 ގެ ފަހުން މާލޭގައި އެއްވުންތައް ބޭއްވުން ހުއްޓުވުމަށް އިލްތިމާސްކުރައްވާފައެވެ.
އެހެން ނަމަވެސް ގާނޫނު އަސާސީގެ 32 ވަނަ މާއްދާގައި ވަނީ ދައުލަތުގެ ހުއްދައެއް ކުރިން ހޯދުމަކާއި ނުލައި ސުލްހަވެރިކަމާއެކު އެއްވެއުޅުމުގެ މިނިވަންކަން ކޮންމެ މީހަކަށްމެ ލިބިގެންވާ ކަމަށެވެ.
