ލަންކާގެ ރައީސް މައިތިރިޕާލާ ސިރިސޭނާއަށް 6 އަހަރު ވެރިކަން ކުރެއްވޭނެ ކަމަށާއި، ޤާނޫން އަސާސީއަށް ބަދަލު ގެނައީ އެމަނިކުފާނު ވެރިކަމަށް ވަޑައިގަތް ފަހުންކަމަށް ލަންކާގެ ބަންޑާރަ ނައިބު ޖަޔަންތަ ޖަޔަސޫރިޔާ ވިދާޅުވެއްޖެއެވެ.

ސިރިސޭނާއަށް ވެރިކަމުގައި 6 އަހަރު ހުންނެވޭނެތޯ ބެއްލެވުމަށް ސުޕްރީމް ކޯޓުގެ ލަފަޔަކަށް އެދި ހުށަހަޅުއްވާފައިވާ މައްސަލައާއި ގުޅޭގޮތުން ބަންޑާރަ ނައިބު ވިދާޅުވީ 2015 ވަނަ އަހަރުގެ ޖެނުއަރީ މަހުގެ 8 ވަނަ ދުވަހު ލަންކާގެ ރައްޔިތުން ވޯޓު ލައިގެން ސިރިސޭނާ ވެރިކަމަށް ހޮވީ 6 އަހަރުގެ ދައުރަކަށް ކަމަށެވެ. އަދި ސިރިސޭނާ ޖެހިގެން އައި ޖެނުއަރީ 9 ވަނަ ދުވަހު ވެރިކަމުގެ ހުވައި ކުރެއްވީވެސް 6 އަހަރުގެ ދައުރަކަށް ކަމަށެވެ. އަދި އެކަން ބަދަލުކުރަން އުޅުމަކީ ރައްޔިތުންގެ ބަހަށް ފުރަގަސް ދިނުންކަމަށް އޭނާ ސިފަކުރެއްވިއެވެ.

ލަންކާގެ ޤާނޫނު އަސާސީއަށް ގެނެވުނު 19 ވަނަ އިސްލާހުގެ ދަށުން ވެރިކަމުގެ ދައުރުގެ މުއްދަތު ވަނީ 6 އަހަރުން 5 އަހަރަށް ބަދަލުކޮށްފައެވެ. ސިރިސޭނާގެ އިސްނެންގެވުމަކަށް ބޮޑުވަޒީރު ރަނިލް ވިކްރަމަ ސިންހަގެ ޔުނައިޓެޑް ނޭޝަނަލް ޕާޓީއިން ޤާނޫން އަސާސީއަށް މި ބަދަލުގެނައީ، މިއީ ކެމްޕޭންގެ ތެރޭގައި ސިރިސޭނާ އާއި ރަނިލް ވިކްރަމަސިންހަ ވެވަޑައިގެންނެވި ވައުދަކަށް ވުމުންނެވެ. 

ސުޕްރީމް ކޯޓުގެ ލަފަޔަކަށް އެދި ހުށަހަޅާފައިވާ މައްސަލައިގެ ތެރެއަށް ކުރީގެ ރައީސް މަހިންދަ ރާޖަޕަކްސަގެ އައު ސިޔާސީ ޕާޓީއިންވަނީ ތަދައްޚުލްވެފައެވެ.

އެޕާޓީގެ ލީޑަރު އަދި ކުރީގެ ޚާރިޖީ ވަޒީރު ޖީ.އެލް. ޕީރިސް ވިދާޅުވީ ޤާނޫން އަސާސީއަށް އިސްލާޙު ގެނެވުނީ މިހާރުވެސް ހިނގަމުންދާ ދައުރު ހިމެނޭ ގޮތަށް ކަމަށެވެ. އެޕާޓީގެ ފަރާތުން ކޯޓުގައި ބުނެފައިވަނީ ދައުރުގެ މުއްދަތު ކުރުވާތީ އެކަމާއި ހިތްޕުޅުހަމަޖެހިވަޑައި ނުގަންނަވާނަމަ ސިރިސޭނާ ސުޕްރީމް ކޯޓަށް ވަޑައިގަންނަވަން ޖެހިވަޑައިގަންނަވާނީ ޤާނޫން އަސާސީއަށް ބަދަލު ގެނައުމަށް ޤާނޫން ހަދާ މަޖިލީހަށް ހުށަހެޅުމުންކަމަށާއި، އެ އިސްލާހު ފާސްކޮށް، އެއަށް އަމަލުކުރަން ފެށުމުން ނޫންކަމަށެވެ.

ސިރިސޭނާ ލަފަޔަށް އެދިވަޑައިގެން ހުށަހެޅުއްވި މައްސަލަ ބެލުމަށް އުއްތަމަފަނޑިޔާރު ހިމެނޭ ގޮތަށް ސުޕްރީމް ކޯޓުގެ 5 ފަނޑިޔާރުންގެ ބެންޗެއް ވަނީ އެކުލަވާލާފައެވެ.

މިމައްސަލައިގެ ތެރެއަށް ގިނަ ފަރާތްތަކެއް ތަދައްޚުލްވެފައިވާއިރު، ހުރިހާ ވަކީލުން އެބޭފުޅުންގެ ބަޔާންތައް ލިޔުމުން ހުކުރު ދުވަހުގެ މެންދުރު 12ގެ ކުރިން ސުޕްރީމް ކޯޓަށް ހުށަހެޅުމަށް ވަނީ އަންގާފައެވެ.

ލަންކާގައި އަންނަ ފެބްރުއަރީ މަހު އޮންނަ ލޯކަލް ކައުންސިލް އިންތިޚާބުގެ ފޯރި ގަދަވެފައިވާއިރު، ސިރިސޭނާއާއި ބޮޑުވަޒީރު ރަނިލް ވިކްރަމަ ސިންހައާއި ދެމެދު އޮތް ގުޅުން ވަނީ ވަރަށް ބޮޑަށް ގޯސްވެފައެވެ.