ސްރީދޭވީ މަރުވެއްޖެ

ބޮލީވުޑްގެ މަޝްޙޫރު ބަޠަލާ އަދި ޕްރޮޑިއުސަރ ސްރީދޭވީ ކަޕޫރް މަރުވެއްޖެއެވެ.

ހޮނިހިރު ދުވަހުގެ ރޭ ސްރީދޭވީ މަރުވެފައިވަނީ ހާޓް އެޓޭކެއް ޖެހިގެން ދުބާއީގައެވެ. މަރުވިއިރު އުމުރުން 54 އަހަރެވެ. މަރުވިއިރު ކައިވެނިކޮށްގެން އުޅުނީ ފިލްމް ޕްރޮޑިއުސަރ ބޮނީ ކަޕޫރާއެވެ. ބޮނީ އާއި ސްރީދޭވީއަށް ދެކުދިން ލިބިފައިވެއެވެ.

ބޮނީ އާއި ކައިވެނި ކުރުމުގެ ކުރިން ސްރީދޭވީ ވަނީ ބޮލީވުޑްގެ ލެޖެންޑް މިތުން ޗަކްރަބޮތީ އާއިވެސް ކައިވެނިކޮށްފައެވެ. އެ ކައިވެންޏަށް ކުއްޖަކު ލިބިފައެއް ނުވެއެވެ.

ސްރީދޭވީގެ އާއިލާއިން ބުނެފައިވަނީ ސްރީދޭވީ މަރުވީ އާއިލާ މީހެއްގެ ކައިވެންޏަށް ދުބާއީއަށް ގޮސް އުޅެނިކޮށް ޖެހުނު ކުއްލި ހާޓްއެޓޭކެއްގެ ސަބަބުން ކަމަށާއި، އޭނާއަށް ހާޓް އެޓޭކް ޖެހުމުގެ ކުރިން ސިއްޙަތު އާދައިގެ ގޮތެއްގައި ރަނގަޅު ކަމަށެވެ.

ސްރީދޭވީގެ ކުއްލި މަރާއި ގުޅިގެން ބޮލީވުޑްގެ ފަންނާނުންނާއި، އިންޑިއާގެ ރައްޔިތުން ހިމެނޭގޮތަށް ގިނަ ބަޔަކު ހިތާމަ ފާޅުކުރަމުންދާއިރު، އިންޑިއާގެ ބޮޑުވަޒީރު، ނަރެންދްރަ މޯދީވެސް ވަނީ ސްރީދޭވީގެ ކުއްލި މަރާއި ގުޅިގެން ހިތާމަ ފާޅުކުރައްވާފައެވެ.

އުމުރުން 4 އަހަރުގައި ތަމަޅަ ފިލްމު، ތުނައިވަން އިން ފިލްމީ ދާއިރާއަށް ނުކުތް ސްރީދޭވީ އަކީ އިންޑިއާގެ ޓެމިލް ނާޑޫއަށް އުފަން ފަންނާނެކެވެ. އޭނާގެ އުފަން ނަމަކީ ޝްރީ އަންމާ ޔަންގަރް އައްޔަޕަން އެވެ. އުފަންވީ 1963 ވަނަ އަހަރުގެ އޯގަސްޓް މަހުގެ 13 ވަނަ ދުވަހުއެވެ.

ޓެމިލް އަދި ޓެލުގޫ ގިނަ ފިލްމުތަކެއްގައި އެކްޓް ކުރުމަށްފަހު ސްރީދޭވީ ބޮލީވުޑްގެ ފިލްމުތަކަށް ތަޢާރުފުވީ 1979 ވަނަ އަހަރު ސޮލްވާ ސާވަން އިންނެވެ. ނަމަވެސް ސްރީދޭވީއަށް މަޝްޙޫރުކަން ލިބިގެން ދިޔައީ އޭގެ 4 އަހަރުފަހުން ޖީތެންދްރާ އާއި އެކު ކުޅުނު ހިންމަތުވާލާއިންނެވެ.

ސްރިދޭވީގެ ފިލްމުތަކުގެ ތެރެއިން ފާހަގަކޮށްލެވޭ ފިލްމުތަކުގެ ތެރޭގައި ސަދްމާ، ތޮހްފާ، ނާގިނާ، މިސްޓަރ އިންޑިއާ، ޖުދާއީ، އަދި އިންގްލިޝް ވިންގްލިޝް ހިމެނެއެވެ.

އިންޑިއާގެ ސަރުކާރުން 2013 ވަނަ އަހަރު ސްރީދޭވީއަށް ޕަދްމާޝްރީގެ ޝަރަފު އަރުވާފައިވާއިރު، ސްރީދޭވީގެ ކެރިއަރުގައި އޭނާ ވަނީ 41 އެވޯޑް ހޯދާފައެވެ.