އަފްޣާނިސްތާނުގައި ދިން ޓެރަރިސްޓް ހަމަލާތަކެއްގައި 23 މީހަކު މަރުވެއްޖެ

އަފްޣާނިސްތާނުގެ އެކި ސަރަހައްދުތަކުގައި ދިން ޓެރަރިސްޓް ހަމަލާތަކެއްގައި 23 މީހަކު މަރުވެއްޖެއެވެ.

އަފްޣާނިސްތާނުގައި ހޮނިހިރު ދުވަހު ދިން މިހަމަލާތަކުގައި މަރުވި މީހުންގެ ތެރޭގައި ގިނައީ އެގައުމުގެ އަސްކަރިއްޔާ އަށް ނިސްބަތްވާ ސިފައިންނެވެ.

އެގޮތުން އެގައުމުގެ ހުޅަނގުގެ ފަރާހް ޕްރޮވިންސްގެ ބާލާ ބޮލޫކް ޑިސްޓްރިކްޓްގައި ހޮނިހިރު ދުވަހު ދިން ހަމަލާގައި އަފްޣާން ސިފައިންގެ 18 މީހަކު މަރުވެފައި ވެއެވެ. މިހަމަލާ ދީފައި ވަނީ އަސްކަރިއްޔާގެ ޗެކް ޕޮއިންޓަކަށް ވަދެގަތް ތާލިބާން ހަނގުރާމަވެރިން ކަމަށް ޚަބަރު ލިބެއެވެ.

މީގެ އިތުރުން އެގައުމުގެ ދެކުނުގެ ހެލްމަންޑް ޕްރޮވިންސްގައި އަމިއްލަ އަށް މަރުވެގެން ދިން ކާރު ބޮމުގެ ދެ ހަމަލާއެއްގައި ސިފައިންގެ ދެ މީހަކު މަރުވެ، ގިނަ އަދަދެއްގެ ބަޔަކު ޒަޚަމްވެފައިވާ ކަމަށް ރިޕޯޓްތައް ބުނެއެވެ.

މީގެ ތެރެއިން ފުރަތަމަ ހަމަލާގައި ހެލްމަންޑް ޕްރޮވިންސްގެ ނާދް އަލީ ޑިސްޓްރިކްޓްގައި ހުންނަ އަސްކަރީ ބޭސްއަކަށް ތާލިބާން ހަނގުރާމަވެރިން އަސްކަރީ އުޅަނދެއް ބޭނުން ކޮށްގެން ވަދެ ހަމަލާ ދިނުމަށް މަސައްކަތް ކުރަނިކޮށް، އެއީ ހަނގުރާމަވެރިންގެ އުޅަނދެއްކަން އެނގިގެން ސިފައިންގެ ބަޔަކު ވެހިކަލް ފައްސާލިއެވެ. އެހެންނަމަވެސް، އެ ވެހިކަލް ފައްސާލުމާ އެކު އަމިއްލަ އަށް މަރުވެގެން ދިން ބޮމުގެ ހަމަލާގައި ސިފައިންގެ ދެ މީހަކު މަރުވެފައި ވެއެވެ. އަސްކަރީ ބޭސްގެ ތެރެއަށް ވަދެ އެހަމަލާ ދެވުނު ނަމަ، މިހަމަލާގައި މަރުވި މީހުންގެ އަދަދު އިތުރުވުން އެކަށީގެންވާ ކަމަށް ރިޕޯޓްތައް ބުނެއެވެ.

މީގެ އިތުރުން ހެލްމަންޑް ޕްރޮވިންސްގެ ވެރިރަށް ލަޝްކަރް ގަހްގައި ހުންނަ ފުލުހުންގެ ހެޑްކުއާޓަރގެ ކައިރީގައި ހުންނަ އެންޑީއެސް ކޮމްޕައުންޑެއްގައި ދިން ކާރު ބޮމުގެ ހަމަލާގައި ހަތް މީހަކު ޒަޚަމްވެފައި ވެއެވެ.

ވެރިރަށް ކާބުލްގެ ޑިޕްލޮމެޓިކް އޭރިއާގެ ކައިރީގައި ހޮނިހިރު ދުވަހުގެ ހެނދުނު އަމިއްލަ އަށް މަރުވެގެން ދިން ހަމަލާގައި އާއްމުންގެ ތިން މީހަކު މަރުވިއެވެ. މިހަމަލާގެ ޒިންމާ، އިރާގާއި ސީރިއާގައި ހަރަކާތްތެރިވާ ހަނގުރާމަވެރި ޖަމާއަތް އިސްލާމިކް ސްޓޭޓް (އައިއެސް) އިން ވަނީ ނަގާފައެވެ.

އަފްޣާނިސްތާނުގެ ދާޚިލީ ވުޒާރާގެ ތަރުޖަމާނު ނަޖީބު ދާނިޝް ވިދާޅުވީ، ކާބުލްގެ ޝަޝް ޑަރަކް އޭރިއާގައި ބޮމުގެ ހަމަލާ ދީފައި ވަނީ ގްރީން ޒޯން ވަކި ކުރާ ބޯޑަރުގެ ކައިރީގައި ކަމަށެވެ.

އެސަރަހައްދަކީ އަފްޣާނިސްތާނުގައި ހަރަކާތްތެރިވާ ނޭޓޯގެ ފައުޖުތަކުގެ ހެޑްކުއާޓަރާއި ކައިރި ހިސާބެކެވެ. އަދި އަފްޣާނިސްތާނުގައި ހުންނަ އެމެރިކާގެ އެމްބަސީ ވެސް ހުންނަނީ އެތަނާއި ދުރުނޫން ހިސާބެއްގައި ކަމަށް މައުލޫމާތު ލިބެއެވެ.

އަފްޣާނިސްތާނުގެ ދާޚިލީ ވުޒާރާ އިން ވަނީ، އެ ހަމަލާގައި ހަ މީހަކު ޒަޚަމްވެފައިވާ ކަމަށާއި، އޭގެ ތެރެއިން ދެމީހެއްގެ ހާލު ސީރިއަސް ކަމަށް ބުނެފައެވެ.

މިއަހަރުގެ މިހާތަނަށް އަފްޣާނިސްތާނުގެ އެކި ކަންކޮޅުތަކުގައި ދިން ހަމަލާތަކުގައި ސަތޭކަ އަށް ވުރެ ގިނަ މީހުން ވަނީ މަރުވެފައެވެ.

އަފްޣާނިސްތާނުގައި އެކި ސަރަހައްދުތައް ކޮންޓްރޯލް ކުރާ ތާލިބާން ޖަމާއަތުގެ ހަނގުރާމަވެރިންނާއި ދެކޮޅަށް އަފްޣާނިސްތާނުގެ އަސްކަރިއްޔާ އާއި އެމެރިކާ އިސްވެ އޮވެ އުފައްދާފައިވާ ގުޅިފައިވާ ފައުޖުތަކުން ހަނގުރާމަ ކުރަމުން ދިޔަ ނަމަވެސް، ހަނގުރާމަވެރިންގެ ހަމަލާތައް ގިނަވެ، އެގައުމުގެ ސަލާމަތީ ކަންކަން ދަނީ ދުވަހަކަށް ވުރެ ދުވަހެއް ގޯސްވަމުންނެވެ.

އެގޮތުން ޖެނުއަރީ މަހުގެ 21 ވަނަ ދުވަހު ކާބުލްގެ އިންޓަރކޮންޓިނެންޓަލް ހޮޓެލް އަށް ތާލިބާން ހަނގުރާމަވެރިން ދިން ހަމަލާއެއްގައި 20 މީހަކު މަރާލާފައި ވެއެވެ.

އޭގެ ތިން ދުވަސް ފަހުން ޖެނުއަރީ މަހުގެ 24 ވަނަ ދުވަހު އަފްޣާނިސްތާނުގެ އިރުމަތީގެ ސަހަރެއް ކަމަށްވާ ޖަލާލްއާބާދުގައި އައިއެސްގެ ހަނގުރާމަވެރިން ދިން ހަމަލާއެއްގައި ތިން މީހަކު މަރުވިއެވެ. އަދި ޖެނުއަރީ މަހުގެ 27 ވަނަ ދުވަހު، ގޮވާތަކެތިން ފުރާފައިވާ އެމްބިއުލާންސެއްގައި ދުއްވި ތާލިބާންގެ ހަނގުރާމަވެރިޔަކު ކާބުލްގެ މެދުތެރޭގައި ދިން ހަމަލާއެއްގައި 103 މީހަކު މަރުވެ، 235 މީހަކު ޒަޚަމްވެފައި ވެއެވެ.

އޭގެ އެއް ދުވަސް ފަހުން ކާބުލްގައި ހުންނަ އަސްކަރީ އެކަޑަމީއަކަށް ދިން ބަޑީގެ ހަމަލާއެއްގައި އަފްޣާނިސްތާން ސިފައިންގެ 11 މީހަކު މަރާލާފައި ވެއެވެ.

އަފްޣާނިސްތާނުގައި ހަނގުރާމަވެރިން ދޭ ހަމަލާތައް އިތުރުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ ކުރިއަށް އޮތް ހަފްތާތަކުގެ ތެރޭގައި އެމެރިކާގެ ފައުޖުތަކަށް އިތުރު ތިން ހާސް ސިފައިން އަފްޣާނިސްތާނަށް ފޮނުވުމަށް ނިންމާފައިވާކަން ހާމަކޮށްފައެވެ. އެނިންމުމާ އެކު އަފްޣާނިސްތާނުގައި ގާއިމްވެ ތިބޭ އެމެރިކާ ސިފައިންގެ އަދަދު 14 ހާހަށް އަރާނެއެވެ.

އެހެންނަމަވެސް، ހަނގުރާމަވެރިންގެ ހަމަލާތައް ވަރުގަދަވެ، ހަމަލާތައް ގިނަ ކޮށްފައިވާއިރު، 16 އަހަރަށް ދިގުދެމިގެން ގޮސްފައިވާ ހަނގުރާމަ ކާމިޔާބު ކުރުމުގައި އެމެރިކާގެ ރައީސް ގެންގުޅުއްވާ ސިޔާސަތުތަކާ މެދު ގިނަ ބަޔަކު ދަނީ ސުވާލު އުފައްދަމުންނެވެ.