ބަންގާޅު ބޯޑަރުކައިރިން ރޯހިންގޔާ މުސްލިމުންނަށް ހަމަލާދީފި
ހަމަލާގައި ބައެއް މީހުންނަށް އަނިޔާވި ނަމަވެސް މި ހަމަލާގައި މީހަކު މަރުވެފައިވާކަން އަދި ކަށަވަރެއް ނުވޭ
މިޔަންމާގެ ރޯހިންގޔާ ދަރިކޮޅުގެ މުސްލިމުންތަކެއް
މިޔަންމާ ގައި ހިންގަމުންދާ އަނިޔާވެރި ޖަރީމާތަކުން ސަލާމަތްވުމަށް މަސައްކަތްކުރި ރޮހިންގޔާ ދަރިކޮޅުގެ މުސްލިމުންގެ ބަޔަކަށް މިޔަންމާ ސިފައިން ބަޑިން ހަމަލާދީފިއެވެ.
މިޔަންމާ ސިފައިން ހަމަލާދީފައިވަނީ މިޔަންމާ އާއި ބަންގްލަދޭޝް ގުޅޭ ސަރަޙައްދީ ރޮނގު ހުރަސްކޮށް ބަންގްލަދޭޝްއަށް އެތެރެވާން އުޅުނު ބަޔަކަށެވެ. ރިޕޯޓްތައް ބުނާ ގޮތުގައި މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.
ބަންގްލަދޭޝްގެ ގުމްދުމް ބޯޑަރުގައި ހުރި ރިޕޯޓަރަކާއި ހަވާލާދީ އޭއެފްޕީގައި ބުނެފައިވަނީ، ރީހިންގޔާ މުސްލިމުންނަށް މިޔަންމާ ސިފައިން ހަމަލާ ދީފައިވަނީ މޯޓަރު ބަޑިއާއި މެޝިން ބަޑިން ކަމަށެވެ. މިޔަންމާ ސިފައިން ދިން މި ހަމަލާގައި ބައެއް މީހުންނަށް އަނިޔާވި ނަމަވެސް މި ހަމަލާގައި މީހަކު މަރުވެފައިވާކަން އަދި ކަށަވަރެއް ނުވެއެވެ.
ސްވިޒަލޭންޑްގައި ޤާއިމްކޮށްފައިވާ ޔޫރަޕިއަން ރޮހިންގޔާ ކައުންސިލުން ބުނެފައިވާ ގޮތުގައި ވޭތުވެދިޔަ ދުވަސްތަކުގައި މިޔަންމާގެ ސިފައިންނާއި ރަޚައިންގެ ހައްދު ފަހަނައަޅާފައިވާ ފިކުރުގެ މީހުން، ރޮހިންގޔާ މުސްލިމުންނަށް ދެމުންދާ ހަމަލާތަށް ވަނީ އިތުރުވެފައެވެ.
ބަންގްލަދޭޝް ބޯޑަރު ކައިރިން ރޮހިންގޔާ މުސްލިމުންގެ ބަޔަކަށް ހަމަލާދީފައިވާއިރު، ހުކުރުދުވަހުން ފެށިގެން، މިޔަންމާ ސިފައިންނާއި، ރޮހިންގޔާ ހަނގުރާމަވެރިންނާއި ދެމެދު ރަޚައިންގައި ހިނގަމުންދާ ހަމަލާ ބަދަލުކުރުންތަކުގައި މިހާތަނަށް 92 މީހުން ވަނީ މަރުވެފައެވެ.
