ބުރުގާ އަޅައިގެން ހުރުމުން ކުޑަކުއްޖަކަށް ކަތުރަކުން ހަމަލާދީފި

ކެނެޑާގެ މައި އެއް ސިޓީ ކަމުގައިވާ ޓޮރޮންޓޯގައި ކުޑަ އަންހެން ކުއްޖަކަށް ކަތުރަކުން ހަމަލާދީފިއެވެ.

ހުކުރު ދުވަހު އުމުރުން 11 އަހަރުގެ ޙައުލާ ނޫމާން އަށް ހަމަލާދީފައި ވަނީ އޭނާގެ ކޮއްކޮ އާއި އެކު ސްކޫލަށް ދިޔަ މަގުމަތީގައެވެ. ފުލުހުންނާ ހަވާލާދީ ކެނެޑާގެ ނޫސްތަކުން ބުނެފައި ވަނީ ޙައުލާއަށް ދެ ފަހަރެއްގެ މަތިން ހަމަލާ ދީފައިވާ ކަމަށާއި، ހަމަލާ ދިން މީހާ މަސައްކަތް ކޮށްފައި ވަނީ ޙައުލާގެ ބުރުގާ ނެގުމަށާއި، ބުރުގާ ކަފައިލުމަށް ކަމަށެވެ.

ފުލުހުން އިތުރަށް ބުނެފައި ވަނީ ޙައުލާއަށް ހަމަލާ ދިން މީހާ ހުރީ ހަޅުކުލައިގެ ހުޑީއެއް ލައިގެން، އައިނު އަޅައިގެން ކަމަށެވެ. އަދި އެއީ އުތުރު އޭޝިއާ ސަރަޙައްދަށް ނިސްބަތްވާ އުމުރުން ގާތްގަނޑަކަށް ވިއްސަކަށް އަހަރުގެ މީހެއް ކަމަށް ބެލެވޭ ކަމަށާއި، އޭނާ ހޯދުމުގެ މަސައްކަތް މިހާރު ކުރަމުންދާ ކަމަށް ވެސް ފުލުހުން ވަނީ ބުނެފައެވެ.

ޙައުލާ އޭނާގެ ކޮއްކޮ އަދި މަންމައާ އެކު

ފުލުހުން ބުނީ މި ހަމަލާގައި ޙައުލާއަށް ޖިސްމާނީ އަނިޔާއެއް ނުލިބުނު ނަމަވެސް ޙައުލާ އަޅައިގެން ހުރި ބުރުގާ އިން ބޮޑު ބައެއް ކަފާލާފައިވާ ކަމަށެވެ.

މި ހަމަލާއަށް ފަހު ޓޮރޮންޓޯ ނިސްބަތްވާ އޮންޓާރިއޯގެ ޕްރިމިއަރ، ކެތުލީން ވައިން ކުރެއްވި ޓްވީޓެއްގައި ވިދާޅުވީ، މި އަމަލަކީ ފިނޑި އަމަލެއް ކަމަށާއި، މިއީ ކެނެޑާގެ ރައްޔިތުންގެ ގޮތް ނޫން ކަމަށެވެ. އަދި ޙައުލާއަށް ދިން ހަމަލާއަކީ ހަމައެކަނި އޭނާ އަޅާ ބުރުގާއަށްޓަކައި ދެވުނު ހަމަލާއެއް ކަމަށާއި، މި މައްސަލައިގައި ހުރިހާ އެންމެވެސް ޙައުލާއާ އެކު ތިބެންޖެހޭ ކަމަށެވެ.