ޖެރޫސަލަމް މައްސަލާގައި އަރަބް ލީގުން މަޝްވަރާ ކުރަނީ

އެމެރިކާ އިން ޖެރޫސަލަމް އަކީ އިޒްރޭލުގެ ވެރިރަށް ކަމަށް ގަބޫލު ކުރާކަން އިއުލާން ކުރުމާ ގުޅިގެން އެކަމާ ދެކޮޅަށް ކުރެވޭނެ ކަންކަމާ މެދު މަޝްވަރާ ކުރުމަށް އަރަބް ލީގުން މިއަންނަ ފެބްރުއަރީ 1 ގައި ބައްދަލު ކުރަން ނިންމައިފި ކަމަށް މިސްރުގެ ދައުލަތުގެ މީޑިއާ "މެނާ" އިން ބުދަ ދުވަހު ހާމަކޮށްފިއެވެ.

ދާދިފަހުން ޖޯޑަންގެ ވެރިރަށް އައްމާންގައި ބައްދަލު ކުރެއްވި އަރަބި ހަ ގައުމެއްގެ ފޮރިން މިނިސްޓަރުން ވިދާޅުވެފައި ވަނީ 1967 ވަނަ އަހަރު ކުރި ހަނގުރާމައިގައި އިޒްރޭލުން ފޭރިގެންފައިވާ އިރުމަތީ ޖެރޫސަލަމް ހިމަނައިގެން ފަލަސްތީނުގެ ދައުލަތެއް ގާއިމުކޮށް އެ ދައުލަތް އދ އިން ބަލައިގަތުމަށް، ޑިޕްލޮމެޓިކް މަސައްކަތްތަކެއް އެ ފަރާތްތަކުން ކުރާނެ ކަމަށެވެ.

އެމެރިކާ އިން ޖެރޫސަލަމް އަކީ އިޒްރޭލުގެ ވެރި ރަށް ކަމަށް މިދިޔަ އަހަރުގެ ޑިސެމްބަރު މަހު 6 ގައި ގަބޫލު ކުރި ކުރުމާ ގުޅިގެން އަރަބި ފޮރިން މިނިސްޓަރުން ބޭއްވި ކުއްލި ބައްދަލުވުމެއްގައި އެ ފަރާތްތަކުން ވިދާޅުވެފައި ވަނީ، އެމެރިކާގެ ނިންމުމުގެ ސަބަބުން ސަރަހައްދުގައި ހަމަނުޖެހުން އުފެދޭނެ ކަމަށާއި އަދި ރައީސް ޓްރަމްޕްގެ ނިންމުން އެ ފަރާތްތަކުން ސިފަ ކޮށްފައި ވަނީ "ބައިނަލްއަގްވާމީ ގާނޫނާއި ހިލާފު ނުރައްކާތެރި ނިންމުމެއް ކަމަށެވެ."

އިޒްރޭލާ ފަލަސްތީނާ ދެމެދު ސުލްހައިގެ މަގެއް ހޯދުމަށް ކުރެވެމުންދާ މަސައްކަތުގައި އެންމެ ނާޒުކު އަދި އުނދަގޫ މައްސަލައަކަށް ޖެރޫސަލަމްގެ މައްސަލަވެފައި އޮއްވާ، އެމެރިކާ އިން ޖެރޫސަލަމް އަކީ އިޒްރޭލުގެ ވެރި ރަށް ކަމަށް ގަބޫލު ކުރާކަން އިއުލާން ކުރުމުން މައްސަލަ އިތުރަށް މިވަނީ ގޯސްވެފައެވެ. އެމެރިކާގެ މި ނިންމުމާއެކު މައްސަލައެއް ހައްލެއް ހޯދުމަށް އެމެރިކާ އިން އަދާކުރަމުން ދިޔަ މެދުވެރިއެއްގެ ދައުރުވެސް މިވަނީ ނިމުމަކަށް އައިސްފައެވެ.