ރޮހިންޖާގެ ރެފިއުޖީ ކޭމްޕްތަކުގެ ހާލަތު އިތުރަށް ގޯސްވުމުގެ ބިރު އެބަ އޮތް: އދ.

މިޔަންމާ ދޫކޮށް ބަންގްލަދޭޝް އަށް ހިޖުރަކޮށްފައިވާ ރޮހިންޖާ ދަރިކޮޅުގެ ރެފިއުޖީން ދިރިއުޅޭ ކޭމްޕްތަކުގެ ހާލަތު ކުރިއަށް އޮތް ދުވަސްތަކުގެ ތެރޭގައި އިތުރަށް ގޯސްވުމުގެ ބިރު އެބައޮތް ކަމަށް އދ. ގެ އޮފިޝަލަކު ވިދާޅުވެއްޖެއެވެ.

ބަންގްލަދޭޝްގެ ކޮކްސް ބާޒާރުގައި ހުންނަ ބަލުޚާލީ ރެފިއުޖީ ކޭމްޕްގައި ހުންނަވައި އަލްޖަޒީރާ އަށް ދެއްވި އިންޓަވިއުއެއްގައި، އިންސާނީ ހައްގުތަކުގެ ކަންކަން މޮނީޓަރ ކުރާ އދ. ގެ ހާއްސަ މަންދޫބު ޔަންގީ ލީ ވިދާޅުވީ ކުރިއަށް އޮތީ ބަންގްލަދޭޝް އަށް މޫސުމް ގޯސް ދުވަސްވަރެއް ކަމަށާއި، ރެފިއުޖީ ކޭމްޕްތައް ހުރި ސަރަހައްދުގައި ބިންގަނޑު ކަނޑައިގެން ދިއުމުގެ ހާދިސާތައް ހިނގުން އިތުރު ވެގެން ދާނެ ކަމަށެވެ. މިހާރު ވެސް ފުރިބާރުވެފައިވާ ރެފިއުޖީ ކޭމްޕްތަކުގައި ދިރިއުޅޭ ރެފިއުޖީންގެ ތެރެއިން ގިނަ އަދަދެއްގެ ބަޔަކަށް އެކަމުގެ ސަބަބުން ލިބޭ އަނިޔާތައް އިތުރުވުން އެކަށީގެންވާ ކަމަށް އޭނާ ވިދާޅުވިއެވެ.

މީގެ އިތުރުން ލީ ވަނީ، ބޯކޮށް ވާރޭވެހި ފެންބޮޑުވުމާ ގުޅިގެން ބަލިމަޑުކަމެއް ފެތުރުމުގެ ފުރުޞަތު އެބައޮތް ކަމުގެ އިންޒާރު ވެސް ދެއްވާފައެވެ.

ޖެނުއަރީ މަހުގެ ތެރޭގައި ލީ، މިޔަންމާ އަށް ވަޑައިގެން، އެގައުމުގެ އިންސާނީ ހައްގުތަކުގެ ހާލަތު ބެއްލެވުމަށް ވަނީ ހަމަޖެހިފައެވެ. މިދަތުރުފުޅުގައި އެގައުމުގެ މިޔަންމާ ދަރިކޮޅުގެ އާއްމުން ދިރިއުޅުނު ރަޚައިން ސްޓޭޓަށް ޒިޔާރަތް ކުރެއްވުމަށް ހަމަޖެހިފައިވެއެވެ.

މިޔަންމާގެ ރޮހިންޖާ ދަރިކޮޅުގެ މުސްލިމުންނާ ދެކޮޅަށް އެގައުމުގެ އަސްކަރިއްޔާ އިން ހިންގި ލާއިންސާނީ އޮޕަރޭޝަނުގައި ރަޚައިން ސްޓޭޓްގެ ބޮޑު ބައެއްގައި ހުޅުޖަހައި، އެމީހުންގެ އަވަށްތައް ހުރި ގޮތަށް ވަނީ އަންދާލާފައެވެ. އަސްކަރިއްޔާ އިން ހިންގި އަނިޔާވެރި އޮޕަރޭޝަނުގެ ތެރޭގައި ހުޅުޖެހުމުގެ އިތުރުން ގަނޑުކޮށް މީހުން މެރުމާއި، އަންހެނުންނާއި ކުޑަކުދިން ރޭޕްކުރުން ފަދަ ލާއިންސާނީ އެތައް ޖަރީމާއެއް ހިންގާފައިވެއެވެ.

އަސްކަރިއްޔާގެ ރަހުމްކުޑަ، މުޑުދާރު އޮޕަރޭޝަނާ ގުޅިގެން ރޮހިންޖާ ދަރިކޮޅުގެ ހަ ލައްކަ ފަންސާސް ހާހަށް ވުރެ ގިނަ އާއްމުން ވަނީ މިޔަންމާ ދޫކޮށް ބަންގްލަދޭޝް އަށް ހިޖުރަކޮށްފައެވެ.

އދ. އިން ވަނީ މިޔަންމާގެ އަސްކަރިއްޔާގެ މިއަމަލަކީ "ނަސްލެއް ނައްތާލުމުގެ ޓެކްސްޓް ފޮތްތަކުގެ ނަމޫނާ" އެއްގެ ގޮތުގައި ސިފަކޮށްފައެވެ.

އދ.ގެ އިންސާނީ ހައްގުތައް މޮނީޓަރކުރާ ހާއްސަ މަންދޫބުގެ މަގާމަށް ލީ ހަމަޖައްސާފައި ވަނީ 2014 ވަނަ އަހަރުއެވެ. އޭނާގެ މަގާމުގެ ޒިންމާ އަދާކުރުމަށް ކޮންމެ އަހަރަކު ދެ ފަހަރު މިޔަންމާ އަށް ދަތުރުކޮށް، އެގައުމުގައި އިންސާނީ ހައްގުތަކުގެ ހާލަތު ހުރި މިންވަރާ ބެހޭ ރިޕޯޓެއް އދ. ގެ ހިއުމަން ރައިޓްސް ކައުންސިލަށާއި. އދ. ގެ އާއްމު މަޖިލީހަށް ހުށަހަޅަންޖެހެއެވެ.