ކެޓަލޯނިއާގެ ކުރީގެ ލީޑަރު ކާލްސް ޕުޖްޑިމޮންޓް އެ ސަރަހައްދުގެ ރައީސްގެ މަގާމަށް ކުރިމަތިލެއްވުމާއިއެކު ސްޕެއިންގެ ކޯޓުން އޭނާގެ ކެނޑިޑެސީ ބާތިލްކުރުމުގެ މަސައްކަތް ފަށައިފިއެވެ.

ކެޓަލޯނިއާގެ ސަރުކާރު އުވާލުމާއިއެކު ޕުޖްޑިމޮންޓް ވަނީ މިދިޔަ އަހަރުގެ އޮކްޓޯބަރުމަހުގެ ފަހުކޮޅު ބެލްޖިއަމްއަށް ވަޑައިގެންފައެވެ.

ޕުޖްޑިމޮންޓްގެ މައްޗަށް އުފުލާފައިވާ ދައުވާތަކުގެ ތެރޭގައި ދައުލަތާ ދެކޮޅު އަމަލު ހިންގުމަށް ހިތްވެރު ލިބޭ ގޮތަށް ވާހަކަ ދެއްކުމާއި ގާނޫނީ ސަރުކާރަކާ ދެކޮޅުވެރި ހަރަކާތް ހިންގުން ހިމެނެއެވެ.

ޕުޖްޑިމޮންޓް ފިޔަވައި އިތުރު ކެނޑިޑޭޓަކު ކެޓަލޯނިއާގެ ރައީސްކަމަށް ކުރިމަތި ލައްވާފައެއް ނުވެއެވެ.

ނަމަވެސް އެގައުމުގެ ދުސްތޫރީ ކޯޓުން މިހާރުވަނީ ގައުމުން ބޭރުގައި ހުންނަވައިގެން އޭނާއަށް އެ ސަރަހައްދުގެ ގާނޫނު ހަދާ މަޖިލީހުގެ ވެރިކަން ނުކުރެއްވޭނެ ކަމަށް ކަނޑައަޅާފައެވެ.

ޕުޖްޑިމޮންޓް ގަބޫލުފުޅުކުރައްވާ ގޮތުގައި ސަރަހައްދުގެ މިނިވަންކަން އިއުލާނުކުރުމުގެ އިޚްތިޔާރު އޭނާއަށް ލިބިވަޑައިގަންނަވައެވެ.ނަމަވެސް ސްޕެއިންއިންވަނީ އެކަމަކީ ޣައިރު ގާނޫނީ ކަމެއްކަމަށް ކަނޑައަޅާފައެވެ.

ވަކިވެ ގަތުމަށް މަސައްކަތްކުރެއްވި ލީޑަރުގެ މައްޗަށް ބޮޑެތި ތުހުމަތުތަކެއް ހުރިއިރު މި ދައުވާތައް ސާބިތުވެއްޖެނަމަ 30 އަހަރުގެ ޖަލުހުކުމެއް އަންނާނެއެވެ.

ޕުޖްޑިމޮންޓްއަށް ތާއީދުކުރާ ފަރާތްތަކުން ބުނަމުންދަނީ އޭނާއަށް ބެލްޖިއަމްގައި ހުންނަވައިގެންވެސް ވީޑިއޯ ލިންކް ފަދަ ޒަމާނީ ޓެކްނޮލޮޖީގެ އެހީގައި މަގާމުގެ މަސްއޫލިއްޔަތު އަދާކުރެއްވިދާނެކަމަށެވެ.

ސްޕެއިންގެ ސަރުކާރުންވަނީ އެކަމަށް ދެކޮޅުހަދައި އެއީ ގާނޫނީގޮތުން ކުރެވޭނެކަމެއް ނޫންކަމަށް ބުނެފައެވެ.