އެމެރިކާގެ ނާއިބު ރައީސް މައިކް ޕެންސް މެދުއިރުމަތީގެ ގައުމުތަކަށް ކުރައްވާ ދަތުރުފުޅުގައި އާދީއްތަ ދުވަހު އިސްރާއީލަށް ވަޑައިގެންފިއެވެ.
ނާއިބު ރައީސް ޕެންސް އަށް އިސްރާއީލުގެ ތެލް އަވީވްގެ ބެން-ގުރިއޮން އެއާޕޯޓުން މަރުހަބާ ވިދާޅުވީ އެގައުމުގެ ޓުއަރިޒަމް މިނިސްޓަރެެވެ. ނާއިބު ރައީސް ޕެންސް އިސްރާއީލަށް ވަޑައިގަތުމާ ގުޅިގެން އިސްރާއީލުގެ ބޮޑު ވަޒީރު ބެންޔަމިން ނަތަންޔާހޫ ވިދާޅުވީ ޕެންސްއަކީ "އިސްރާއީލުގެ ވަރަށް ގާތް ރަހްމަތްތެރިއެއް ކަމަށެވެ."
ނާއިބު ރައީސް މައިކް ޕެންސް މެދުއިރުމަތީގެ ގައުމުތަކަށް ވަޑައިގަނެންނެވިއިރު، މިއީ ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން މިދިޔަ އަހަރު ޑިސެމްބަރު މަހު އިއުލާން ކުރުމަށް ފަހު، މެދު އިރުމައްޗަށް ވަޑައިގަންނަވާ އެމެރިކާގެ އެންމެ އިސް އޮފިޝަލެވެ.
ޕެންސް އިސްރާއީލަށް ވަޑައިގެންނެވުމުގެ ކުރިން އެމަނިކުފާނު ވަނީ މިސްރަށާއި އުރުދުން އަށް ވެސް ވަޑައިގަންނަވާފައެވެ. ރިޕޯޓުތައް ބުނާ ގޮތުން ނާއިބު ރައީސް ޕެންސް އުރުދުން އަށް ވަޑައިގަންނަވައި އުރުދުންގެ ރަސްގެފާނު އަބްދުﷲއާ އެކު ބޭއްވި ބައްދަލުވުން ދިޔައީ ވަރަށް ހޫނުކޮށެވެ. މި ބައްދަލުވުމުގައި ނާއިބު ރައީސް ޕެންސް ވަނީ ރަސްގެފާނު އަބްދުﷲ ގެ "އިތުބާރު" ހޯއްދެވުމަށް މަސައްކަތް ކުރައްވާފައި ކަމަށް ރިޕޯޓުތައް ބުނެއެވެ. ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލުކުރިކަން އިއުލާކުރުމާ ގުޅިގެން ރަސްގެފާނު އަބްދުﷲ ވަނީ އެކަމާ ނުރުހުން ފާޅުކުރައްވާފައެވެ.
ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން އިއުލާން ކޮށްފައި ވަނީ މިދިޔަ ޑިސެމްބަރު މަހު 6 ގައެވެ. އިސްރާއީލާއި ފަލަސްތީނާ ދެމެދު ސުލްހައިގެ މަގެއް ހޯދުމަށް ކުރެވެމުންދާ މަސައްކަތުގައި އެންމެ ނާޒުކު އަދި އުނދަގޫ މައްސަލައަކަށް ގުދުސްގެ މައްސަލަވެފައި ވަނިކޮށް، ގުދުސްއަކީ އިސްރާއީލުގެ ވެރިރަށް ކަމަށް ގަބޫލު ކުރާކަން އެމެރިކާ އިން އިއުލާން ކުރުމުން މައްސަލަ އިތުރަށް މިވަނީ ގޯސްވެފައެވެ. އެމެރިކާގެ މި ނިންމުމާ އެކު މައްސަލައެއް ހައްލެއް ހޯދުމަށް އެމެރިކާ އިން އަދާކުރަމުން ދިޔަ މެދުވެރިއެއްގެ ދައުރު ވެސް މިވަނީ ނިމުމަކަށް އައިސްފައެވެ.
