ކުލީ ބައިކްގެ މޮޓޯ އިންޝުއަރެންސް ޕާޓްނަރަކަށް އެސްއެސްއެސް އިންޝުއަރެންސް ހަމަޖައްސައިފި

ކުލީ ބައިކްގެ މޮޓޯ އިންޝުއަރެންސް ޕާޓްނަރަކަށް އެސް.އެސް.އެސް އިންޝުއަރެންސް ހަމަޖައްސައިފިއެވެ.

މި ދެ ކުންފުނީގެ ދެމެދުގައި ހޯމަ ދުވަހު ވަނީ އެމްއޯޔޫއެއްގައި ސޮއިކޮށްފައެވެ. އެސް.އެސް.އެސް އިންޝުއަރެންސްގެ ފަރާތުން ސީނިއަރ އެގްޒެކްޓިވް ރިހުޝާން ހަސަން ސޮއިކުރައްވާފައިވާއިރު ކުލީ ބައިކްގެ ފަރާތުން ސޮއިކުރެއްވީ ޑިރެކްޓަރ ޝަފާއު ހަސަންއެވެ.

މި ރަސްމިއްޔާތުގައި ވާހަކަ ދައްކަވަމުން އެސް.އެސް.އެސް އިންޝުއަރަންސްގެ ސީނިއަރ އެގްޒެކްޓިވް ރިހުޝާން ވިދާޅުވީ މި އެމްއޯޔޫގައި ސޮއިކުރުމުގެ މައިގަނޑު މަޤްސަދަކީ ކަސްޓަމަރުން ކިއުގައި ހުންނަން ނުޖެހި ފަސޭހަކަމާ އެކު ސައިކަލް އިންޝުއަރެންސްކޮށް އަތަށް ސްޓިކާ ލިބޭނެ ގޮތް ފަސޭހަކަމާ އެކު ފަހިކޮށްދިނުން ކަމަށެވެ.

ކުލީ ބައިކްއަކީ އެއްގަމުގައި ދުއްވާ އުޅަނދުތައް ކުއްޔަށް ދޫކުރުމުގެ ހިދުމަތް ފޯރުކޮށްދޭ ފަރާތެކެވެ. ކުލީ ބައިކް އިން އެމީހުންގެ ހިދުމަތް ހަމައެކަނި ހުޅުމާލޭގައި ދިރިއުޅޭ ކަސްޓަމަރުންނަށް ފޯރުކޮށްދޭއިރު މި ހިދުމަތުގެ ސަބަބުން ހުޅުމާލެ އިން މާލެ އަށް ސައިކަލުތައް އުފުލާ ފަރާތްތަކަށް ހައްލެއް ލިބިގެންދާނެ ކަމަށް އެ ފަރާތުން ޤަބޫލުކުރެއެވެ.

ކުލީ ބައިކްގެ ޑިރެކްޓަރ ޝަފާއު ވިދާޅުވީ އެސް.އެސް.އެސް އިންޝުއަރެންސް މެދުވެރިކޮށް ސައިކަލާއި ސައިކަލު ކުއްޔަށް ނަގާ ފަރާތް އިންޝުއަރ ކުރެވިގެންދާނެ ކަމަށެވެ. އަދި މިވަގުތު ހަތަރު އުޅަނދެއް ގެންގުޅުނު ނަމަވެސް ރާއްޖޭގެ އެކި ކަންކޮޅުތަކަށް އެމީހުންގެ ހިދުމަތް ފޯރުކޮށްދިނުމުގެ ވިސްނުން ގެންގުޅޭ ކަމަށް ވެސް އޭނާ ވިދާޅުވިއެވެ.

ކުލީ ބައިކް އިން ސައިކަލް ކުއްޔަށް ދޫކުރާ އަގަކީ ގަނޑިއިރަކަށް 75ރ. އެވެ. އަދި ތިން ގަނޑިއިރަށް ދޫކުރާ ނަމަ ޗާޖް ކުރަނީ 165ރ. އެވެ. ކުލީ ބައިކް އިން ބުނީ އެމީހުން ސައިކަލުތައް ކުއްޔަށް ދޫކުރަނީ ހަމައެކަނި ލައިސެންސް އޮންނަ ފަރާތްތަކަށް އެކަނި ކަމަށެވެ.

މި ރަސްމިއްޔާތުގައި އެސް.އެސް.އެސް އިންޝުއަރެންސްގެ ފަރާތުން ވަނީ ކޯލަކުން ސައިކަލް އިންޝުއަރެންސް ކުރެވޭނެ ހިދުމަތް ތައާރަފުކޮށްފައެވެ. އެގޮތުން 7896022 ނަންބަރަށް ގުޅުމުން އެ ހިދުމަތް ލިބިގެންދާނެ ކަމަށް އެ ފަރާތުން ބުނެއެވެ.