އެމެރިކާގެ ނައިބު ރައީސް މައިކް ޕެންސް މެދުއިރުމަތީގެ ގައުމުތަކަށް ކުރައްވާ ދަތުރުފުޅެއް ހުކުރު ދުވަހު ފަށްޓަވާނެއެވެ.

ނައިބު ރައީސް މައިކް ޕެންސް މެދުއިރުމަތީގެ ގައުމުތަކަށް ވަޑައިގަންނަވާއިރު، މިއީ ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން މިދިޔަ އަހަރު ޑިސެމްބަރު މަހު އިއުލާން ކުރުމަށް ފަހު، މެދު އިރުމައްޗަށް ވަޑައިގަންނަވާ އެމެރިކާގެ އެންމެ އިސް އޮފިޝަލެވެ.

ހަތަރު ދުވަހުގެ މުއްދަތައް އެމެރިކާގެ ނައިބު ރައީސް މެދުއިރުމައްޗަށް ވަޑައިގަންނަވާއިރު، އެމަނިކުފާނު މިސްރު، ޖޯޑަން އަދި އިސްރާއީލަށް ވަޑައިގަންނަވާނެއެވެ.

ނައިބު ރައީސް ޕެންސް މެދުއިރުމައްޗަށް ވަޑައިގަންނަވާއިރު، މި ދަތުރުފުޅު ކުރީގައި ޝެޑިއުލް ކުރެވިފައި އޮތީ މިދިޔަ ޑިސެމްބަރު މަހަށް ކަމަށްވާއިރު، އޭރު ނައިބު ރައީސް ޕެންސް މެދުއިރުމައްޗަށް ވަޑައިނުގެންނެވީ އެމެރިކާ އިން ގުދުސް އަކީ އިސްރާއީލުގެ ވެރިރަށްކަމަށް ބަލައިގަތުމުން އުފެދުނު ފާޑުކިޔުންތަކާ ގުޅިގެންނެވެ.

ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން އިއުލާން ކޮށްފައި ވަނީ މިދިޔަ ޑިސެމްބަރު މަހު 6 ގައެވެ. އިސްރާއީލާއި ފަލަސްތީނާ ދެމެދު ސުލްހައިގެ މަގެއް ހޯދުމަށް ކުރެވެމުންދާ މަސައްކަތުގައި އެންމެ ނާޒުކު އަދި އުނދަގޫ މައްސަލައަކަށް ޖެރޫސަލަމްގެ މައްސަލަވެފައި ވަނިކޮށް، ޖެރޫސަލަމްއަކީ އިސްރާއީލުގެ ވެރިރަށް ކަމަށް ގަބޫލު ކުރާކަން އެމެރިކާ އިން އިއުލާން ކުރުމުން މައްސަލަ އިތުރަށް މިވަނީ ގޯސްވެފައެވެ. އެމެރިކާގެ މި ނިންމުމާއެކު މައްސަލައެއް ހައްލެއް ހޯދުމަށް އެމެރިކާ އިން އަދާކުރަމުން ދިޔަ މެދުވެރިއެއްގެ ދައުރު ވެސް މިވަނީ ނިމުމަކަށް އައިސްފައެވެ.