އެމެރިކާއިން އެއްގަމު މަގުން އަރައިފިނަމަ އަސްކަރީ މަރުކަޒުތަކާއި އާގުބޯޓުފަހަރަށް ހަމަލާދޭނަން: އީރާން
5 އޮކްޓޯބަރު 2026 | ހޯމަ 06:54އެމެރިކާއިން އީރާނަށް އެއްގަމު މަގުން ހަމަލާއެއް ދީފިނަމަ، އެ ގައުމުގެ އަސްކަރީ މަރުކަޒުތަކާއި އުޅަނދުތަކަށް ރައްދު ހަމަލާދޭނެ ކަމުގެ އިންޒާރު އައިއާރްޖީސީން ވަނީ ދީފައެވެ. އީރާނުގެ އަސްކަރީ ގާބިލުކަން އިތުރުވެފައިވާކަން ފާހަގަކުރައްވައި ކޮމާންޑަރު ފަދާވީ ވިދާޅުވީ، އެމެރިކާގެ މަނަވަރުތަކާއި މަރުކަޒުތަކަށް މިސައިލް ހަމަލާދީގެން ނޫނީ އެ ގައުމަށް ކަންކަން ފަހުމުނުވާނެ ކަމަށެވެ. މީގެ އިތުރުން ހުރްމުޒް ކަނޑުއޮޅި ބެލެހެއްޓުމަށް އޮމާނާއެކު އީރާނުން އާ ގަވާއިދުތަކެއް އެކުލަވާލާފައިވާކަން ވެސް އޭނާ ހާމަކުރެއްވިއެވެ.
ހުރްމުޒް ކަނޑުއޮޅި ބަންދުކޮށްފައިވާ ކަމާއި އީރާނުގެ އަސްކަރިއްޔާގެ ގާބިލުކަން ދައްކުވައިދިނުމަށް ތެހްރާންގެ މަގެއްގެ އަރިމަތީގައި ޖަހާފައިވާ ޕޯސްޓަރެއް | އޭއެފްޕީ
އެމެރިކާއިން އީރާނަށް އެއްގަމު މަގުން ހަމަލާއެއް ދީފިނަމަ، އެމެރިކާގެ ހުރިހާ އަސްކަރީ މަރުކަޒުތަކަކަށާއި އުޅަނދުތަކަށް އީރާނުން ހަމަލާދޭނެކަމުގެ އިންޒާރު އިސްލާމިކް ރިވޮލޫޝަނަރީ ގާޑް ކޯގެ (އައިއާރްޖީސީ) އިސް ކޮމާންޑަރަކު ދެއްވައިފި އެވެ.
އައިއާރްޖީސީގެ އިސް ކޮމާންޑަރުގެ މުޝީރުންގެ ގްރޫޕްގެ އިސްވެރިޔާ ޢަލީ ފަދާވީ މި ފަދައިން އިންޒާރު ދެއްވާފައި ވަނީ އާދީއްތަ ދުވަހުގެ ރޭ އީރާނުގެ ދައުލަތު މީޑިއާގެ ޓީވީ ޕްރޮގްރާމެއްގައި ވާހަކަފުޅު ދައްކަވަމުންނެވެ. "އެމެރިކާއިން އެއްގަމު މަގުން ހަމަލާއެއް ދީފިނަމަ، އެމެރިކާއާ ގުޅުންހުރި ކޮންމެ ތަނަކަށާއި، އެމެރިކާގެ މަރުކަޒުތަކަށާއި އަދި އެމެރިކާއާ ގުޅުންހުރި ކޮންމެ އުޅަނދަކަށް އަޅުގަނޑުމެން ހަމަލާދޭނަން" އިންޒާރު ދެއްވަމުން ފަދަވީ ވިދާޅުވި އެވެ.
އެމެރިކާއަށް ހަމައެކަނި ފަހުމުވަނީ އަސްކަރީ ބާރުކަމަށް ފަދާވީ ވިދާޅުވި އެވެ. އަދި, އެމެރިކާ ރައްޔިތުންނަށް "އެ މީހުންގެ މަނަވަރުތަކަށް މިސައިލްތައް އެރުމުން" އަދި "އެ މީހުންގެ މަރުކަޒުތަކަށް މިސައިލްތައް އެރުމުން" އެ ކަން ވިސްނޭނެކަމަށް އޭނާ ވިދާޅުވި އެވެ.
އީރާނުން އަސްކަރީ ހަތިޔާރު އުފައްދާ މިންވަރު، އެ ތަކެތި ބޭނުންކުރާ މިންވަރަށްވުރެ އިތުރުކަމަށް ވެސް އޭނާ ވިދާޅުވި އެވެ. އަދި, ކުރީގެ ދެ ހަނގުރާމައާ އަޅާބަލާއިރު ގައުމުގެ މިހާރުގެ ގާބިލުކަން ވަރަށް ބޮޑަށް އިތުރުވެފައިވާކަމަށް ފަދާވީ ވިދާޅުވި އެވެ.
ހުރްމުޒް ކަނޑުއޮޅިއަށް އިޝާރާތްކުރައްވައި ފަދާވީ ވިދާޅުވީ، އީރާނާއި އޮމާނުން ގުޅިގެން މި މުހިންމު ކަނޑުގެ މަގު ބެލެހެއްޓުމަށް ގަވާއިދުތަކެއް ހަދައި ތަންފީޒުކުރަން ޖެހޭކަމަށެވެ. އަދި, އެ ފަދަ ގަވާއިދުތަކެއް މިހާރު ވެސް ތައްޔާރުކުރެވި، އަމަލުކުރަން ފަށާފައިވާކަމަށް އޭނާ ވިދާޅުވި އެވެ.
ވޮޝިންގޓަނުން އެ ސަރަހައްދަށް އެމެރިކާގެ އުޅަނދުތައް ފޮނުވައިފިނަމަ، އީރާނުގެ ހަމަލާތަކުގެ ނުރައްކާ އެ އުޅަނދުތަކަށް ކުރިމަތިވާނެކަމުގެ އިންޒާރު ވެސް އޭނާ ދެއްވި އެވެ. "އެމެރިކާގެ އަސްކަރިއްޔާއަށް ނުތަނަވަސްކަން އުފެއްދޭނީ ހަމައެކަނި ވައިގެ މަގުން، އަދި ޔަގީނުން ވެސް ނުތަނަވަސްކަން އިތުރުވުމަކީ އެމެރިކާގެ ރައްޔިތުންނަށް އޭގެ ގެއްލުން ކުރިމަތިވާނެ ކަމެއް،" ފަދާވީ ވިދާޅުވި އެވެ.
އީރާނުން "އެއްވެސް ހާލެއްގައި އިސްލާމީ ޤައުމަކަށް ހަމަލާދީފައި ނުވާނެ" ކަމަށް ވެސް ފަދާވީ ވިދާޅުވި އެވެ. އޭގެ ބަދަލުގައި ތެހެރާނުން ހަމަލާދީފައި ވަނީ ގަލްފުގެ ޤައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ކަމަށް ވެސް އޭނާ ވިދާޅުވި އެވެ.
އޭނާ މި ފަދައިން ވިދާޅުވެފައި މި ވަނީ އެ ސަރަހައްދުގައި އެމެރިކާގެ އަސްކަރީ ހަރަކާތްތައް އިތުރުވެ، ވޮޝިންގޓަނާއި ތެހެރާނާ ދެމެދު އުފެދިފައިވާ ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ. އެމެރިކާއިން ފަހަކަށް އައިސް ވަނީ މެދުއިރުމައްޗަށް އަސްކަރީ މަނަވަރުތަކާއި އިތުރު ސިފައިން ފޮނުވާފަ އެވެ. މި ގޮތުން, މީގެ ތެރޭގައި އަސްކަރީ މަތިންދާބޯޓު އުފުލާ މަނަވަރާއި އެމްފިބިއަސް ފޯސް ނުވަތަ ކަނޑުމަގުން އެއްގަމަށް އަރައި ހަނގުރާމަކުރާ ސިފައިން ހިމެނޭއިރު، އެ ސަރަހައްދުގައިވާ މަރުކަޒުތަކާއި ފެސިލިޓީތަކުގައި ވައިގެ އަދި މިސައިލް ދިފާއީ ނިޒާމުތައް ވެސް ވަނީ ވަރުގަދަކޮށްފަ އެވެ.
މި ވަސީލަތްތައް ފޮނުވާފައި ވަނީ ވޮޝިންގޓަނާއި ތެހެރާނާ ދެމެދު އަސްކަރީ ކުރިމަތިލުންތަކެއް ހިނގަމުންދާ ދަނޑިވަޅެއްގަ އެވެ. މިއާއެކު, އީރާނުގެ ސަރަހައްދަށް ދޭ ހަމަލާތަކުގެ ރައްދުގައި މުޅި ސަރަހައްދުގައިވާ އެމެރިކާގެ މަރުކަޒުތަކާއި ކަނޑުގެ ވަސީލަތްތަކަށް ހަމަލާދީފާނެކަމުގެ އިންޒާރު އީރާނުން ވަނީ ތަކުރާރުކޮށް ދީފަ އެވެ. އެމެރިކާއިން އިސްވެ އީރާނާ ދެކޮޅަށް ޣައިރުގާނޫނީ ހަނގުރާމައެއް ފަށާފައި ވަނީ ފެބުރުވަރީ 28 ގަ އެވެ. މިއީ، ޞިހްޔޫނީން ރުއްސުމަށް ފެށި ހަނގުރާމައެކެވެ.
މަސްދަރު: އަނަދޮލު އޭޖެންސީ
