ފަލަސްތީނުގެ ރައީސް މަހުމޫދު އައްބާސް އެމެރިކާގެ ހޮސްޕިޓަލެއްގައި ފަރުވާ ހޯއްދަވަނީ!

ފަލަސްތީނުގެ ރައީސް މަހުމޫދު އައްބާސް، އެމެރިކާގެ ހޮސްޕިޓަލަކުން ފަރުވާ ހޯއްދަވަމުންދާ ކަމަށް ރޮއިޓަރސް އިން ބުނެފި އެވެ.

ފަލަސްތީނުގެ އިސް އޮފިޝަލަކާއި ހަވާލާދީ ރޮއިޓަރސް އިން ބުނީ، އެމެރިކާގެ ހޮސްޕިޓަލަކަށް އައްބާސް ވަޑައިގެންނެވީ، ރޫޓިން ޗެކްއަޕް އެއް ހެއްދެއްވުމަށް ކަމަށެވެ. އެހެން ނަމަވެސް، އެކަމާއި ގުޅޭ އިތުރު ތަފްސީލް ދެއްވާފައެއްނުވެއެވެ.

އުމުރުފުޅުން 82 އަހަރުގެ އައްބާސް، އެމެރިކާ އަށް ވަޑައިގެންނެވީ ފެބްރުއަރީ މަހުގެ 20 ވަނަ ދުވަހު އެމެރިކާގެ ނިއު ޔޯކްގައި ބޭއްވި އދ.ގެ ސަލާމަތީ މަޖިލީހުގެ ބައްދަލުވުމެއްގައި ބައިވެރިވެވަޑައިގަތުމަށެވެ. މިބައްދަލުވުމުގައ އައްބާސް ވަނީ، އިޒްރޭލާއި ފަލަސްތީނާއި ދެމެދު ސުލްހައިގެ ވާހަކަތައް އަލުން ފެށުމަށް، މިއަހަރުގެ މެދުތެރޭގައި ބައިނަލްއަޤްވާމީ ބައްދަލުވުމެއް ބޭއްވުމަށް ހުށަހަޅާފައެވެ.

އަދި އެބައްދަލުވުމަށް ފަހު ފެބްރުއަރީ މަހުގެ 21 ވަނަ ދުވަހު، ވެނެޒުއޭލާ އަށް ރަސްމީ ދަތުރުފުޅެއް ފެށްޓެވުމަށް ކުރިން ތާވަލް ކޮށްފައިވާ ކަމަށް އައްބާސްގެ އޮފީހުން މައުލޫމާތު ދެއެވެ.

އާއްމުކޮށް އެންގުމަކާއި ނުލައި 2016 ވަނަ އަހަރުގެ އޮކްޓޯބަރ މަހުގެ ތެރޭގައިވެސް، ކުއްލި ގޮތަކަށް ހިތުގެ ޓެސްޓުތަކެއް ހެއްދެވުމަށް ހުޅަނގު އައްސޭރީގެ ހޮސްޕިޓަލެއްގައި އައްބާސް އެނދުމަތި ކުރިއެވެ. އެހެން ނަމަވެސް ހިތުގެ ހިނގުމާއި ގުޅޭ އެ ޓެސްޓްތަކުން އާދަޔާޚިލާފް ކަމެއް ފާހަގަވެފައިނުވާ ކަމަށް ޑޮކްޓަރުން ވަނީ ނިންމާފައެވެ.

ފަލަސްތީނުގެ ރައީސްގެ މަގާމާއި މަހްމޫދު އައްބާސް ހަވާލުވެވަޑައިގެންނެވީ، ފަލަސްތީނުގެ ކުރީގެ ރައީސް ޔާސިރު އަރަފާތު 2004 ވަނަ އަހަރު އަވަހާރަވުމަށް ފަހު އެވެ.

އދ.ގައި ވާހަކަ ދެއްކެވުމަށް ފަހު، ގައުމުތަކުގެ ވަފްދުތަކާއި ފެބްރުއަރީ މަހުގެ 20 ވަނަ ދުވަހު ބޭއްވި ބައްދަލުވުންތަކަށް ފަހު، މަހުމޫދު އައްބާސް އާ ގުޅޭ އެއްވެސް ޚަބަރެއް، ފަލަސްތީނުގެ ރަސްމީ ނޫސް އޭޖެންސީ ވަފާ އިން ގެނެސްދީފައެއް ނުވެއެވެ. ވަފާ ނޫހުގައި ފަލަސްތީނުގެ ރިޔާސަތާއި ގުޅޭ ޚަބަރެއް ނުހިމެނި 48 ގަޑިއިރަށް ވުރެ އިތުރުވުމަކީ ވަރަށް މަދުން ނޫނީ ނުވާ ކަމެކެވެ.