އުފަންވި އިރު ދެ މޫނު ހުރި ބުޅާ މަރުވެއްޖެ

ދެކުނު އެފްރިކާގެ ގެ އެއްގައި އުފަންވި ދެ މޫނު ލީ ބުޅާ ހުކުރު ދުވަހު މަރުވެއްޖެ އެވެ.

ފޭސްބުކް ގައި މި ޚަބަރު ހާމަކުރުމާއެކު މީހުން އެކަމާ ދެރަވެގެން ދެ ގަޑީއިރެއްހާ އިރު ތެރޭގައި 1200 ކޮމެންޓް ކޮށްފައިވެއެވެ.

"ބެޓީ ބީ" ގެ ނަމުން ނަންދީފައިވާ މި ބުޅާ މަރުވީ ނިއުމޯނިއާ ޖެހިގެން ކަމަށް ބުޅަލަށް ފަރުވާ ދިން ފަރާތުން ހާމަ ކޮށްފައިވެއެވެ.

ބުޅާ އުފަންވީ ޑިސެމްބަރު މަހުގެ 12 ވަނަ ދުވަހުއެވެ.

އުފަންވި ދުވަހުން ފެށިގެން އެ ބުޅަލަށް ތަޖުރިބާކާރެއްގެ ބެލުމުގެ ދަށުން ގެންދިޔައީ ފަރުވާ ދެމުންނެވެ. އަދި ބުޅަލަށް ވާ ނުވާ އާއްމު ކޮށް ހާމަ ކުރުމަށް ޚާއްސަ ފޭސްބުކް ޕޭޖެއް ވަނީ ހަދާފައެވެ.

ބުޅާ އުފަންވި އިރު ދެ މޫނު ހުރުމާއެކު ގިނަ ބައެއްގެ ސަމާލު ކަން މި ބުޅަލަށް ލިބިގެން ދިޔައެވެ. ދެ މޫނު ހުރި އިރު، ދެ ނޭފަތާއި، ދެ އަނގަޔާއި، ތިން ލޯ ބުޅަލުގައި ހުއްޓެވެ.

ބުޅަލަށް ފަރުވާ ދިން ފަރާތުން ފޭސްބުކް ގައި ބުނެފައިވަނީ މީގެ ދެ ދުވަހެއް ކުރިއާ ހަމަ އަށް ބުޅަލުގެ އާއްމު ހާލަތު ރަނގަޅު ކަމަށާއި، ހާލު ދެރަވީ ބުޅަލަށް ދިން ކިރު އޭގެ ފުއްޕާމެއަށް ވާސިލް ވެގެން ނިއުމޯނިއާ ޖެހުނު ހިސާބުން ކަމަށެވެ.