ފޮއިގޮނޑި އެޅުން: ކިހިނެއް ކުރާ ކަމެއް؟

މި ވީޑިއޯ ފެނުމާއެކު، ކުޑައިރުގެ ހަނދާންތަކުގެ ތެރެއަށް ގަންބާލި އެވެ. އުފަންވެ، އުޅެ ބޮޑުވި ވިލުފުއްޓާ އެއް ފަޅެއްގައި، ރަށާއި ނުލާހިކު ކައިރީގައި އޮންނަ ހިތްގައިމު ފަޅުރަށުގެ ހަނދާންތަކެވެ. އެއީ ހޮނޑެލިފުއްޓެވެ. އެ ރަށަށް ގޮސް މަސްބަތް ކެއްކުމާއި މަސް ފިހުމަށް އަލިފާން ރޯކުރަން އުޅެންޖެހުނު ގޮތުގެ ހަނދާންތަކެވެ. ފޮއިގޮނޑި އަޅާ ހަނދާންތަކެވެ.

މި ޒަމާނުގެ ކުދިންނަށް ފޮއިގޮނޑި އެޅުމަކީ ކޮބައިކަން ނޭނގިދާނެ އެވެ. އަހަރެމެން ކުޑައިރު، 1980 ގެ އަހަރުތަކުގައި ދަތުރު ދާއިރު ބައެއް ދުވަސް ދުވަހު އަލިފާން ރޯކުރުމަށް އެއްވެސް އެއްޗެއް ނުގެންދަމެވެ. އަލިފާން ފޮއްޓެއް، ލައިޓަރެއް މުހިއްމެއް ނޫނެވެ. ބައެއް ދަތުރުތަކުގައި އެކުވެރިންގެ ތެރެއިން ކޮންމެވެސް އެކެއްގެ ގޭގެ ބަދިގޭގައި އޮންނަ އަލިފާންފޮށިން ދެތިން އަލިފާން ދަނޑި އާއި އަލިފާން ފޮށީގެ އަރިމަތީގައިވާ ހިލަ ފަށަލައިން ތަންކޮޅެއް ނައްޓާލައިގެން ގެންދަމެ އެވެ. ނަމަވެސް ނަސީބު ދެރަކަމުން، ނުވަތަ ސަކަރާތް ބޮޑުވެގެން ފަޅުރަށަށް އެރުމުގެ ކުރިން، ޖީބުގައި އޮންނަ އަލިފާން ދަނޑިކޮޅާއެކު މޫދަށް ވެއްޓެ އެވެ. ނުވަތަ ބޮއްކުރާގައި ދިޔަ ހިއްކަން ހުންނަ ކުއްޖާ އެންމެން ގަޔަށް ލޮނުޖަހައި ތެންމާލަ އެވެ.

އެހެންވެ، އަލިފާން ރޯކުރުމަށް ފޮއިގޮނޑި އެޅުން ނޫން ގޮތެއް ނޯވެ އެވެ.

ފޮއިގޮނޑި އަޅަނީ

ބޭނުންވާ ތަކެތި:

ހިކި ލަކުޑި ގަނޑެއް

ފޮއެގެ ގޮތުގައި ބޭނުންކުރުމަށް ހަރުލަކުޑި ގަހެއްގެ ދަނޑިގަނޑެއް

ވާފަށެއް

ލަކުޑިގަނޑުގައި ލޯވަޅު އެޅުމަށް ވަޅިއެއް

އަލިފާން ރޯކުރަން ހަދާނެ ގޮތް:

ފޮއިގޮނޑި އެޅުމަށް ބޭނުންކުރާ ދަނޑިގަނޑު ނުނެއްޓޭ މިންވަރަށް ލަކުޑިގަނޑުގައި ލޯވަޅެއް އަޅާށެވެ. އެއަށް ފަހު، ދަނޑިގަނޑުގައި ވާފަށް އޮޅާލުމަށް ފަހު ދަމާށެވެ. ދަނޑިގަނޑުގެ މަތީގައި މީހަކު ހިފަހައްޓައިގެން ހުންނަންވާނެ އެވެ. ހިފެހެއްޓުމަށްޓަކައި ދަނޑިގަނޑުގެ ކޮޅުގައި ނާޓެއް އަޅައިފި ނަމަ ފަސޭހަވާނެ އެވެ.

ފޮނުވަތް ދަމާ ގޮތަށް، ދަމަމުންދާށެވެ. މާއަވަސް އަރުވާލިޔަސް، އަލިފާން ރޯވުން ލަސްވާނެ އެވެ. މިކަމުގައި އެންމެ މޮޅު ހުނަރަކީ، އެއް މިނެއްގައި ދަމަމުން ދިއުމެވެ. އޭރުން ދަނޑިގަނޑާއި ލަކުޑިގަނޑު ކޭތިކޭތި އުފެދޭ ހޫނާއެކު، ލަކުޑިގަނޑު އަނދައި ދުން އަރަން ފަށާނެއެވެ. އަލިފާން ރޯވަން ފެށުމުން، ހިނކި ބޮނބިގަނޑެއް ޖައްސާށެވެ. ބޮނބިގަނޑުގައި އަލިފާން ހިފުން ލަސްވެއްޖެ ނަމަ، އަގައިން ފުމަމުންދާށެވެ. އިސާހިތަކު އަލިފާން ރޯވެދާނެ އެވެ.

ފޮއިގޮނޑި އަޅައިގެން އަލިފާން ރޯކުރަނީ

ފޮއިގޮނޑި އަޅާ ވީޑިއޯ މި ލިޔުމުގައި ހިމަނާފައިވާ ވީޑިއޯއަކީ، ށ. ކަނޑިތީމު ބަޔަކު، ޑިސެމްބަރު 19 ވަނަ ދުވަހުގެ ރޭ އެ ރަށް ކައިރީގައި އޮންނަ ފަޅު ރަށެއްކަމުގައިވާ ކަކައެރިޔަދޫ (ކަކައިރަދޫ) އަށް ގޮސް، ފޮައިގޮނޑި އަޅާ ވީޑިއޯއެކެވެ.

"އަހަރެމެންނާއެކު އެރަށަށް ދިޔަ އިސް މީހާ ބުނީ މިރޭ ލައިޓަރެއް ނުލިބޭނޭ. މަސް ފިހަން ޖެހޭނީ ފޮައިގޮނޑި އަޅައިގެން އަލިފާން ރޯކުރާށޭ. ދެން އަހަރެމެން އެ މަސައްކަތް ފެށީ. ގާތްގަނޑަކަށް ދޮޅުގަނޑިއިރު ވަރު ނެގި އަލިފާން ރޯކުރަން،" އިސްމާއިލް އަފްރާހް ކިޔައިދިނެވެ.

މި ޒަމާނުގެ ކުދިންނަށް ވެސް މިކަން އެނގިފައި އޮތުން މުހިންމު ކަމެކެވެ. ތަޖުރިބާކޮށްލަން ރަނގަޅު ކަމެކެވެ.