ރައީސް ޔާމީން ބައިވެރިވެވަޑައިގެންނެވި ޕީޕީއެމްގެ ޖަލްސާއަށް ރާއްޖެ ޓީވީ ނުވެއްދި
29 ޖެނުއަރީ 2018 | ހޯމަ 17:13ސަރަހައްދުގެ މަގުތައް ވަނީ ބަންދުކޮށްފައި
ޕީޕީއެމް އިން ބޭއްވި ޖަލްސާއެއްގެ ތެރެއިން: ރުމާލު 2 ޖަގަހައިގައި އޮތް ޖަލްސާއަށް ރާއްޖެ ޓީވީ ނުވެއްދި
ރައީސުލް ޖުމްހޫރިއްޔާ ޢަބްދުﷲ ޔާމީން ބައިވެރިވެ ވަޑައިގަންނަވާ "ރުމާލު 2" ޖަގަހައިގައި ބާއްވާ ޖަލްސާއަށް ވަނުމަށް ރާއްޖެ ޓީވީ ދިއުމުން އެޖަލްސާއަށް ނުވައްދައި ފޮނުވާލައިފިއެވެ.
ޤައުމީ ޓީވީން ލައިވް ކޮށްގެން ކުރިއަށް ގެންދާ މިޖަލްސާއަށްޓަކައި "ރުމާލު 2" ޖަގަހަ ހިމެނޭ ސަރަހައްދުގެ މަގުތައް ފުލުހުން ވަނީ ބެރިކޭޑް ޖަހައި ބަންދުކޮށްފައެވެ. އަދި ޖަލްސާއަށް މީހުން ވަނުމަށް ޚާއްޞަ ކޮށްފައިވާ ދޮރުގައި ވަނީ މެޓަލް ޑިޓެކްޓަރ ބަހައްޓާފައެވެ. މީގެ އިތުރުން ޖަލްސާއަށް މީހުން ވައްދަމުން ދިޔައީ ވެސް ބަލައި ފާސްކުރުމަށް ފަހުގައެވެ.
ޔުނީފޯމުގަ އާއި އާދައިގެ ހެދުމުގައި ގިނަ އަދަދެއްގެ ފުލުހުން ހަރަކާތްތެރިވަމުން ދިޔައިރު ހަތިޔާރާ އެކު ތިބި ސިފައިންނާއި އާދައިގެ ހެދުމުގައި ތިބި ސިފައިން ވެސް އެސަރަހައްދުގެ ސެކިއުރިޓީ ބަލަހައްޓަމުން ގެންދިޔައެވެ.
ރާއްޖެޓީވީން އެޖަލްސާއަށް ކަވަރ ކުރަން ދިއުމުން ގޭޓު ބަލަހައްޓަން ތިބި ފަރާތްތަކުން ވަނީ ރާއްޖެ ޓީވީއަށް ނުވަދެވޭނެ ކަމަށް އަންގާފައެވެ.
ރާއްޖެ ޓީވީގެ ރިޕޯޓަރާއި ކެމެރާމަންގެ އިތުރުން ފޮޓޯގްރާފަރަށް ވެސް ވަނީ ނުވަދެވޭނެ ކަމަށް އަންގައި އެސަރަހައްދުން ފޮނުވާލާފައެވެ.
ރައީސް ޔާމީން ބައިވެރިވެ ވަޑައިގަންނަވާ ޖަލްސާއެއް "ރުމާލު 2" ޖަގަހައިގާ މި ބާއް ވަނީ އެމަނިކުފާނަށް ތުހުމަތުކުރެވޭ ވައްކަމާއި ކޮރަޕްޝަންގެ މައްސަލަތަކެއް ބެލުމަށް ކޮމެޓީއެއް ހެދުމަށާއި އެތަހުގީގް ނިމެންދެން ރައީސް ޔާމީން ވެރިކަމުން ދުރުކޮށް ވަގުތީ ގޮތުން އެމަޤާމް ނާއިބު ރައީސް ޢަބްދުﷲ ޖިހާދަށް ވެރިކަމުގެ ބާރުތައް ދެއްވުން އެދި ގުޅިފައިވާ ޕާޓީތަކުން ސުޕްރީމް ކޯޓަށް މައްސަލައެއް ހުށަހަޅާފައި ވަނިކޮށެވެ.
