ގައުމުތަކުން ނެރޭ ބަޔާންތަކަކީ ބޭކާރު އެއްޗެއްގެ ގޮތުގައި ސަރުކާރުން ސިފަކޮށްފި
22 ފެބުރުއަރީ 2018 | ބުރާސްފަތި 13:57ފެބްރުއަރީ 1ގައި ސުޕްރީމް ކޯޓުން ނެރުނު އަމުރު ތަންފީޒުކުރުމަށް ބޭރުގެ ގައުމުތަކުން އަންނަނީ ގޮވާލަމުން
އީޔޫގެ ވަފުދާއި ފޮރިން މިނިސްޓްރީ އިން ބައްދަލުކުރަނީ
ރާއްޖޭގެ ސިޔާސީ މަސްރަހުގައި މިހާރު ނިއުޅެމުންދާ ކަންކަމާ ބެހޭ ގޮތުން އެކި ގައުމުތަކުން ނެރެމުންދާ ބަޔާންތަކީ ބޭކާރު އެއްޗެއްގެ ގޮތުގައި ދިވެހި ސަރުކާރުން ސިފަކޮށްފިއެވެ.
ފޮރިން މިނިސްޓްރީގެ ރަސްމީ ޓްވިޓާ އެކައުންޓުންކޮށްފައިވާ ޓްވީޓެއްގައި ވަނީ ބައިނަލްއަގްވާމީ ފަރާތްތަކާއި އެކި ގައުމުތަކާ އެކު މި މައްސަލަ ހައްލުކުރެއްވުމުގެ މަސައްކަތް ކުރަމުންދާ ކަމަށާއި ވަކިން ހާއްސަކޮށް އަވަށްޓެރި އިންޑިއާ އެކު މަސައްކައް ކުރެވެމުންދާ ކަމަށް ބުނެފަވެ. ހަމައެހެންމެ ގައުމުތަކުގެ ކަންބޮޑުވުންތައް ހިއްސާކުރުމަށް މި ޓްވީޓްގައި ފޮރިން މިނިސްޓްރީ އިން ގޮވާލާފައިވާއިރު ގައުމުތަކުން ނެރެމުންދާ ބަޔާންތަކުން މައްސަލަ ހައްލުކުރުމަށް އެއްވެސް އެހީތެރިކަމެއް ނުލިބޭ ކަމަށް ވެސް އެ މިނިސްޓްރީ އިން ބުނެފައި ވެއެވެ. މި ޓްވީޓްގައި ވަނީ ފޮރިން މިނިސްޓްރީގެ ބަޔާނެއް ވެސް އެޓޭޗްކޮށްފައެވެ.
ފޮރިން މިނިސްޓްރީގެ މި ޓްވީޓަށް ގިނަ ބަޔެއްގެ ބޮޑެތި ފާޑުކިޔުންތަކެއް އަންނަނީ އަމާޒުވަމުންނެވެ. އެގޮތުން ޑރ. ފަރަހަނާޒް ފައިސަލް ވަނީ ރާއްޖޭގެ ސަރުކާރުން ބައިނަލްއަގްވާމީ ދުނިޔޭގެ ހިޔާލު ފާޅުކުރުމުގެ މިނިވަންކަމަށް އަރައިގަންނަނީތޯ ސުވާލު އުފައްދަވާފައެވެ. ހަމައެހެންމެ މިއީ ޑިކްޓޭޓެރެއްގެ ފަރާތުން ފެންނާނެ ސިފައެއްގެ ގޮތުގައި ވެސް ފަރަހަނާޒް ވަނީ ސިފަކުރައްވާފައެވެ.
ރާއްޖޭގެ ފޮރިން މިނިސްޓްރީ އިން މިފަދައިން ބުނެފައިވާއިރު ސުޕްރީމް ކޯޓުން ފެބްރުއަރީ މަހުގެ ފުރަތަމަ ދުވަހު ނެރުނު އަމުރު ތަންފީޒުކުރުމަށް ސަރުކާރުން ދެކޮޅު ހެދުމާ ގުޅިގެން އެކި ގައުމުތަކުން ވަނީ އެ އަމުރު ތަންފީޒުކުރުމަށް ގޮވާލާ އެތަކެއް ބަޔާންތަކެއް ނެރެފައެވެ. ވަކިން ހާއްސަކޮށް އިންޑިއާ އިން ވަނީ އެ އަމުރު އޮތްގޮތަށް ތަންފީޒުކުރުމަށް އެތަކެއް ފަހަރުމަތިން ގޮވާލާފައެވެ. އެހެން ނަމަވެސް މި ހުރިހާ ގޮވާލުންތަކަށް ވެސް ސަރުކާރުން ދީފައިވަނީ ބީރު ކަންފަތެކެވެ.
