ޝަރުއީ ދާއިރާއާއި މަޖިލިސް ހިފެހެއްޓިފައި އޮތް އޮތުން ނިމުމަކަށް ގެނައުމަށް އދ. ގެ އެހީ ބޭނުން: ގާސިމް
19 ފެބުރުއަރީ 2018 | ހޯމަ 09:33ގާސިމް ވިދާޅިވީ މުޅި ޑިމޮކްރެޓިކް ނިޒާމް އޮތީ މިލިޓަރީގެ ބާރުގެ ދަށުގައި ކަމަށް
ޖުމްހޫރީ ޕާޓީގެ ލީޑަރު ގާސިމް އިބްރާހިމް
ރާއްޖޭގެ ޝަރުއީ ދާއިރާ އާއި ރައްޔިތުންގެ މަޖިލިސް ހިފެހެއްޓިފައި އޮތް އޮތުން ނިމުމަކަށް ގެނައުމަށް އދ. ގެ އެހީތެރިކަން ބޭނުންވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ގާސިމް ހޯމަ ދުވަހު ކުރައްވާފައިވާ ޓްވީޓެއްގައި ވިދާޅުވީ، މުޅި ޑިމޮކްރެޓިކް ނިޒާމް އޮތީ މިލިޓަރީގެ ބާރުގެ ދަށުގައި ކަމަށެވެ. އަދި ޖުޑީޝަރީ އާއި މަޖިލިސް ހިނގައިގަތުމަށް އދ. ގެ ފުރިހަމަ އެހީތެރިކަން ބޭނުންވާ ކަމަށެވެ.
ގާސިމް ވިދާޅުވީ، އުއްތަމަ ފަނޑިޔާރު ހައްޔަރުކޮށްފައި ވުމާއި، އެހެނިހެން ފަނޑިޔާރުންނަށް ލިބެމުންދާ އިންޒާރުތަކާއި މަޖިލީހުގެ މެންބަރުންނަށް ދެމުންދާ އަނިޔާ އިން މި ވެރިކަން ގާނޫނީ އިމުން ބޭރުވެފައިވާ މިންވަރު ހާމަވާ ކަމަށެވެ. އަދި އެކަންކަން ގޮސްފައިވާ ހިސާބުން ގާނޫނުގެ ވެރިކަން މިހާރު ވެއްޓިފައިވާ ހިސާބު ސާފުކޮށް އެނގޭ ކަަމަށް ގާސިމްގެ ޓްވީޓްގައި ވެއެވެ.
