ރައީސް މައުމޫނާ އެކު އަބަދުވެސް ދަނީ ކަންކަމުގައި މަޝްވަރާ ކުރެވެމުން: ރައީސް ނަޝީދު
16 ޖެނުއަރީ 2018 | އަންގާރަ 12:47މަޝަވަރާތައް ކުރެވޭ، އަދި ޝުކުރު ވެސް އަދާކުރަން
ރައީސް ނަޝީދާއި ރައީސް މައުމޫން
ކުރީގެ ރައީސް މައުމޫން އަބްދުލް ގައްޔޫމާ އެކު އަބަދުވެސް ކަންކަމުގައި މަޝްވަރާ ކުރައްވާ ކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މޯލްޑިވްސް އިންޑެޕެންޑެންޓް ނޫހުގައިވާ ޚަބަރަކާ ގުޅިގެންނެވެ. ރައީސް ނަޝީދު ވަނީ އެ ވާހަކަތައް ދޮގުކުރައްވާފައެވެ.
އެނޫހުގައި ބުނެފައިވާ ގޮތުގައި މިދިޔަ އަހަރުގެ މާރޗް މަހުން ފެށިގެން ރައީސް ނަޝީދާއި ރައީސް މައުމޫނާ ދެމެދު ވާހަކަ ނުދެކެވޭ ކަމަށާއި މަޝްވަރާއެއް ވެސް ނުކުރެވޭ ކަމަށެވެ. އެކަމަށް ރައްދު ދެއްވާ އެނޫސް ޓެގްކުރައްވާ ރައީސް ނަޝީދު ކުރެއްވި ޓވްީޓުގައި ވިދާޅުވެފައި ވަނީ އެނޫހުގައި އެވަނީ ކުށް ގޮތެއް ކަމަށެވެ. އަދި ރައީސް މައުމޫނާ އަބަދުވެސް ކަންކަމުގައި ބަރާބަރަށް ވާހަކަ ދެކެވޭ ކަމަށާއި އެމަނިކުފާނުގެ ޚިޔާލާއި މަޝްވަރާތައް ވެސް ދެއްވާ ކަމަށެވެ. އަދި އެކަމަށް ޝުކުރު އަދާކުރައްވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދުގެ އެ ޓްވީޓް ރައީސް މައުމޫން ވަނީ ރީޓްވީޓު ކުރައްވާފައެވެ. އަދި ރައީސް ނަޝީދަށް ޝުކުރު އަދާކުރައްވައި ރައީސް މައުމޫން ވަނީ ޓްވީޓެއް ކުރައްވާފައެވެ.
މިވާހަކަ މިގޮތަށް ދެކެވޭއިރު ގުޅިފައިވާ ޕާޓީތަކުގެ ވެރިންގެ ބައްދަލުވުމެއް ދާދިއަވަހަށް ބޭއްވޭނެ ކަމަށާއި އެބައްދަލުވުމުގައި ރައީސް މައުމޫނާއި ރައީސް ނަޝީދު ވެސް ބައިވެރިވެވަޑައިގަންނަވާނެ ކަމުގެ މައުލޫމާތު ރާއްޖެ އެމްވީއަށް ވަނީ ލިބިފައެވެ.
