ނުހާގެ އާދޭސް، އަޒާންގެ ރުޅި... ދެ މީހުންގެ ވަރި! "ވަކިން ލޯބިން" ގެ ފުރަތަމަ ޓްރެއިލަރ ވަރަށް އިންޓެންސް!!!

ދިވެހި ފިލްމް އެވޯޑްގެ ގިނަ އެވޯޑްތަކަކާ އެކު، އަހަރުގެ އެންމެ ކާމިޔާބު ސްޓޫޑިއޯގެ ގޮތުގައި 2017 ވަނަ އަހަރު ނިންމައިލި ޑާކް ރެއިން އެންޓަރޓެއިންމަންޓް އިން މި އަހަރު ފުރަތަމަ ރިލީޒް ކުރުމަށް ތައްޔާރުވަމުންދާ ފިލްމު، 'ވަކިން ލޯބިން' ގެ ފުރަތަމަ ޓްރެއިލަރ ރިލީޒްކޮށްފިއެވެ.

'ވަކިން ލޯބިން' ގެ ވާހަކައާ ގުޅޭ ގޮތުން ޑާކްރެއިން އެންޓަރޓެއިންމަންޓުން މާބޮޑު މަޢުލޫމާތެއް ހާމަކޮށްފައި ނުވާއިރު، މި ފިލްމުގެ ލީޑު ދެ ކެރެކްޓަރގެ ރޯލުން ފެނިގެންދާނީ ޑާކްރެއިން އެންޓަރޓެއިންމަންޓްގެ އެންމެ މަޤުބޫލު ޖޯޑު ކަމުގައިވާ މުޙައްމަދު ޖުމައްޔިލް (ޖުމަލް) އާއި މަރިޔަމް މަޖުދާ (މަޖޫ)އެވެ. މީގެ އިތުރުން މި ފިލްމުގެ މުހިއްމު ރޯލަކުން ނުޒުހަތު ޝުއައިބް (ނުޒޫ) ވެސް ފެނިގެންދާނެއެވެ.

ބުރާސްފަތި ދުވަހުގެ މެންދުރު ފަހު ރިލީޒްކުރި ޓްރެއިލަރގައި ފެނިގެންދަނީ ކުރިން ރިލީޒްކޮށްފައިވާ އެ ފިލްމުގެ ޕްރޮމޯޝަނަލް ލަވަ، "ޕަރީ" ގައި ފެނިގެންދިޔަ މަންޒަރުތަކާއި މުޅިން ތަފާތު އަސަރުތަކަކެވެ.

"ޕަރީ"ގައި ޖުމަލް އާއި ނުޒޫގެ ލޯބީގެ ފެށުން ދައްކާއިރު މި ޓްރެއިލަރގައި ދައްކަނީ ފިލްމުގެ ބެކްސްޓޯރީގެ މުހިއްމު ވާހަކަތަކެކެވެ. އެގޮތުން "ޕަރީ" އިން ފެނިގެން ގޮސްފައިނުވާ މަޖޫގެ ކެރެކްޓަރ، ނުހާ، މި ޓްރެއިލަރ އިން ފެނިގެންދެއެވެ. އަދި ޖުމަލް މި ފިލްމުގައި ކުޅޭ އަޒާންގެ ކެރެކްޓަރ ވެސް މި ޓްރެއިލަރގައި ވަނީ ތަޢާރުފުކޮށްދީފައެވެ.

ޓްރެއިލަރ ފެށިގެން ދަނީ އަޒާން އާއި ނުހާ އެކަކު އަނެކަކަށް ތަޢާރުފުވާ ހިސާބުންނެވެ. އެކުގައި ވަގުތު ހޭދަކޮށްލުމަށް އަޒާން ހުށަހަޅަނީ ކޮފީއަކަށް ދާށެވެ. ނުހާ ހުށަހަޅަނީ މަޖާ ކާން ދާށެވެ. ދެން ފެނިގެންދަނީ މި ދެ ކެރެކްޓަރގެ ލޯބީގެ އެންމެ ފޮނި ދުވަސްތަކުގެ މަންޒަރުތަކެވެ. ފުވައްމުލަކު ތުނޑި އާއި އެރަށު ވީދަނޑުގެ ހިތްގައިމު މާހައުލުގައި އެ ދެ ލޯބިވެރިން އުފަލުން 'ފޮޅޭ' މަންޒަރެވެ.

ލޯބީގެ ރަން ދުވަސްތަކުގެ މި މަންޒަރުތަކަށް ކުންނެއް ގެނެސްދެނީ އަޒާންގެ ހަންހާރަވެތި ވަޢުދަކުންނެވެ.

"އަހަރެންގެ މި ލޯތްބަކީ ނުހާގެ ކުރިއެރުމަށް ހުރަހަކަށް ދުވަހަކު ވެސް ނަހަދާނަން"، އަޒާންގެ މި ވަޢުދާ އެކު ޓްރެއިލަރ އަށް ސިކުންތެއްގެ އަނދިރިކަން ވެރިވެގެން ދެއެވެ.

ދެން ސްކްރީން ދިއްލައި ލަނީ މުޅިން ތަފާތު ހާލަތަކަށެވެ.

"ކަލޭތީ މަގޭ އަނތްބެއް ނޫން!"

ރުޅިވެރިކަމާ އެކު ނުހާ ވަރިކުރުމަށް ފަހު، ނުހާގެ ރުއިމާއި އާދޭހަށް ބެލުމެއް ނެތި ދަމައި ކޫއްތައި ނުހާ ގެންގޮސް ގެއިން ނެރެލައެވެ. އޭރު ނުހާ ދަނީ އެ ދެމީހުންގެ ދަރިފުޅާއި އޭނާ ދުރު ނުކުރުމަށް އާދޭސް ކުރަމުންނެވެ. ނުހާގެ ރުއިމާއި އާދޭހުގެ އަޑު ފޭދިގެން ދަނީ އެ ދެމީހުންގެ ދަރިފުޅު، ރަސްރަނި ބަގީޗާގެ ބެންޗެއްގައި އިށީނދެލައިގެން އިންނަ ސްޓިލް މަންޒަރަކަށެވެ. މަޑުމަޑުން ފިލްމުގެ ނަން ފޭދި، ޓްރެއިލަރ ނިމެއެވެ.

މި ޓްރެއިލަރއާ އެކު މި ފިލްމަށް ކުރެވެމުންދާ އިންތިޒާރު ބޮޑުތަނުން އިތުރުވެގެން ގޮސްފައިވާއިރު، މި ޓްރެއިލަރއިން ގިނަ ސުވާލުތަކެއް ވެސް އުފެދިގެން ދެއެވެ. 'ޕަރީ'ގެ މަންޒަރުތަކާއި ހަމައަށް ދިޔައިރު ނުހާ ކޮބައިބާވައެވެ؟ އެހާ ލޯބިން އުޅުނު އަޒާން އާއި ނުހާގެ އުފާވެރި ޒަވާޖީ ހަޔާތަށް އެހާ ބޮޑު ބަދަލެއް އަންނަން ޖެހުނީ ކީއްވެބާވައެވެ؟ އަޒާން، ނުހާ ވަރިކުރީ ކޮން ސަބަބަކާއި ހުރެ ބާވައެވެ؟ މި ޓްރެއިލަރގެ ކުރީ ބައިންނާއި، 'ޕަރީ' އިން ފެނުނު އޯގާތެރި އަޒާން، ނުހާއަށް އެހާ އަނިޔާވެރި އެވީ ކީއްވެ ބާވައެވެ؟ ދަރިފުޅަކު މަންމަ އާއި ދުރުކުރަން އަޒާން އަށް މަޖުބޫރުވީ ކީއްވެހެއްޔެވެ؟

ޑާކްރެއިން އެންޓަރޓެއިންމަންޓުން، މޮގަރ އާއި އެކު އައިޝަތު ފުވާދް ޕްރޮޑިއުސްކުރާ މި ފިލްމުގައި ޖުމަލް އައި މަޖޫގެ އިތުރުން ވެސް ގިނަ ފަންނާނުންތަކެއް ފެނިގެންދާނެއެވެ. އެގޮތުން ޚަދީޖާ އިބްރާހިމް ދީދީ (ކުޑަ ހައްޖަ)، އަޙުމަދު ސުނީ، ޢަބްދުﷲ ޝާފިއު އިބްރާހިމް، މަރިޔަމް ޔާލާ ޝިފާއު، ޢައިޝަތު ޝްއުއާ ޝާނިޒް އަދި ހަސަން މަނިކުގެ އިތުރުން އާދަމް ރިޒްވީ، މާރިއާ ޓެރޭސާ، އިބްރާހިމް އަމާން ޙުސައިން، އަޙުމަދު ޝާކިރު، މާއިޝާ އަޙުމަދާއި މަރިޔަމް ސާޖިޔަތުވެސް މި ފިލްމުން ފެނިގެން ދާނެއެވެ. މީގެ އިތުރުން ވެސް މި ފިލްމުން ބައެއް ފަންނާނުން ފެނިގެން ދާނެއެވެ.

އައިޝަތު ފުވާދް ލިޔެފައިވާ ވާހަކައަކަށް ހަދާ މި ފިލްމު ޑައިރެކްޓް ކޮށްފައި ވަނީ އަލީ ޝިފާޢު (ޗިއްޕެ) އެވެ. ޑާކްރެއިން އެންޓަރޓެއިންމަންޓްގެ ގިނަ ފިލްމުތަކޭ ވެސް އެއްގޮތަށް މި ފިލްމުގެ ވިޜުއަލް އިފެކްޓްސް ހަދާފައިވަނީ ވެސް އަޙުމަދު ޝިނާނެވެ. މި ފިލްމަށް ޙުސައިން ޝަދިޔާން (ސޭންޑީ) ކޮސްޓިއުމް ޑިޒައިން ކޮށްދީފައިވާއިރު، މި ފިލްމުގެ މިއުޒިކް ހަދާފައިވަނީ މުޙައްމަދު އިކްރާމްއެވެ.

ފިލްމު ރިލީޒްކުރުމަށް ނިންމާފައި ވަނީ މި އަހަރުގެ މާރޗު މަހުގެ 5 ވަނަ ދުވަހުގެ ރޭ އޮލިމްޕަހުގައެވެ.