ރައީސް ނަޝީދު އިންޑިއާ އަށް ކުރެއްވި ދަތުރުފުޅު ނިންމަވާލައްވައިފި
19 ފެބުރުއަރީ 2018 | ހޯމަ 03:59މިދަތުރުފުޅަކީ އިންޑިއާގެ ދަ ހިންދޫ ނޫހުން ބާއްވާ ދަ ހަޑްލް ފެސްޓިވަލްގައި ބައިވެރިވެވަޑައިގަތުމަށް ކުރެއްވި ދަތުރުފުޅެއް
ރައީސް ނަޝީދު އިންޑިއާ އަށް ކުރެއްވި ދަތުރުފުޅު ނިންމަވާލެއްވުމަށް ފަހު ފުރާވަޑައިގަންނަވަނީ
އިންޑިއާގެ ނޫހެއް ކަމަށްވާ ދަ ހިންދޫ އިން ބޭއްވި އަދަބީ ފެސްޓިވަލެއްގައި ބައިވެރިވެވަޑައިގަތުމަށް ރައީސް މުޙައްމަދު ނަޝީދު އިންޑިއާ އަށް ކުރެއްވި ދަތުރުފުޅު ނިންމަވާލައްވައިފިއެވެ.
ދަ ހިންދޫ ނޫހުން ބޭއްވި ދަ ހަޑްލް ފެސްޓިވަލްގައި ބައިވެރިވެވަޑައިގަތުމަށް ރައީސް ނަޝީދު އިންޑިއާ އަށް ވަޑައިގެންނެވީ ފެބްރުއަރީ މަހުގެ 15 ވަނަ ދުވަހުއެވެ. އިންޑިއާގެ ބެންގަލޫރުގައި ދެ ދުވަހަށް ދެމިގެންދިޔަ މި ފެސްޓިވަލްގައި ރައީސް ނަޝީދު ވަނީ ޑިމޮކްރެސީ އާ އިންސާނީ ހައްގުތައް އަދި ރާއްޖޭގެ ސިޔާސީ މަސްރަހާއި އިންޑިއާ ކަނޑުގެ ހަމަޖެހުމާ ގުޅޭ ގޮތުން ވާހަކަ ދައްކަވާފައެވެ.
މި ފެސްޓިވަލްގެ ހަވާސާގައި ރައީސް ނަޝީދު ވަނީ އިންޑިއާގެ ދިފާއީ ވަޒީރު ނިރްމަލާ ސިތާރަމަންއާ ބައްދަލު ކުރައްވައި، ރާއްޖޭގެ މިހާރުގެ ހާލަތާ ގުޅޭ މައުލޫމާތު ހިއްސާ ކުރައްވާފައެވެ.
މީގެ އިތުރުން ރައީސް ނަޝީދުގެ މިދަތުރުފުޅުގައި އިންޑިއާގެ ބެންގަލޫރުގައި ދިރިއުޅޭ ދިވެހިންނާ ބައްދަލު ކުރެއްވިއެވެ.
އިންޑިއާ އަށް ކުރެއްވި ދަތުރުފުޅު ނިންމަވާލެއްވުމަށް ފަހު، ރައީސް ނަޝީދު ވަނީ ރޭ މެންދަމުގެ ވަގުތެއްގައި އެނބުރި ލަންކާ އަށް ވަޑައިގެންފައެވެ.
