ޤަތަރާއި ދެކޮޅަށް ފިޔަވަޅު އެޅިނަމަވެސް، އެޤައުމުގެ އިޤްތިޞާދު ދަނީ ފުޅާވަމުން

ގަލްފުގެ 4 ޤައުމުތަކުން މީގެ 7 މަސްދުވަސްކުރިން، 2017ވަނަ އަހަރުގެ ޖޫން މަހުގެ 5ވަނަ ދުވަހު ވަނީ ޤަތަރާއިއެކު އޮންނަ ގުޅުން ކަނޑާލައި، އެޤައުމާއި ދެކޮޅަށް ދަތިކުރުމުގެ ފިޔަވަޅު އަޅާފައެވެ. މިހަތަރު ޤައުމަކީ މިސްރާއި، ޤަތަރުގެ އަވަށްޓެރި ޔޫއޭއީ، ސަޢޫދީ ޢަރަބިއްޔާ އަދި ބަޙްރައިންއެވެ. މިޤައުމުތަކުން ދަތިކުރުމުގެ ފިޔަވަޅު އެޅުމުގެ ސަބަބުން އެއްގަމު މަގުން ޤަތަރަށް ވަންނަ މަގުތައް ވަނީ ބަންދުވެފައެވެ. އަދި އެޤައުމުތަކުގެ ވައިގެ ސަރަޙައްދަށް ޤަތަރުގެ ވައިގެ އުޅަނދުތަކާއި، ޤަތަރަށް ދަތުރުކުރާ ވައިގެ އުޅަނދުތައް ވަނުންވެސް ވަނީ މަނާކޮށްފައެވެ.

ޤަތަރުން އަންނަނީ ދަތިކުރުމުގެ ފިޔަވަޅުތަކާއި ދެކޮޅަށް ބައިނަލްއަޤްވާމީ މައިދާނުގައި މަސައްކަތްކުރަމުންނެވެ.

ތިރީގައި އެވަނީ ނިމިދިޔަ ހަފްތާގެ ތެރޭގައި ޤަތަރުގެ މައްސަލައިގައި ހިނގާފައިވާ ބައެއް ކަންކަމެވެ.

ބުރާސްފަތި

ޤަތަރުގެ ޚާރިޖީ ވަޒީރު މުޙައްމަދު ބިން އަބްދުއްރަޙްމާން އަލްޘާނީ ޑާވޯސްގައި ވޯލްޑް އިކޮނޮމިކް ފޯރަމްގައި ބައިވެރިވެވަޑައިގަންނަވަނީ

ގަލްފުގެ ހަތަރު ޤައުމަކުން ޤަތަރާއިއެކު އޮންނަ ގުޅުން ކަނޑާލައި، އެޤައުމާއި ދެކޮޅަށް ދަތިކުރުމުގެ ފިޔަވަޅުތައް އަޅާފައި ވީނަމަވެސް އެޤައުމުގެ އިޤްތިޞާދު ބާރު ދުވެލީގައި ފުޅާވަމުންދާކަމަށް ޤަތަރުގެ ޚާރިޖީ ވަޒީރު މުޙައްމަދު ބިން އަބްދުއްރަޙްމާން އަލްޘާނީ ވިދާޅުވިއެވެ. އޭނާ ވިދާޅުވީ ޤަތަރާއި ދެކޮޅަށް ދަތިކުރުމުގެ ފިޔަވަޅު އެޅިނަމަވެސް ކެތްކޮށްލެވޭހާ ވަރު ޤަތަރުގެ އިޤްތިޞާދުގައި އެބަހުރިކަމަށެވެ.

އެއްވެސް މައްސަލައެއް ނުޖެހި، ކުރިންވެސް ޕްލޭންކުރި ގޮތަށް 2022ވަނަ އަހަރުގެ ވޯލްޑް ކަޕް ފުޓުބޯޅަ މުބާރާތް ކުރިއަށްދާނެކަމުގެ ޔަޤީންކަންވެސް ޤަތަރުގެ ޚާރިޖީ ވަޒީރު ދެއްވިއެވެ.

ބުދަ

ޤަތަރުގެ ވެރިރަށް ދޯހާ

ދަތިކުރުމުގެ ފިޔަވަޅު އަޅާފައިވުމުގެ ސަބަބުން ޤަތަރަށް ކޮންމެހެން ބޭނުންވާ ބޭހުގެ ބައެއް ބާވަތްތަކާއި ބޭސްފަރުވާއަށް ބޭނުންވާ ބައެއް އާލާތްތައް ސަޕްލައި ނުކުރެވޭކަމަށް އިންސާނީ ހައްޤުތަކަށް މަސައްކަތްކުރާ ޖަމާޢަތެއްކަމަށްވާ ޔޫރޯމެޑްއިން ބުންޏެވެ.

ސަޢޫދީއިން ކުވައިތަށް ކަނޑައަޅާފައިވާ ސަފީރު ޤަތަރުގެ މައްސަލައިގައި ކުވައިތުގެ ޚާރިޖިއްޔާއަށް ހާޒިރުކުރެވުނުކަމަށް ދެކެވޭ ވާހަކަތައް ކުވައިތުގެ ޚާރިޖިއްޔާއިން ދޮގުކުރިއެވެ. ކުވައިތުގެ ޚާރިޖިއްޔާއިން ބުނީ ސަޢޫދީ ސަފީރާއިއެކު ކުވައިތުގެ ޚާރިޖީ ވަޒީރުގެ ނައިބު ބައްދަލުކުރެއްވީ ދެޤައުމުގެ ގުޅުންތައް ބަދަހިކުރުމާއި ގުޅޭގޮތުންކަމަށާއި، އެއީ އާދައިގެ ބައްދަލުވުމެއްކަމަށެވެ.

އަންގާރަ

ޔޫއޭއީ ވައިގެ ސިފައިންގެ ވެރިޔާ ބްރިގޭޑިއަރ ޖެނެރަލް ޙެލާލް ސާދު އަލް ޤުބައީސީ

ޤަތަރުގެ މައްސަލަ ހޫނުވެފައިވާތީ، ޤަތަރުގެ ވައިގެ ސިފައިންނަށް އުނދަގުލެއް ވެދާނެތީ ޤަތަރުގެ ވައިގެ ސަރަހައްދަށް ނުވަނުމަށް ޔޫއޭއީގެ ވައިގެ ސިފައިންނަށް އަންގަވާފައިވާކަމަށް ޔޫއޭއީ ވައިގެ ސިފައިންގެ ވެރިޔާ ބްރިގޭޑިއަރ ޖެނެރަލް ޙެލާލް ސާދު އަލް ޤުބައީސީ ވިދާޅުވިއެވެ. އޭނާ ވިދާޅުވީ މައްސަލަ އިތުރު ހޫނު ނުކުރުމަށް އަމުރު އައިސްފައިވާކަމަށެވެ. ޤަތަރުގެ ވައިގެ އުޅަނދުތަކަށް ޔޫއޭއީ، ސަޢޫދީ، އަދި ބަޙްރައިންގެ ވައިގެ ސަރަހައްދަށް ނުވަދެވުނުނަމަވެސް، ޤަތަރުން އެޤައުމުތަކަށް ޤަތަރުގެ ވައިގެ ސަރަހައްދަށް ވަނުން މަނާކޮށްފައެއް ނުވެއެވެ.

ހޯމަ

އަބޫދާބީ ލޫވަރ މިއުޒިއަމްގައި ހުރި މެޕުން ޤަތަރު އުނިކޮށްފައި

އަބޫދާބީގެ ލޫވަރ މިއުޒިއަމްގައި ބަހައްޓާފައި ހުރި މެޕެއްގައި ޤަތަރު އުނިކޮށްފައިވާ މައްސަލަ ބޮޑުވެފައިވަނިކޮށް، އެމެޕްގައި ޤަތަރު ހިމެނިއެވެ. އެ މިއުޒިއަމްއިން ބުނީ އެއީ އޮޅުމަކުން ކުރެވުނު ކަމެއްކަމަށެވެ. ދުނިޔޭގެ މެޕުން މިގޮތަށް ޤަތަރު އުނިކުރުމަކީ ފަރަންސޭސީވިލާތުގެ ލޫވަރ މިއުޒިއަމްގެ ނަން ބޭނުންކުރުމުގެ ހުއްދަ އަބޫދާބީއަށް ދިން އެއްބަސްވުމާއި ޚިލާފުކަމެއްކަމަށް ތަޖުރިބާކާރުން ބުންޏެވެ.

ޤަތަރާއި ދެކޮޅަށް ފިޔަވަޅު އަޅާފައިވާ 4 ޤައުމުގެ ޚާރިޖީ ވަޒީރުން ސަޢޫދީގެ ވެރިރަށް ރިޔާޒްގައި ބައްދަލުކުރެއްވިއެވެ. އަދި އެއްޤައުމު އަނެއް ޤައުމާއިއެކު އޮތްކަމަށް ބުނެ، ޤަތަރަށް އެޤައުމުތަކުން ކުރި 13 ޑިމާންޑަށް ބަދަލެއް ނާންނަކަމަށް ޤައުމުތަކުން ބުންޏެވެ.

ޤަތަރުގެ ދިފާޢީ ވަޒީރު ޚާލިދު ބިން މުޙައްމަދު އަލް އައްތިޔާހް އެފްރިކާ ބައްރުގެ ޤައުމެއްކަމަށްވާ މާލީއަށް ވަޑައިގެން އެޤައުމުގެ ދިފާޢީ ވަޒީރު ޓިއޭނާ ކުލިބަލީއާއި ބައްދަލުކުރެއްވިއެވެ. އަދި ދިފާޢީ ދާއިރާއިން ދެޤައުމުން ގުޅުން ބަދަހިކުރުމާއި ގުޅޭ ގޮތުން މަޝްވަރާކުރެއްވިއެވެ.

އާދިއްތަ

ޤަތަރުގެ އަމީރު ޝެއިޚް ތަމީމް ބިން ޙަމަދު އަލް ޘާނީ ކުވައިތުގެ އިސްބޭފުޅުންނާއި ދޯހާގައި ބައްދަލުކުރައްވަނީ

ޤަތަރުގެ އަމީރު ޝެއިޚް ތަމީމް ބިން ޙަމަދު އަލް ޘާނީ ކުވައިތުގެ ކުޅިވަރާއި ބެހޭ ވަޒީރު ޚާލިދު އަލް ރައުދާން އާއި ބައްދަލުކުރެއްވިއެވެ. މި ބައްދަލުކުރެއްވުމުގައި ކުޅިވަރުގެ ދާއިރާއިން ދެޤައުމުގެ ގުޅުން ބަދަހިކުރުމާއި ބެހޭ ގޮތުން މަޝްވަރާކުރެއްވިއެވެ. ރައުދާން ވަނީ ފީފާއިން ކުވައިތުގެ އެފްއޭ އާއި ދެކޮޅަށް އެޅި ފިޔަވަޅުތައް ނައްތާލަން ޤަތަރުން ދިން އެހީތެރިކަމަށް ޝުކުރު އަދާކުރައްވާފައެވެ. އަދި 23ވަނަ ގަލްފް ކަޕް ކުވައިތުގައި ބާއްވަން ނިންމެވިކަމަށްޓަކައިވެސް ޤަތަރުގެ އަމީރަށް ޝުކުރު އަދާކުރެއްވިއެވެ. މިބައްދަލުމާއި ގުޅިގެން ރައުދާން އަކީ ކުލީ ސިފައިންގެ މީހެއްކަމަށް ސިފަކުރައްވައި، ސަޢޫދީގެ ސްޕޯޓްސް އޮތޯރިޓީގެ ޗެއަރމަން ތުރުކީ އާލް އައްޝައިޚް ވަނީ ޓްވީޓްކުރައްވާފައެވެ.

ކުވައިތަށް ކުރެއްވި ރަސްމީ ދަތުރުފުޅަށްފަހު ޤަތަރުގެ ދިފާޢީ ވަޒީރު ޚާލިދު އަލްއައްތިޔާޙް އަނބުރާ ޤަތަރަށް ވަޑައިގަތީ އާދިއްތަ ދުވަހުއެވެ. މިދިޔަ އަހަރުގެ ނޮވެމްބަރު މަހުން ފަށައިގެން ޤަތަރުގެ އަސްކަރީ އޮފީހެއް ކުވައިތުގައި ވަނީ ޤާއިމްކޮށްފައެވެ.