ކ. ތިލަފުށީގައި އިންސިނެރޭޓަރު ބެހެއްޓުމުގެ މަސައްކަތް އެންވަޔަރަމެންޓް މިނިސްޓްރީގެ ފަރާތުން ބަޔަކާ ޙަވާލުކޮށްފިއެވެ.

އެގޮތުން މި މަސައްކަތް ޙަވާލުކޮށްފައި ވަނީ ސްރީލަންކާގެ ކުންފުންޏެއް ކަމަށްވާ އެސްއޭޑަބްލިއު އިންޖިނިއަރިންގ ޕްރައިވެޓް ލިމިޓެޑާއެވެ.

އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ، ޠާރިޤް އިބްރާހީމެވެ. އަދި އެސްއޭޑަބްލިއު އިންޖިނިއަރިންގ ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އޭ.ޕީ ޖަޔަރަތްނާ އެވެ.

މަސައްކަތުގެ ޖުމްލަ އަގަކީ 2,399,789.80 (2.3 މިލިއަން ޑޮލަރު) އެވެ. އަދި މި މަސައްކަތް ނިންމުމަށް ހަމަޖެހިފައި ވަނީ ފަސް މަސް ދުވަހުގެ ތެރޭގައެވެ.

އެއްބަސްވުމުގައި ސޮއި ކުރެއްވުމަށް މިނިސްޓަރު ތޯރިގް ވިދާޅުވީ ރާއްޖޭގެ ރަށްރަށުގައި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ނިޒާމްތަކެއް އެކުލަވާލުމުގެ މަސައްކަތް މިނިސްޓްރީން ކުރަމުން އަންނަ ކަމަށެވެ. މިގޮތުން މި މަސައްކަތްތަކުގެ ތެރޭގައި ކުރިމަތިލާންޖެހުނު އެންމެ ބޮޑު އެއް ގޮންޖެހުން ކަމުގައި ފާހަގަކުރެވިފައި ވަނީ ގްރޭޓަރ މާލެ ރީޖަންގެ ކުނި މެނޭޖުކުރުމުގެ ނިޒާމެއް ޕްލޭންކޮށް އެކުލަވާލުމުގެ މަސައްކަތް ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ މާލެ ސަރަހައްދުގެ ކުނީގެ މައްސަލައަށް އަވަސް ޙައްލެއް ހޯދުމަށް ރައީސުލް ޖުމްހޫރިއްޔާ ޚާއްސަ އިސްކަމެއް ދެއްވައިގެން އެކަން ޙައްލުކުރެވޭނެ ގޮތްތަކެއް ހޯއްދެވުމަށް މަޝްވަރާތަކެއް ކުރެވިފައިވާ ކަމަށެވެ. އެގޮތުން ތިލަފުށީގައި މިހާރު ކުރިއަށްގެންދާ އުޞޫލުން ނުރައްކާތެރި ގޮތުގައި ކުނި އެންދުމުގެ މަސައްކަތް ވީ އެންމެ އަވަހަކަށް ހުއްޓާލުމަށްޓަކައި އެތަނުގައި 20 ޓަނުގެ އިންސިނެރޭޓަރެއް މިހާރުން މިހާރަށް ޤާއިމުކޮށް އެސިސްޓަމް ބޭނުންކޮށްގެން މިވަގުތަށް ކުނި މެނޭޖް ކުރުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވާ ކަމަށް މިނިސްޓަރު ވިދާޅުވިއެވެ.

މީގެއިތުރުން އއ. އަތޮޅާއި އދ. އަތޮޅާއި އަދި ވ .އަތޮޅުގެ އިތުރުން މާލެ އަތޮޅުގެ މީހުން ދިރިއުޅޭ ހުރިހާ ރަށެއް ހިމެނޭ ގޮތަށް ސަރަޙައްދީ ކުނިމެނޭޖްކުރުމުގެ ސިސްޓަމެއް އެކުލަވާލުމަށް ބޭނުންވާ މަޝްރޫޢެއް އެކުލަވާލާ، އޭޑީބީ އާއި އައިއައިބީ އާއި އެހީދޭ އެކި ޖަމާޢަތްތަކާ އެކު  މަޝްވަރާކުރެވިފައިވާ ކަމަށް މިނިސްޓަރު ތޯރިގް ވިދާޅުވިއެވެ.

މިނިސްޓަރު ވިދާޅުވީ 2018 ވަނައަހަރު ތިލަފުށީގައި ހާމަކޮށް ކުނި އެންދުން ހުއްޓާލައި، އެކަމުގެ ސަބަބުން މާލެ އާއި ވިލިމާލެ އަދި މިސަރަޙައްދުގެ ރިސޯޓުތަކަށް ދުމުގެ ސަބަބުން ކުރާ ނޭދެވޭ އަސަރުތަކުން ރައްޔިތުންނާއި ފަތުރުވެރިންނާ މަސައްކަތްތެރިން ސަލާމަތްކުރެވިގެން ދާނެ ކަމަށެވެ. އަދި މި ޕްރޮޖެކްޓަށް 126 މިލިޔަން ޑޮލަރު ހަރުދުވާނެ ކަމަށް ވެސް މިނިސްޓަރު ތޯރިގް ވިދާޅުވިއެވެ.

މި ޕްރޮޖެކްޓް ކުރިއަށް ގެންދިއުމަށް މިހާތަނަށް ކުރެވުނު މަޝްވަރާތަކުގައި މިކަމަށް ކުރިމަގެއް ފެނިދާނެކަމުގެ ފެހި ސިގްނަލެއް ލިބިފައިވާ ކަމަށާއި  އަދި 2018 ވަނަ އަހަރު މިމަސްކަތް ފަށައިގަނެވިއްޖަ ނަމަ ރާއްޖޭގެ ތިމާވެއްޓާއި ރައްޔިތުންގެ ދުޅަހެޔޮ ސިއްޙަތުގެ ރައްކައުތެރިކަން ޔަޤީންކުރެވި، ކުނީގެ ސަބަބުން ރާއްޖޭގެ އިޤްތިޞާދަށް ކޮށްފާނެ ނޭދެވޭ އަސަރުތަކަކުން ރާއްޖެ ސަލާމަތްކުރެވިގެންދާނެ ކަމަށް މިނިސްޓަރު ތޯރިގް ވިދާޅުވިއެވެ.

ކުމނި މޭޖް ކުރުމަށް ސަރުކާރުން ކުރަމުންދާ މަސައްކަތްތަކާ ގުޅޭ ގޮތުން ވާހަކަ ދައްކަމުން މިނިސްޓަރު ތޯރިގް ވިދާޅުވީ ޒޯން 3 ގައި ޤާއިމްކުރުމަށް ހަމަޖެހިފައިވާ ރީޖަނަލް ވޭސްޓް މެނޭޖްމަންޓް ނިޒާމް ޤާއިމް ކުރުމުގެ މަޝްރޫޢަކީ، މާލޭ ސަރަޙައްދާއި، މި ރީޖަންގައި ހިމެނޭ މީހުން ދިރިއުޅޭ ރަށްތަކާއި، ރިސޯޓުތަކާއި، ޞިނާޢީ ރަށްތައް ހިމެނޭ ގޮތުން މުޅި ސަރަޙައްދުގެ ކުނީގެ މައްސަލަ ޙައްލު ކުރުމަށް ޚާއްސަ އިސްކަމެއް ދީގެން ކުރިއަށް ގެންދިއުމަށް ނިންމާފައިވާ މަޝްރޫއެއް ކަމަށެވެ.