ޢަރަބް އިސްލާމިކް އެމެރިކަން ސަމިޓްގެ ހަވާސާގައި ގައުމުތަކުން އިސްވެރިންނާ ރައީސް ޔާމީން ބައްދަލު ކުރައްވައިފި

ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްގައްޔޫމް، ސައޫދީ ޢަރަބިއްޔާގެ ރިޔާޟްގައި މި މޭ މަހުގެ 21 ވަނަ ދުވަހު ކުރިއަށްދިޔަ "ޢަރަބް އިސްލާމިކް އެމެރިކަން ސަމިޓް"ގެ ހަވާސާގައި، ދުނިޔޭގެ ގިނަ ގައުމުތަކުގެ އެންމެ އިސްވެރިންނާއި، ގައުމުތަކުގެ މަންދޫބުންނާ ބައްދަލުކުރައްވައިފިއެވެ.

ރައީސް އޮފީހުން ބުނީ ވަކިވަކިން އޮތް މި ބައްދަލުކުރެއްވުންތަކުގައި، އެ ގައުމުތަކާއި ދިވެހިރާއްޖެއާ ދެމެދު އޮތް ގާތް ގުޅުން އިތުރަށް ބަދަހި ކުރެއްވުމާ ގުޅޭ ގޮތުން މަޝްވަރާ ކުރެއްވި ކަމަށެވެ.

Advertisement

ރައީސުލްޖުމްހޫރިއްޔާ އާ ބައްދަލުކުރެއްވި ދުނިޔޭގެ ޤައުމުތަކުގެ އިސްވެރިންނާއި މަންދޫބުންގެ ތެރޭގައި:

- ލުބުނާނުގެ ބޮޑުވަޒީރު ސަޢުދް އަލްހަރީރީ - އިރާޤްގެ ނައިބު ރައީސް ޚުދެއިރު އަލްޚުޒާއީ - ކުވޭތުގެ އަމީރު ޞަބާޙް އަލް-އަޙްމަދު އަލް-ޖާބިރު އަލް-ޞަބާޙް - ޤަޠަރުގެ ޢަމީރު ޝެއިޚް ތަމީމް ބިން ޙަމަދު އަލް-ޘާނީ - ޕާކިސްތާނުގެ ބޮޑުވަޒީރު ނަވާޒް ޝަރީފު - ބަންގްލަދޭޝްގެ ބޮޑުވަޒީރު ޝައިޚް ޙަސީނާ - މެލޭޝިޔާގެ ބޮޑުވަޒީރު ނަޖީބް ރަޒަކް - ކިރްގިސްތާނުގެ ފަސްޓް ޑެޕިޔުޓީ ޕްރިމިއަރ މުޙައްމަދު ޣާލީ ޢަބުލް-ގައިވް - އަފްޣާނިސްތާނުގެ ރައީސް އަޝްރަފް ޣަނީ އަޙުމަދުޒާއީ - މިޞްރުގެ ރައީސް ޢަބްދުލްފައްތާޙް އަލް-ސީސީ ހިމެނިވަޑައިގަންނަވައެވެ.

މީގެ އިތުރުން، ސަމިޓްގެ އެންމެ އިސް ދެ ގައުމުގެ ވެރިން ކަމުގައިވާ ސަޢޫދީ ޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލް-ސަޢޫދާއި، އެމެރިކާގެ ރައީސް ޑޮނަލްޑް ޓްރަމްޕްއާ، ސަމިޓުގެ ހަވާސާގައި ރައީސުލްޖުމްހޫރިއްޔާ ބައްދަލުކުރައްވައި، އެބޭފުޅުންނާ އެކުވެސް މަޝްވަރާކުރެއްވި ކަމަށް ރައީސް އޮފީހުން ބުނެއެވެ.

އެސަމިޓުގައި ރައީސް ޔާމީން ބައިވެރިވެވަޑައިގެންވި ބައެއް ފޮޓޯފުޅުތަކާއި ސައޫދީ ޢަރަބިޔާގައި ހުންނަ ދިވެހިރާއްޖޭގެ އެމްބަސީއަށް ޒިޔަރާތްކުރެއްވި ބައެއް ފޮޓޯފުޅުތައް ރައީސް އޮފީހުން އާއްމު ކުރެއްވި ނަމަވެސް ދުނިޔޭގެ ގައުމުގެ ތަކުގެ އިސްވެރިންނާއި ވަކިވަކި ބޭއްވި ބައްދަލު ކުރެއްވުންތަކުގެ ފުޓޯފުޅުތަކެއް ރައީސް އޮފީހުން އާއްމެއް ނުކުރެ އެވެ.