ޝެއިޚް އިމްރާން ވަގުތުން ދޫކޮށްލުމަށް 40 ދީނީ އިލްމުވެރިއަކު ގޮވާލައްވައިފި

އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވަގުތުން ދޫކޮށްލުމަށް 40 އިލްމުވެރިއަކު ގޮވާލައްވައިފިއެވެ.

ޝެއިޚް އިމްރާން ވަގުތުން ދޫކޮށްލުމަށް، ރާއްޖޭގައި ތިއްބެވި ފުންނާބުއުސް 40 އިލްމުވެރިންގެ ފަރާތުން ނެރެފައިވާ ބަޔާނުގައި ވަނީ ޝެއިޚް ޢިމްރާނުގެ މައްޗަށް ޓެރެރިޒަމްގެ ކުށުގެ ތުހުމަތެއްގައި 12 އަހަރު ދުވަހުގެ ޖަލު ހުކުމެއް ތަންފީޒުކުރައްވަން ޖެހިވަޑައިގެންފައިވުމަކީ އިލްމުވެރިން ކަންބޮޑުވާ ކަމެއް ކަމަށެވެ. އަދި އެކަމުގެ ސަބަބުން ދިވެހިރާއްޖޭގެ އިސްލާމީ ދަޢުލަތަށާއި އަދި އިސްލާމީ އުޞޫލުތަކާ އެއްގޮތްވާ ގޮތުގެ މަތިން ދިވެހި ދައުލަތުގެ ކަންކަން ހިންގުމަށްކުރެވޭ މަސައްކަތަށް ބޮޑު ހީނަރުކަމެއް އައިސްފައިވާ ކަމަށް ބަޔާނުގައި ވެއެވެ. ޝެއިޚް އިމްރާންގެ މައްޗަށް ހިންގި ޝަރީޢަތުގެ މުޅި އިޖުރާއާތް ބިނާކޮށްފައި ވަނީ، ތުހުމަތުކުރެވޭ ފަރާތާއި އަދި ދިފާޢީ ވަކީލުންނާ ވެސް ޙިއްސާ ނުކުރެވޭ އިންޓެލިޖެންސް ރިޕޯޓުތަކާއި އަދި ސުވާލުކުރެވޭނެ އެކަށީގެންވާ ފުރުޞަތު ނުލިބޭހެން ހުށަހެޅި ސިއްރު ހެއްކެއްގެ މައްޗަށް ކަމަށް ވާއިރު، އިސްލާމީ ޝަރީޢަތުގައި ހެއްކަކީ ބަޔާންވެގެންވާ ވާޟިޙް އެއްޗެއް ކަމަށް އޮންނަ އުޞޫލާ މިކަން ފުށޫއަރާ ކަމަށް ބަޔާނުގައި ވަނީ ބުނެފައެވެ. އެހެންކަމުން އިސްލާމީ ޝަރީޢަތުގައި ޖިނާއީ މައްސަލަތަކުގައި އެއްވެސް ޝައްކެއް ނެތް މިންވަރަށް ކުށްސާބިތުކުރުމަށް އޮންނަ ހަރުދަނާ މިންގަނޑަށް ފެތޭމިންވަރަށް ޝެއިޚް ޢިމްރާނުގެ މައްޗަށް ކުށްސާބިތުކުރެވިފައިވާ ކަމަށް ގަބޫލުކުރެވޭނެ ޖާގައެއް ނެތް ކަމުން ޝެއިޚް އިމްރާން ވަގުތުން ދޫކޮށްލުމަށް އިލްމުވެރިން ވަނީ ގޮވާލައްވާފައެވެ.

އެ ބަޔާނުގައި ބުނެފައިވަނީ ޝެއިޚް އިމްރާނުގެ މައްޗަށް ކޮށްފައިވާ ހުކުމަކީ އިސްލާމީ ޝަރީޢަތުގައި އެމީހަކު ނުކުރާ ކަމަކަށް އެމީހަކު ޒިންމާވާން ނުޖެހޭ އަދި ނުކުރާ ކުށަކަށް އަދަބު ލިބެން ނުޖެހޭ ކަމަށް އޮންނަ އުޞޫލާ ފުށުއަރާ ހުކުމެއް ކަމަށެވެ. އަދި ކުށުން ބަރީއަވުމުގެ ފުރުޞަތަކީ އިސްލާމީ ޝަރީޢަތުގައި އެންމެ ފަހު ވަގުތާ ހަމައަށް ވެސް ތަނަވަސްވެފައި އޮންނަ ފުރުޞަތަކަށް ވާހިނދު، ޚާއްޞަކޮށް މިފަދަ ބޮޑު ޖިނާއީ ޝަރީޢަތެއްގައި ދިފާޢީ ހެކި ހުށަހެޅުމުގެ ފުރުޞަތަށް ޝަރީޢަތުން އިންކާރުކޮށްފައި ވުމަކީ އިސްލާމީ ޝަރީޢަތުގެ މިންގަނޑުން ބަލާއިރު ޝަރީޢަތުގެ ޢަދުލުވެރިކަން އެކީ ނިގުޅައިގަނެވޭ ކަމެއް ކަމަށް ފާހަގަކޮށްފައި ވެއެވެ.

އެހެން ކަމުން އިސްލާމި ޝަރީޢަތުގެ މިންގަނޑުތަކުން ބަލާއިރު ޝެއިޚް އިމްރާނަށް ކޮށްފައިވާ ހުކުމަކީ އެމަނިކުފާނުގެ މައްޗަށް ޝަރީޢަތް ހިނގުމުގައްޔާއި އަދި ކުށް ސާބިތުކުރުމުގައި ވެސް ބޮޑެތި މައްސަލަތަކެއް ހުރިކަން ފާހަގަކުރެވޭތީ، ފުރިހަމަ ކުރަންޖެހޭ އިޖުރާއާތުތައް ފުރިހަމަކުރުމަށް ފަހު ލަސްނުކޮށް ވީ އެންމެ އަވަހަކަށް ޝައިޚް ޢިމްރާން ޢަބްދުﷲ މިނިވަންކުރުމަށް ދައުލަތުގެ ކަމާ ގުޅުން ހުރި އެންމެހާ މުއައްސަސާތަކަށް އެ 40 އިލްމުވެރިން ވަނީ ގޮވާލައްވާފައެވެ.

ޝެއިޚް އިމްރާން ވަގުތުން ދޫކޮށްލުމަށް ގޮވާލެއްވި ދީނީ އިލްމުވެރިންގެ ލިސްޓު

ޝެއިޚް އިމްރާން ވަގުތުން ދޫކޮށްލުމަށް ގޮވާލެއްވި ދީނީ އިލްމުވެރިންގެ ލިސްޓު

"29 ސެޕްޓެމްބަރ 2015 ވަނަ ދުވަހު ރައީސުލްޖުމްހޫރިއްޔާ އެކުލަވާލެއްވި ރިޔާސީ ކޮމިޝަނުން 25 ފެބްރުއަރީ 2016 ވަނަ ދުވަހު ހާމަކޮށްފައިވާ މަޢުލޫމާތުތަކުން ޝެއިޚް އިމްރާންގެ މައްޗަށް ތުހުމަތުކުރެވުނު ކަންކަން ހިންގާފައިވަނީ ކޮން ބައެއްކަން އޮޅުންފިލާފައި ވާތީ އާއި، ދިވެހިރާއްޖޭގެ ޝަރުޢީ މަރުޙަލާގެ އެންމެ ފަހު ބަސްބުނާ ފަރާތަކީ ދިވެހިރާއްޖޭގެ ސުޕްރީމް ކޯޓު ކަމަށްވެފައި މިމައްސަލައަށް ޚާއްޞަކުރެވިގެން ދިވެހިރާއްޖޭގެ ސުޕްރީމް ކޯޓުން ފައިސަލާކުރަނިވި ޙުކުމެއް ކޮށްފައި ނުވާތީ އާއި، އަދި ޤާނޫނާ ޚިލާފަށް މީހުން ހިފާ ހައްޔަރުކުރުމާގުޅޭ މައްސަލަތައް ބަލާ އދ. ގެ ވޯކިން ގުރޫޕުން، ފަޟީލަތުއްޝައިޚް ޢިމްރާން ޢަބްދުﷲ ހައްޔަރުކުރުމުގައްޔާއި އަދި އެމަނިކުފާނުގެ މައްޗަށް ޝަރީޢަތް ހިނގުމުގައްޔާއި އަދި ކުށް ސާބިތުކުރުމުގައި ވެސް ބޮޑެތި މައްސަލަތަކެއް ހުރިކަން ފާހަގަކޮށްފައި ވާތީ، ފުރިހަމަ ކުރަންޖެހޭ އިޖުރާއާތުތައް ފުރިހަމަކުރުމަށް ފަހު ލަސްނުކޮށް ވީ އެންމެ އަވަހަކަށް ފަޟީލަތުއްޝައިޚް ޢިމްރާން ޢަބްދުﷲ މިނިވަންކުރުމަށް ދައުލަތުގެ ކަމާގުޅުންހުރި އެންމެހާ މުއައްސަސާތަކަށް ގޮވާލަމެވެ." ދީނީ އިލްމުވެރިން ނެރުއްވި ބަޔާނުގައި ވަނީ ބުނެފައެވެ.

މި އިލްމުވެރިންގެ ތެރޭގައި ކުރީގެ އިސްލާމިކް މިނިސްޓަރ ޑރ. ޢަބްދުލް މަޖީދު އަބްދުލް ބާރީ އާއި މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒް އަބްދުލްލަތީފް އާއި މަކުނުދޫ ދާއިރާގެ މެންބަރު އަނާރާ ނަޢީމާއި ޑރ. ޢަބްދުﷲ ޖަމީލް ހިމެނި ވަޑައިގަންނަވައެވެ. އަދިވެސް މި ނޫނަސް ފާހަގަކޮށްލެވޭ އިލްމުވެރިން ހިމެނިވަޑައިގަންނަވައެވެ.