ރައްޔިތުންގެ މަޖިލީހުގެ މެޖޯރިޓީ ލީޑަރަކީ ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕްގެ ލީޑަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އިބްރާހީމް މުހައްމަދު ސޯލިހު ކަމަށް ކަނޑައެޅިއްޖެ އެވެ.

އިލެކްޝަންސް ކޮމިޝަނުން ރައްޔިތުންގެ މަޖިލީހުން ވަނީ ގުޅިފައިވާ ސިޔާސީ ޕާޓީތަކަށް ނިސްބަތްވާ 12 މެމްބަރެއްގެ ގޮނޑި ގެއްލުނު ކަމަށް ނިންމުމުން އެއީ މެމްބަރުން ނޫން ކަމަށް މަޖިލީހުން ވެސް ނިންމާފައިވަނިކޮށް، މިދިއަ ބުރާސްފަތި ދުވަހުގެ ރޭ ސުޕްރީމް ކޯޓުން ނެރުނު އަމުރުގައި އެ 12 މެމްބަރުންގެ ގޮނޑި ނުގެއްލޭ ކަމަށް ނިންމުމުން ރައްޔިތުންގެ މަޖިލީހުން ވަނީ އެއީ މަޖިލީހުގެ މެމްބަރުން ކަމަށް ކަނޑައަޅާފަ އެވެ.

މަޖިލީހުން ރަސްމީކޮށް މެޖޯރިޓީ ލީޑަރާއި މައިނޯރިޓީ ލީޑަރުގެ ނަން މަޖިލީހުގެ ޖަލްސާއެއްގައި އިއުލާން ކުރަން ޖެހެއެވެ. އެހެންކަމުން މަޖިލީހުން ދެން އެންމެ އަވަހަށް ބާއްވާ ޖަލްސާތަކުގެ ތެރެއިން ޖަލްސާއެއްގައި މަޖިލީހުގެ މެޖޯރިޓީ ލީޑަރަކީ އިބޫ ކަމަށާއި މައިނޯރިޓީ ލީޑަރަކީ ޕީޕީއެމް ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިންމަނިކު ކަމަށް އިއުލާން ކުރާނެ ކަމަށް ބެލެވެއެވެ.

ގުޅިފައިވާ ސިޔާސީ ޕާޓީތަކުން ނިންމާފައިވަނީ ޖޮއިންޓް ޕާލަމެންޓްރީ ގްރޫޕްގެ ލީޑަރަކީ އިބޫ ކަމަށް ނިންމާފަ އެވެ. އަދި އެނގިފައިވާ ގޮތުގައި އެކަން ވަނީ މަޖިލީހުގެ އިދާރާއަށް ހުށަހަޅާފަ އެވެ.

އެހެންކަމުން ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލާގައި ސޮއި ކުރެއްވި 45 މެމްބަރުންގެ ތެރެއިން އިސްދޫ ދާއިރާގެ މެމްބަރު އަހުމަދު ރަޝީދު ފިޔަވާ އެހެން ހުރިހާ މެމްބަރުން ވަނީ މަސީހުގެ އިތުބާރު ނެތްކަމުގެ މައްސަލައަށް ތާއީދު ކުރައްވާފަ އެވެ.

މަޖިލީހުގައި ތިއްބަވަނީ 85 މެމްބަރުންނެވެ. މެޖޯރިޓީއަކީ 43 އެވެ. އެހެންކަމުން މަސީހުގެ އިތުބާރު ނެތްކަމުގެ މައްސަލަ މަޖިލީހުގައި ވޯޓަށް އަހައި މަސީހު އެ މަގާމުން ވަކިކުރުމުގެ ބާރު އިދިކޮޅު ސިޔާސީ ޕާޓީތަކަށް މިވަނީ ލިބިފަ އެވެ.

ހަމަ އެގޮތުން ރައީސުލްޖުމްހޫރިއްޔާ މަގާމުން ދުރުކުރުމުގެ ބާރު ވެސް ރައްޔިތުންގެ މަޖިލީހަށް ލިބިދެ އެވެ.

ގާނޫނުއަސާސީގައި ބުނާގޮތުން ރައީސުލްޖުމްހޫރިއްޔާ މަގާމުން ދުރުކުރުމަށް ސަބަބު ބަޔާންކޮށް މަޖިލީހަށް ގަރާރެއް ހުށަހެޅިދާނެ އެވެ. އެގޮތުން އެ ގަރާރު މަޖިލީހަށް ހުށަހެޅޭނީ މަޖިލީހުގެ ތިންބައިކުޅަ އެއްބައި މެމްބަރުންނަށް ނުވަތަ އެއަށްވުރެ ގިނަ މެމްބަރުންގެ ސޮޔާއެކުގަ އެވެ. އެއީ މަޖިލީހުގެ 29 މެމްބަރުންނެވެ.

ސަބަބާއެކު އެގަރާރު މަޖިލީހަށް ހުށަހެޅުމުން އެމައްސަލައާމެދު މަޖިލީހުގައި ބަހުސް ފެށުމުގެ 14 ދުވަހު ކުރިން ރައީސުލްޖުމްހޫރިއްޔާއަށް އަންގަން ޖެހެއެވެ. އަދި އެ ބަހުސްގައި އަނގަބަހުންނާއި ލިޔުމުން އޭނާގެ ދިފާއުގައި މަސައްކަތްކުރުމުގެ ހައްގު ރައީސުލްޖުމްހޫރިއައްޔާއަށް ލިބެންޖެހެ އެވެ. އަދި ގާނޫނީ ވަކީލުން ބޭނުން ކުރުމުގެ ހައްގުވެސް ލިބިދޭން ޖެހެއެވެ.

ރައްޔިތުންގެ މަޖިލީހުން ރައީސުލްޖުމްހޫރިއްޔާ ކަމުގެ މަގާމުގައި ހުރި މީހަކު ވަކިކުރެވޭނީ ސަބަބު ބަޔާންކޮށް މަޖިލީހަށް ހުށަހަޅާ ގަރާރަށް ވޯޓަށް އެހުމުން، މަޖިލީހުގެ ޖުމްލަ މެމްބަރުންގެ ތިންބައިކުޅަ ދެބައިގެ އަޣްލަބިއްޔަތުން ނެވެ. އެއީ 57 މެމްބަރުންނެވެ.

އިދިކޮޅު ޖޮއިންޓް ޕާލަމެންޓްރީ ގްރޫޕްގައި މިވަގުތު 44 މެމްބަރުން ތިއްބެވިއިރު ސަރުކާރަށް ނިސްބަތްވާ ގިނަ މެމްބަރުންތަކެއް އިދިކޮޅު ޖޮއިންޓް ޕާލަމެންޓްރީ ގްރޫޕާ ގުޅެންއުޅޭ ކަމުގެ ވާހަކަތައް ދަނީ ފެތުރެމުންނެވެ. އެހެންކަމުން މަޖިލީހުގެ އެންމެ މަތީ އަޣްލަބިއްޔަތު ކަމަށްވާ ރައީސުލްޖުމްހޫރިއްޔާ މަގާމު އަޒުލް ކުރުމާއި ގާނޫނުއަސާސީ އިސްލާހު ކުރުންފަދަ ކަންކަން މަޖިލީހުގެ ތެރެއިން އިދިކޮޅު ޖޮއިންޓް ޕާލަމެންޓްރީ ގްރޫޕަށް ލިބިގެން ދިއުމަކީ ވަރަށް ގާތް ކަމެކެވެ.