ސޭވް ދި ޗިލްޑްރަން އޮފީހަށް ހަމަލާދީފި

އަފްޣާނިސްތާނުގެ އިރުމަތީގެ ސިޓީއެއް ކަމަށްވާ ޖަލާލް އާބާދުގައި ހުންނަ ސޭވް ދި ޗިލްޑްރެން އޮފީހުގައި އެއްޗެއް ގޮއްވާލުމަށް ފަހު ހަމަލާދިން މީހުން އެތަނުގެ ތެރެއަށް ވަދެގެންފިއެވެ.

މިހާތަނަށް 11 މީހުން ޒަޚަމްވި ކަމަށް ރިޕޯޓްތައް ބުނެއެވެ.

ހަމަލާފެށިފައިވަނީ ޖާނުން ފިދާވުމުގެ ކާރުބޮމުގެ ހަމަލާއަކުން ކަމަށް ބެލެވޭއިރު އިމާރާތުގެ މަތީ ފަންގިފިލާތަކުގައި ތިބެ ހަނގުރާމަވެރިން އާރުޕީޖީއާއި މެޝިންބަޑި ބޭނުން ކޮށްފައިވެއެވެ.

އެ ސަރަހައްދުގެ އާއްމުން ސަރަހައްދުން ފިލަން ދުވާ މަންޒަރު ފޮޓޯތަކުން ފެނެއެވެ. މިހާތަނަށް އަދި އެއްވެސް ޖަމާއަތަކުން ހަމަލާގެ ޒިންމާ ނަގާފައެއް ނުވެއެވެ.

ޕާކިސްތާނުގެ ސަރަހައްދީ ރޮނގާއި އިންވެގެން އޮންނަ ޖަލާލް އާބާދަކީ ތާލިބާން ހަނގުރާމަވެރިންގެ ހަމަލާތައް އާއްމުކޮށް އަމާޒުވަމުންދާ ސަރަހައްދެކެވެ. ނަމަވެސް އެތަނަކީ އިސްލާމިކް ސްޓޭޓްގެ ހަނގުރާމަވެރިންގެ ވެސް ބާރުގަދަ ސަރަހައްދަކަށްވާއިރު އެ ޖަމާއަތުގެ ހަނގުރާމަވެރިން 2015 ވަނަ އަހަރުން ފެށިގެން އެ ސަރަހައްދުގައި ހަރަކާތްތެރިވެއެވެ.

މި ހަމަލާ ދީފައިމިވަނީ ކާބުލްގައި ހުންނަ އިންޓަކޮންޓިނެންޓަލް ހޮޓަލުގައި ހަމަލާއެއްދީ 22 މީހުން މަރާލިތާ ހަފްތާއެއް ނުވަނީހެވެ.

ހޮނިހިރު ދުވަހުދިން އެ ހަމަލާގައި 22 މީހުން މަރުވެފައިވާއިރު އޭގެ ތެރެއިން ގިނަ މީހުންނަކީ ބޭރު ގައުމުތަކުގެ މީހުންނެވެ.