އަރަބިއްޔާ ސްކޫލްގެ ޕްރިންސިޕަލްގެ މަގާމުން ދާދި ފަހުން އިސްތިއުފާ ދެއްވި ޝެއިޚް ނަސްރުﷲ މުސްތަފާގެ މައްޗަށް އޮރިޔާން އުފައްދައި، ގެންގުޅުމުގެ ދައުވާ އުފުލައިފިއެވެ.

އޮރިޔާން ކާޑު އުފައްދައި، ގެންގުޅުމުގެ ދައުވާގެ އިތުރުން، އަޅާނުލުމުގެ ދެ ދައުވާއަކާއި ގާނޫނު ހިންގުމަށް ހުރަސް އެޅުމުގެ ދައުވާއެއް ވެސް ޝެއިޚް ނަސްރުﷲ ގެ މައްޗަށް ދައުލަތުން އުފުލާފައި ވެއެވެ. މި ދައުވާތައް އޭނާގެ މައްޗަށް އުފުލާފައި ވަނީ މިދިޔަ އަހަރުގެ އޯގަސްޓް 20 ވަނަ ދުވަހުއެވެ.

ނަސްރުﷲ ގެ މައްޗަށް ދައުލަތުން އުފުލާފައިވާ މި ދައުވާތަކުގެ ޝަރީއަތް ކްރިމިނަލް ކޯޓުގައި ދަނީ ހިންގަމުންނެވެ.

މި ދައުވާތައް އުފުލާފައި ވަނީ ކޮން މައްސަލަތަކަކާ ގުޅިގެންތޯ ސާފުކުރުމަށް ޕްރޮސެކިއުޓަރ ޖެނެރަލްގެ އޮފީހަށް ގުޅައިގެން ކުރި މަސައްކަތް ކާމިޔާބުވާ ގޮތް ވަނީ ނުވެފައެވެ.

ނަސްރުﷲގެ މައްޗަށް މި ދައުވާތައް އުފުލާފައިވަނިކޮށް، ހައްޖަށް މީހުން ގެންދިއުމުގެ ހުއްދަ ދީފައިވާ އެއްވެސް ޖަމާއަތަކާ ގުޅުމެއް ނެތި އޭނާ މެދުވެރިވެގެން ބަޔަކު މީހުން ހައްޖަށް ގެންގޮސް، ހާލުގައި ޖެހުނު މައްސަލައެއްގައި ނޮވެމްބަރު މަހުގެ ތެރޭގައި އޭނާ ހައްޔަރުކޮށްފައި ވެއެވެ.

އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ޝަރުތުތަކަކާ އެކު ގޭބަންދުގައި ބެހެއްޓުމަށް އަމުރުކޮށްފައި ވެއެވެ. އޭގެ ފަހުން، ޕީޕީއެމްގެ އޮފީހުގައި ބޭއްވި ބައްދަލުވުމެއްގައި، އެ ޕާޓީގެ އިސްވެރިންތަކަކާއެކު އޭނާ އިންނަވަނިކޮށް ނަގާފައިވާ ފޮޓޯއެއް ސޯޝަލް މީޑިއާގައި ދަނީ ދައުރުވަމުންނެވެ.

ހައްޖަށް ގެންދިޔަ މީހުން ހާލުގައި ޖެހުނު މައްސަލަ ފުލުހުން އޭރު ތަހުގީގުކުރިއެވެ. 

ނަސްރުﷲ ގެ މައްޗަށް މި ދައުވާތައް ކުރިއަށްދާއިރު ނަސްރުﷲ ވަނީ ނޫސްވެރިންތަކަކާ ދެކޮޅަށް ސިވިލް ކޯޓުގައި އަބުރުގެ ދައުވާ އުފުލާފައެވެ. އެގޮތުން ވީނިއުސްއާ ދެކޮޅަށް އުފުލާފައިވާ ދައުވާއާ ގުޅިގެން އަންގާރަ ދުވަހު 10:00 ގައި ސިވިލް ކޯޓަށް ހާޒިރުވާން ވީނިއުސް އަށް ވަނީ ޗިޓް ވެސް ފޮނުވާފައެވެ. ހުށަހަޅާފައި ވަނީ އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ހޯދުމުގެ ދައުވާއެކެވެ. މީގެ އިތުރުން އެނގިފައިވާ ގޮތުގައި ނަސްރުﷲ ވަނީ މީޑިއާތަކާ ދެކޮޅަށް މޯލްޑިވްސް މީޑިއާ ކައުންސިލަށް ވެސް މައްސަލަތަކެއް ހުށަހަޅާފައެވެ.