ކިނބިދޫ ރައްޔިތުން ރާއްޖެޓީވީއަށް އޮތް ލޯބި ދައްކާލީ ދިވެހި މަލާފަތެއްގައި ގެނައި ބޮނޑިބަތުން

ރާއްޖެޓީވީން ކުރަމުންދާ މަސައްކަތް ބަލައިގަނެ ގިނަ ބަޔަކު އެކަމުގެ އަގުވަޒަން ކުރެ އެވެ. އެމީހުންގެ ހިތުގެ ޝުއޫރުތައް އެކި ސިފަ ސިފައިގައި ރާއްޖެޓީވީއާ ހިސާބަށް ފޯރުކޮށްދެމުން އަބަދުވެސް ގެންދެ އެވެ.

ހޯމަ ދުވަހުގެ މެންދުރު ފަހު ރާއްޖެޓީވީ ހިންގާ އޮފީސް ކައިރިއަށް އައި ވަފުދަކީ ވެސް އެފަދަ ބައެކެވެ. ތ.ކިނބިދޫގެ ރައްޔިތުންގެ ބަޔަކު ރާއްޖެޓީވީއަށް ކޮންމެވެސް އެއްޗެއް ހިފައިގެން އައިސް ތިބި ކަމަށް ބުނުމުން އެވަގުތު ރާއްޖޭގެ ޓީވީގައި ތިބި ހުރިހާ މުވައްޒަފުން އަވަސްވެ ގަތީ އެމީހުންނަށް އިސްތިގުބާލު ކުުރުމަށެވެ. އައިސް ތިބި ވަފުދުގެ އެންމެ ކުރީގައި ތިބި ދެ މީހަކު ފޮތިގަނޑަކަށް އޮޅާލާފައި އޮތް އެއްޗެއް ގެނެސް މޭޒުމަތީ ބަހައްޓައި ނިއުޅާލުމުން އެނގުނީ އެއީ ބޮޑު މަލާފާތެއް ކަމެވެ. އޭގައި ހުރީ ދިވެހި ބޮނޑިބަތެވެ. އަންނާރު އޮތްތަކުން ރާއްޖެޓީވީގެ ލޯގޯ ބޮޑިބަތްގަނޑުގެ މަތީ ޖަހާލާފައިވާއިރު އެއީ ހުނަރުވެރި ކިނބިދޫ އަންހެނެއްގެ ޗާލު މަސައްކަތެކެވެ. ކޮށާލާފައިވާ ކަނަމަދުކޮޅުން ލިޔެފައިވާ އިބާރާތް ވެސް އެހާ ފުރިހަމަ އެވެ. ބޮނޑިބަތުގެ ރަހައާމެދު އިތުރު ވާހަކައެއް ދައްކާކަށް ފުރުސަތެއް ނެތެވެ. ދިޔާހަކުރުއަޅައިގެން ކައްކާފައިވާ އެ ބޮނޑިބަތުގެ ރަހަ ބަލައިފި ނަމަ އިތުރަށް އެ ރަހަ އަށް ކޮންމެ މީހަކުވެސް އެދޭނެ އެވެ.

މި ވަފުދާއެކު އައި މީހުންގެ ތެރެއިން ރާއްޖެޓީވީއާ ވާހަކަ ދެއްކި އަލީ ހަސީން ބުނީ އެކޭން ރާއްޖެޓީވީއަށް ހަދިޔާކުރީ ކިނބިދޫ ރައްޔިތުން ތިބީ ރާއްޖެޓީވީއާއެކުކަން އަންގައިދިނުމަށް ކަމަށެވެ. އަދި އެހެންމެ ރާއްޖެޓީވީއަށް ދިމާވާ ބޮޑެތި ގޮންޖެހުންތަކާއެކު ވެސް ފަސްޖެހުމެއް ނެތި ކުރަމުންދާ ބުރަ މަސައްކަތް ކިނބިދޫގެ ރައްޔިތުން ބަލައިގަންނަކަން ހާމަ ކުރުމަކީ ވެސ މި ފަދަ ކޭމެއް ރާއްޖެޓީވީއަށް ހަދިޔާކުރުމުގެ މަގުސަދު ކަމަށް އޭނާ ބުންޏެވެ.

މި ކެއުން ބަލައިގަނެ ރާއްޖެޓީވީގެ ސިއޯއޯ ހުސެއިން ފިޔާޒް މޫސާ ވިދާޅުވީ ރާއްޖެޓީވީން ރައްޔިތުންނަށްޓަކައި ކޮށްދޭ މަސައްކަތްތަކުގެ އަގުވަޒަން ކުރަމުންދާތީ އެކަން ބަލައިގަންނަ ކަމަށެވެ. އަދި ރާއްޖޭގެ ހުރިހާ ރައްޔިތުން ވެސް އެދޭ ފަދަ މަސައްކަތްތަކެއް ކޮށްދިނުމަށް ރާއްޖެޓީވީގެ ހުރިހާ މުވައްޒަފުން މަސައްކަތް ކުރާނެ ކަމުގެ ޔަގީންކަން ވެސް ފިޔާޒު ދެއްވި އެވެ.

މިމަލާފަތް ތައްޔާރުކުރުމުގައި އުޅުނު އެހެން މީހުން ވެސް ބުނީ ރާއްޖެޓީވީން ކުރަމުންދާ ބުރަ މަސައްކަތުގައި ފަސް ޖެހުމެއް ނެތި ކުރިއަށްދިއުމަށް އެދޭ ކަމަށެވެ. މީގެ އިތުރުން ވެސް ކިނބިދޫގެ ރައްޔިތަކު ތައްޔާރުކޮށް، ކިޔާފައިވާ ޅެމެއް ވެސް ރާއްޖެޓީވީއަށް ވަނީ ހަދިޔާކޮށްފަ އެވެ.