ފަލަސްތީނު ދައުލަތެއްގެ ގޮތުގައި އަވަހަށް ބަަލައިގަތުމަށް އައްބާސް އީޔޫއަށް ދަންނަވައިފި

އިރުމަތީ ގުދުސްއަކީ އެ ދައުލަތުގެ ވެރިރަށް ކަމަށް ބަލައިގަނެ ފަލަސްތީނުގެ ދައުލަތެއް ކަމަށް "އަވަހަށް" ބަލައިގަތުމަށް ފަލަސްތީނުގެ ރައީސް މަހުމޫދު އައްބާސް އެދިވަޑައިގެންފިއެވެ.

ބްރަސަލްސްގައި ހުންނަވައި ހޯމަ ދުވަހު އައްބާސް މިހެން ވިދާޅުވެފައި މި ވަނީ ހަމަ އެދުވަހު އިސްރާއީލުގެ ގާނޫނުހަދާ މަޖިލީހުގައި ވާހަކަދައްކަވަމުން، އަންނަ އަހަރު ނިމުމުގެ ކުރިން އިސްރާއީލުގައި ހުންނަ އެމެރިކާގެ އެމްބަސީ ގުދުސްއަށް ބަދަލުކުރާނެ ކަމަށް އެމެރިކާގެ ނާއިބު ރައީސް މައިކް ޕެންސް ވައުދުވެ ވަޑައިގެންފައިވަނިކޮށެވެ.

ގުދުސްއަކީ އިސްރާއީލުގެ ވެރިރަށް ކަމަށް ބަލައިގަނެ އެމްބަސީ ގުދުސްއަށް ބަދަލުކުރުމަށް މިދޔަ މަހު އެމެރިކާ އިން ނިންމި ނިންމުމާ ގުޅިގެން ފަލަސްތީނުން ވަނީ ޕެންސްގެ ދަތުރުފުޅު ބޮއިކޮޓްކޮށްފައެވެ.

އީޔޫގެ ޚާރިޖީ ވަޒީރުންނާ ބައްދަލުކުރައްވައި އައްބާސް ވަނީ 28 ގައުމު ހިމެނޭ އެ ބްލޮކަކީ ހަގީގީ ބައިވެރިއެއް އަދި އެކުވެރިޔެއް ކަމަށް ވިދާޅުވެ މެދުއިރުމަތީގެ މައްސަލައިގައި ސިޔާސީ ގޮތުން ކުރެވޭ މަސައްކަތްތައް އިތުރުކޮށްދެއްވުމަށް އެދިވަޑައިގެންފައެވެ.

އައްބާސް ވިދާޅުވީ ފަލަސްތީނަކީ ދައުލަތެއް ކަމަށް އީޔޫއިން ބަލައިގަތުމަކުން އިސްރާއީލާ އެކު ކުރިޔަށް ގެންދާ ސުލްހައިގެ ވާހަކަތަކަށް ބުރުލެއް ނާރާނެ ކަމަށާއި އޭގެ ބަދަލުގައި އެކަން ވާނީ ސުލްހައަށް ކުރާ އިންތިޒާރުގައި ފަލަސްތީނުގެ ރައްޔިތުންނަށް ލިބޭ ހިތްވަރަކަށް ކަމަށެވެ.

މީގެ އިތުރުން ހޯމަ ދުވަހުގެ ފަހުގެ ވަގުތެއްގައި އައްބާސް ވިދާޅުވެފައި ވަނީ ގުދުސްގެ މައްސަލައިގައި އީޔޫ އިން ފަލަސްތީނާ އެއްބަސްވާ ކަމަށެވެ. އަދި އީޔޫ އަށް މައްސަލަ އެނގޭ ކަމަށާއި ނަމަވެސް އަދި ފަލަސްތީނު ދައުލަތެއްގެ ގޮތުގައި ބަލައިގަތުމާ މެދު އެ ޖަމާތުން ގޮތެއް ނިންމާފައި ނުވާ ކަމަށެވެ. އެގޮތަށް ނިންމާފައި ނުވަނީ އެކަމާ ބެހޭ ގޮތުން އިތުރު ބައްދަލުވުމެއް ބޭއްވުމަށް ކަމަށް ވެސް ވަނީ ވިދާޅުވެފައެވެ.

އިރުމަތީ ގުދުސްއަކީ ފަލަސްތީނުގެ މިނިވަން ދައުލަތެއްގެ ވެރިރަށުގެ ގޮތުގައި ފަލަސްތީނުން ދެކޭއިރު، ފަލަސްތީނުގެ ބިންތަކަށް ވެރިވެގެންފައިވާ އިޒްރޭލުގެ ދައުލަތުން ދެކެނީ އިރުމަތީ ގުދުސް ހިމެނޭ ގޮތަށް މުޅި ގުދުސްއަކީ އިޒްރޭލުގެ ވެރިރަށުގެ ގޮތުގައެވެ.

ގުދުސް އަކީ އިޒްރޭލުގެ ވެރިރަށުގެ ގޮތުގައި އެމެރިކާ އިން ބަލައިގަނެ، ޓެލް އަވީވްގައި ހުންނަ އެމެރިކާގެ އެމްބަސީ ގުދުސް އަށް ބަދަލު ކުރުމަށް ޑޮނަލްޑް ޓްރަމްޕް ނިންމަވާފައި ވަނީ، އިރުމަތީ ގުދުސްގެ ގާނޫނީ ހައިސިއްޔަތަށް އެއްވެސް ބަދަލެއް އަންނާނެ ނިންމުމެއް ނުނިންމޭނެ ކަމަށް ކަނޑައަޅައި، އދ. ގެ ސަލާމަތީ މަޖިލީހުން ފާސްކޮށްފައިވާ ގަރާރާއި ޚިލާފަށެވެ. އަދި ޓްރަމްޕްގެ ނިންމެވުމަކީ ބާތިލް އަދި ޣައިރު ގާނޫނީ ނިންމެވުމެއް ކަމަށް ކަނޑައަޅައި، އދ. ގެ އާއްމުން މަޖިލީހުން ގަރާރެއް ފާސްކޮށްފައިވެއެވެ.

އީޔޫގެ ގާނޫނުހަދާ މަޖިލީހުން 2014 ވަނަ އަހަރު ވަނީ "އުސޫލެއްގެ ގޮތުން" ފަލަސްތީނުގެ ދައުލަތް ބަލައިގަންނަ ކަމަށް އިއްތިފާގުން ފާސްކޮށްފައެވެ. ނަމަވެސް އެ ޖަމާއަތުން ބުނެފައި ވަނީ އެފަދަ ނިންމުމެއް އަންނަންވާނީ ސުލްހައިގެ ވާހަކަތައް ކުރިޔަށް ގެންްދެވޭނެ ގޮތެއްގެ މަތިން ކަަމަށެވެ.